ប្រទះឃើញពងក្រពើភ្នំ ២១គ្រាប់ ក្នុងឧទ្យានជាតិជួរភ្នំក្រវាញ

ក្រុមការងារអភិរក្សក្រពើភ្នំ បានប្រទះឃើញពងក្រពើភ្នំ ២១គ្រាប់ ក្នុងជម្រកដីសើមនៃត្រពាំងពាង ស្ថិតក្នុងឧទ្យានជាតិជួរភ្នំក្រវាញខាងត្បូង ខេត្តកោះកុង ក្នុងខែមិថុនា ឆ្នាំ២០២៣នេះ។

ក្រុមការងារអភិរក្សក្រពើភ្នំនៃអង្គការ Fauna & Flora ក្នុងកិច្ចសហការជាមួយមន្ទីរបរិស្ថានខេត្តកោះកុង រដ្ឋបាលព្រៃឈើ និងសហគមន៍មូលដ្ឋាន បានរកឃើញសំបុកក្រពើភ្នំ ដែលមានពងចំនួន ២១គ្រាប់។ ក្នុងនោះ ១៧គ្រាប់បានបង្កកំណើត ត្រូវបានផ្លាស់ទីទៅកន្លែងមានសុវត្ថិភាព និងកំពុងត្រូវបានភ្ញាស់នៅក្នុងសំបុកសិប្បនិម្មិត ដើម្បីធានាសុវត្ថិភាព ខណៈដែលពងមិនបង្កកំណើតចំនួន ៤គ្រាប់ ត្រូវបានទុកនៅក្នុងសំបុកដើម។ ទន្ទឹមនោះសំបុកសិប្បនិម្មិតនោះ ត្រូវបានហ៊ុមព័ទ្ធ និងយាមពេញមួយថ្ងៃដោយសហគមន៍អភិរក្សក្រពើ ដើម្បីការពារពងពីគ្រោះថ្នាក់ផ្សេងៗ។

ជាមួយគ្នានោះអង្គការ Fauna & Flora បានសង្កត់ធ្ងន់ថា៖«យើងរំពឹងថា ពងនឹងញាស់នៅពាក់កណ្តាល ខែសីហាខាងមុខនេះ ហើយកូនក្រពើនឹងត្រូវលែងចូលទៅក្នុងធម្មជាតិវិញ ដើម្បីធានាថាពួកគេមានឱកាសរស់រានមានជីវិតខ្ពស់បំផុត»។ ក្រពើភ្នំ (Crocodylus siamensis) ដែលជាប្រភេទសត្វជិតផុតពូជបំផុត និងគំរាមកំហែងដល់ការផុតពូជពីធម្មជាតិ ត្រូវបានរកឃើញមានវត្តមាននៅប្រទេសកម្ពុជា ដោយការអង្កេតរបស់អង្គការ Fauna & Flora និងរដ្ឋបាលព្រៃឈើនៅតំបន់ជួរភ្នំក្រវាញក្នុងឆ្នាំ២០០០។

បើតាមការសិក្សាបានវាយតម្លៃថា ចំនួនក្រពើភ្នំសរុបទូទាំងពិភពលោក មានចំនួនប្រហែល ១ពាន់ក្បាល ក្នុងនោះ ប្រទេសកម្ពុជាមានវត្តមានក្រពើភ្នំជិត ៤០០ក្បាល៕