អ្នកសារព័ត៌មានជើងចាស់បីរូប ត្រូវបានចាត់តាំងជាអ្នកនាំពាក្យទីស្ដីការគណៈរដ្ឋមន្ត្រី

លោក វង្សី វិសុទ្ធ ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានចេញសេចក្ដីសម្រេចចាត់តាំងឥស្សរជនចំនួន៥រូប ជាក្រុមអ្នកនាំពាក្យទីស្ដីការគណៈរដ្ឋមន្ត្រី។ ក្នុងចំណោមក្រុមអ្នកនាំពាក្យទីស្ដីការគណៈរដ្ឋមន្ត្រីទាំង៥រូបនោះ​ គឺមាន៣រូបគឺជាអ្នកសារព័ត៌មានជើងចាស់។

ឥស្សជនអ្នកនាំពាក្យទាំង៣រូបដែលជាអ្នកសារព័ត៌មាននោះគឺ លោក ហ៊ុយ វណ្ណៈ រដ្ឋលេខាធិការទីស្ដីការគណៈរដ្ឋមន្ត្រី ត្រូវបានតែងតាំងជាអនុប្រធានក្រុមអ្នកនាំពាក្យ។ លោកស្រី អ៊ុង ច័ន្ទសោភា អនុរដ្ឋលេខាធិការទីស្ដីការគណៈរដ្ឋមន្ត្រី ដែលជាអ្នកសារព័ត៌មានបម្រើការងារនៅស្ថានីយទូរទស្សន៍ស៊ីអិនស៊ី របស់ក្រុមហ៊ុន​ CBS របស់អ្នកឧកញ៉ា គិត ម៉េង  ត្រូបានតែងតាំងជាសមាជិក និងលោក ម៉ក់ រេនីតា  អនុរដ្ឋលេខាធិការទីស្ដីការគណៈរដ្ឋមន្ត្រី។ លោក គឺអ្នកសារព័ត៌មានផ្នែកថតរូបភាព និងវីដេអូ ដែលបម្រើការងារនៅអគ្កនាយកដ្ឋានវិទ្យុ និងទូរទស្សន៍បាយ័ន ត្រូវបានតែងតាំងជាសមាជិកអ្នកនាំពាក្យ។

បើតាមសេចក្ដីសម្រេច ស្ដីពីការបង្កើត និងចាត់តាំងក្រុមអ្នកនាំពាក្យទីស្ដីការគណៈរដ្ឋមន្ត្រី ក្រៅពីឥស្សជនទាំង៣រូបនេះ លោក វង្សី វិស្សុត ក៏បានតែងតាំង លោក អេង ទូច រដ្ឋលេខាធិការ និងនាយកខុទ្ទកាល័យទីស្ដីការគណៈរដ្ឋមន្ត្រី ឱ្យធ្វើជាប្រធានក្រុម​អ្នកនាំពាក្យ និងតែងតាំង លោក ទិត សុធា ដែលជាអ្នកជំនាញ ក៏ដូចជាមានបទពិសោធន៍ច្រើនឆ្នាំក្នុងកិច្ចការងារនាំពាក្យប្រចាំទីស្ដីការគណៈរដ្ឋមន្ត្រី ជាអនុប្រធានក្រុមអ្នកនាំពាក្យ។

បើតាមសេចក្ដីសម្រេចបណ្ដាឥស្សរជនទាំង៥រូបនេះ មានភារកិច្ច ដឹកនាំ គ្រប់គ្រង ធ្វើនិយ័តកម្មលើការផ្សព្វផ្សាយរាល់ព័ត៌មានផ្លូវការរបស់ទីស្តីការគណៈរដ្ឋមន្ត្រី  និងរៀបចំសេចក្ដីបំភ្លឺ សេចក្ដីប្រកាសព័ត៌មាន សេចក្តីថ្លែងការណ៍ និងការផ្សព្វផ្សាយផ្សេងទៀតអំពីព័ត៌មាន របស់ទីស្តីការគណៈរដ្ឋមន្ត្រីឱ្យបានទាន់ពេលវេលា និងមានប្រសិទ្ធភាពខ្ពស់ ក៏ដូចជាទំនាក់ទំនងនឹងឆ្លើយតបជាផ្លូវការជាមួយសាធារណជន បណ្ដាញសារព័ត៌មានជាតិ និងអន្តរជាតិ។

បន្ថែមពីនេះ ក្រុមអ្នកនាំពាក្យមានភារកិច្ចសហការជាមួយអង្គភាពនានាចំណុះទីស្តីការគណៈរដ្ឋមន្ត្រី ដើម្បីប្រមូលព័ត៌មាន តាមដាន អង្កេត និងវិភាគនូវរាល់ព័ត៌មាន និងឯកសារពាក់ព័ន្ធ សម្រាប់ធ្វើការឆ្លើយបំភ្លឺជូនសាធារណជន និងបណ្តាញ សារព័ត៌មានជាតិ និងអន្តរជាតិ ក៏ដូចជាស្រាយបំភ្លឺចំណោទបញ្ហានានាដែលកើតមានឡើងក្នុងក្របខ័ណ្ឌទីស្តីការគណៈរដ្ឋមន្តី  និងរៀបចំសន្និសីទសារព័ត៌មាននានាជូនថ្នាក់ដឹកនាំទីស្ដីការគណៈរដ្ឋមន្ត្រី។

ជាពិសេស ក្រុមអ្នកនាំពាក្យមានភារកិច្ច ស្រាវជ្រាវនិងប្រមូលចងក្រងរាល់ព័ត៌មានដែលពាក់ព័ន្ធនឹងទីស្តីការគណៈរដ្ឋមន្ត្រី ក៏ដូចជាបំពេញភារកិច្ចផ្សេងៗទៀតតាមការប្រគល់ជូនរបស់រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី៕

ដោយ៖ ង៉ិល ណារ៉ាត់