មេពន្ធនាគារ បញ្ជាឱ្យពិនិត្យរកសារធាតុញៀន លើមន្ដ្រី និងអ្នកជាប់ឃុំ ដោយមិនឱ្យដឹងមុន

អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ លោក ឈន សាណាត បានចេញបញ្ជាឲ្យពិនិត្យទឹកនោមមន្ដ្រីពន្ធនាគារទូទាំងប្រទេស ដើម្បីរកសារធាតុញៀន និងជនជាប់ឃុំដែលមានការសង្ស័យប្រើប្រាស់សារធាតុញៀន ដោយមិនមានការជូនដំណឹងជាមុន។

នេះបើតាម សេចក្ដីណែនាំ ស្ដីពីធ្វើការតេស្តទឹកនោមរកសារធាតុញៀនលើមន្ត្រីពន្ធនាគារទូទាំងប្រទេស និងជនជាប់ឃុំដែលមានការសង្ស័យប្រើប្រាស់សារធាតុញៀន ដែលចេញដោយអគ្គនាយកដ្ឋានពន្ធនាគារ នាថ្ងៃទី២៧ ខែកញ្ញានេះ។

ការណ៍ដែល លោក ឈន សាណាត បញ្ជាឱ្យពិនិត្យរកសារធាតុញៀនលើមន្ដ្រី និងអ្នកជាប់ឃុំបែបនេះ គឺ ដើម្បីធានាប្រសិទ្ធិភាពការអនុវត្តការងាររបស់មន្ត្រីពន្ធនាគារនៅតាមមណ្ឌលអប់រំកែប្រែ និងពន្ធនាគាររាជធានី ខេត្ត ឱ្យមានប្រសិទ្ធភាព និងមានការជឿទុកចិត្តពីមជ្ឈដ្ឋានទូទៅ។

សម្រាប់ការចុះធ្វើតេស្តរកសារធាតុញៀន ដោយអគ្គនាយកដ្ឋានពន្ធនាគារនេះ គឺសហការជាមួយមន្ត្រីពេទ្យពន្ធនាគារគោលដៅនីមួយៗ ក៏ប៉ុន្តែការចុះធ្វើតេស្តរកសារធាតុញៀន គឺមិនមានការជូនដំណឹងឱ្យដឹងជាមុនឡើយ។

 ក្នុងករណីដែលរកឃើញថា មន្ត្រីពន្ធនាគារមានចេតនាគេចវេស មិនចូលរួមការធ្វើតេស្ដរកសារធាតុញៀន ឬមន្ត្រីណាម្នាក់ត្រូវបាបរកឃើញមានសារធាតុញៀន អគ្គនាយកដ្ឋានពន្ធនាគារ នឹងគោរពស្នើសុំគោលការណ៍សម្រេចពីក្រសួង ដើម្បីអនុវត្តនូវវិធានការរដ្ឋបាលនានា និងវិធានការផ្លូវច្បាប់ជាធរមាន៕

ដោយ៖ ង៉ិល ណារ៉ាត់