ពលរដ្ឋក្នុងក្រុងបាត់ដំបងរអ៊ូរឿងដំឡើងថ្លៃប្រមូលសំរាម

ចាប់ពីថ្ងៃទី០១ ខែសីហា ឆ្នាំ២០២៣ តទៅសាលាក្រុងបាត់ដំបងអាចប្រមូលលុយបានច្រើន តាមរយៈការដំឡើងថ្លៃប្រមូលសំរាម ខណៈទីតាំងខ្លះមិនដែលចូលប្រមូលដល់ក៏មានវិក្កយបត្របញ្ជូនទៅដល់ដែរ។

ចាប់ពីដើមខែសីហារហូតមក មានការលើកឡើងពីមាត់មួយទៅមាត់មួយ ដោយម្នាក់ៗបានធ្វើការរិះគន់យ៉ាងខ្លាំងទៅលើសាលាក្រុងបាត់ដំបង ដែលបានចេញលិខិតផ្សព្វផ្សាយនូវការតម្លើងថ្លៃលើសេវាប្រមូលសំរាមលើសង្កាត់ទាំង ១០ ក្នុងក្រុងបាត់ដំបង ដោយសាលាក្រុងជាអ្នកដេញថ្លៃ និងប្រមូលលុយ ឯអ្នកកើបសំរាមគឺបុគ្គលិកក្រុមហ៊ុន សុិន ទ្រី ដដែល ដោយគ្រាន់តែពេលនេះ សាលាក្រុងទិញសំរាមគិតជាគីឡូក្រាមពីក្រុមហ៊ុនសុិនទ្រី ក្នុងតម្លៃ១ តោន ៦២.០០០ រៀល។

ប្រភពមួយចំនួនបាននិយាយថា បច្ចុប្បន្នផ្ទះជួលត្រូវរាប់បន្ទប់គិតលុយ ដោយក្នុងមួយបន្ទប់ ១ ដុល្លារ ទោះបីជាផ្ទះជួលនោះគ្មានភ្ញៀវចូលក៏ដោយ។

ដោយឡែកគ្រឹះស្ថានឯកជននានា ដែលកន្លងមកធ្លាប់តែបង់លើសេវាប្រមូលសម្រាមក្នុងមួយខែ ត្រឹមតែ ២០ មុឺន ឥឡូវឡើងដល់ ៨០ មុឺន កន្លែងខ្លះជាង១លាន។

បច្ចុប្បន្នក៏នៅតែមានការជជែកវែកញែកដែរលើបញ្ហានេះ ពីសំណាក់មជ្ឈដ្ឋានជាច្រើន ដោយសារតែផ្ទះមួយខ្នងជាទូទៅបង់តែ២មុឺន ឥឡូវឡើង៥មុឺន ហើយបើមានតូបតូចៗលក់នៅខាងមុខផ្ទះទៀត ត្រូវរាប់យកតែម្តង គឺតូបមួយតម្លៃ ១៤.០០០ រៀល បន្ថែមទៀត ហើយបុគ្គលិកសាលាក្រុងមិនត្រឹមតែដើរចែកវិក្កយបត្រលើ១០សង្កាត់ ដែលមាន៦២ភូមិប៉ុណ្ណោះទេ គេថែមទាំងជ្រុលទៅចែកដល់ស្រុកផ្សេងទៀត ដែលជាដែនកំណត់របស់ក្រុមហ៊ុនផ្សេងទៅទៀត។

លោក ណយ ចេក អនុប្រធានការិយាល័យសាធារណការ នៃសាលាក្រុងបាត់ដំបងបានបញ្ជាក់ថា ដោយសារតែពេលនេះ រថយន្តដឹកសំរាមក៏ច្រើន ហើយការប្រមូលគឺទៅតាមភូមិសាស្ត្រ ដោយកន្លែងខ្លះ២ថ្ងៃម្តង កន្លែងខ្លះទៀត ៤ថ្ងៃម្តង មិនដូចពីមុនដែលការប្រមូលមានការយឺតយ៉ាវ រហូតធ្វើឱ្យសំរាមស្អុយរលួយ។

ប្រជាពលរដ្ឋបានលើកឡើងថា ទោះបីជាការប្រមូលសំរាមយឺត ឬលឿន វាគឺជាកាតព្វកិច្ចរបស់ក្រុមហ៊ុនប្រមូលសំរាម និងជានាទីមើលការខុសត្រូវរបស់សាលាក្រុងទៅហើយ ហេតុអ្វីបានជាមកតម្លើងថ្លៃសេវាប្រមូលសំរាមបែបនេះទៅវិញ? 

អត្ថបទ៖ សោ និយមរ័ត្ន