ព័ត៌មានជាតិ

ព្រៃឈើពូជធ្នង់២០ហិកតាត្រូវអគ្គិភ័យឆាបឆេះ

បានផុស

៣ years មុន

នៅ

ថ្ងៃព្រហស្បតិ៍ ៤ កុម្ភៈ ២០២១

ដោយ

លោក អៀង ពិសិដ្ឋ អភិបាលនៃគណៈអភិបាលស្រុកស្វាយលើ ខេត្តសៀមរាប បានឲ្យដឹងថា នៅវេលាម៉ោង១៤និង៤៥នាទី មានករណីភ្លើងឆេះព្រៃចម្ការពូជធ្នង់ ស្ថិតនៅក្នុងភូមិសាស្ត្រ ភូមិអង្កាញ់ ឃុំស្វាយលើ ស្រុកស្វាយលើ បណ្តាលឲ្យខូចខាតអស់ប្រមាណចំនួន២០ហិចតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងករណីភ្លើងឆេះព្រៃចម្ការពូជធ្នង់នេះ អធិការនគរបាលស្រុកស្វាយលើ បានបញ្ជាឲ្យកម្លាំងនគរបាលនិងក្រុមរថយន្តពន្លត់អគ្គិភ័យស្រុក ចុះជួយអន្តរាគមន៍ និងសហការកម្លាំងសង្កាត់រដ្ឋបាលព្រៃឈើស្វាយលើ និងផ្នែករដ្ឋបាលព្រៃឈើជីក្រែង មន្ត្រីខណ្ឌរដ្ឋបាលព្រៃឈើសៀមរាប និងកម្លាំងប្រជាការពារភូមិសរុបចំនួន២០នាក់ ប្រើប្រាស់រថយន្តពន្លត់អគ្គិភ័យ១គ្រឿង ក្នុងការពន្លត់ទប់ស្កាត់កុំឲ្យមានការឆេះរាលដាលបន្តទៀត ដោយបានគ្រប់គ្រងសភាពការណ៍បានទាំងស្រុង នៅវេលាម៉ោង១៩និង៣០នាទីល្ងាចថ្ងៃដដែល។

តាមការបញ្ជាក់របស់មន្ត្រីសង្កាត់រដ្ឋបាលព្រៃឈើស្វាយលើ បានឲ្យដឹងថា កម្លាំងជំនាញតែងចុះល្បាតនៅតាមតំបន់ដើម្បីការពារព្រៃឈើដែលជាសម្បត្តិរដ្ឋ ព្រមទាំងបទល្មើសលួចចូលមកកាប់ទន្ទ្រានយកដីព្រៃរបស់រដ្ឋធ្វើជាកម្មសិទ្ធ នៅភូមិសាស្ត្រឃុំតាសៀម និងបានធ្វើការដកហូតបាន រថយន្ត០២គ្រឿង និងកាំភ្លើងខ្យល់០១ដើម ។

លោកក៏បានឲ្យដឹងទៀតថា នៅពេលរដូវក្តៅចូលមកដល់រៀងរាល់ឆ្នាំ មានក្រុមជនខិលខូចតែងតែលបលួចដុតបំផ្លាញព្រៃ ក្នុងដែនគ្រប់គ្រងរបស់រដ្ឋ សំខាន់គឺទីតាំងផ្ទៃដីចម្ការព្រៃពូជនេះតែម្តង ។ បច្ចុប្បន្ននេះ រដ្ឋបាលព្រៃឈើ ក៏បានដាក់វិធានការក្នុងការទប់ស្កាត់បទល្មើសទាំងនេះឲ្យខាងតែបាន ដើម្បីថែរក្សា និងអភិរក្សនូវធន់ធានធម្មជាតិ ដែលនៅសេសសល់ពីការបំផ្លិចបំផ្លាញពីក្រុមជនល្មើស ឲ្យបានគង់វង្ស និង បន្តការដាំដុះ ឡើងវិញផងដែរ នូវកូនឈើមានតម្លៃគ្រប់ប្រភេទ នៅតាមតំបន់ដីព្រៃរិចរឹល ក្នុងការទ្រទ្រង់បរិស្ថាននៃភពផែនដី៕

អត្ថបទ ៖ គឿនវេត