ស្រ្តីមេផ្ទះ ត្អូញត្អែរពីការទទួលទានប្រចាំថ្ងៃ ព្រោះយល់ថា ចំណីអាហារភាគច្រើនប្រើសារធាតុគីមី

បញ្ហានៃការប្រើប្រាស់ម្សៅគីមីលើចំណីអាហារ ដែលដាក់លក់នៅលើទីផ្សារ ជាក្តីព្រួយបារម្ភសម្រាប់ពលរដ្ឋកម្ពុជា ជាច្រើនឆ្នាំមកហើយ រហូតដល់មិនដឹងថា គួរស្វែងរកអាហារប្រភេទណា ដែលមិនប្រើសារធាតុគីមីទាំងនោះ។ នេះជាការលើកឡើង របស់អ្នកស្រី ជា ស្រីនាង ដែលជាស្ត្រីមេផ្ទះមួយរូប រស់នៅទីក្រុងភ្នំពេញ។

ពាក់ព័ន្ធនឹងអាហារទទួលទានប្រចាំថ្ងៃ អ្នកស្រីជា ស្រីនាង រៀបរាប់ថា នៅក្នុងគ្រួសារ អ្នកស្រីជាអ្នកដែលត្រូវរ៉ាប់រង លើការទទួលទានរបស់គ្រួសារ ហេតុនេះហើយ វាចាំបាច់ណាស់ដែលត្រូវជ្រើសរើសយក ចំណីអាហារណាដែលល្អ សម្រាប់សុខភាព ប៉ុន្តែអ្វីដែលជាបញ្ហាចម្បងរបស់អ្នកស្រី គឺមិនអាចបែងចែកដឹងថា អាជីវករណាលក់មិនប្រើថ្នាំ។

ទន្ទឹមនេះអ្នកស្រី សាវ៉ាង ស្រ្តីមេផ្ទះមួយរូប បានត្អូញត្អែរដែរថា “ឥលូវ វាស្ទើរតែទូទៅហើយសម្រាប់អ្នកលក់ ទាល់តែប្រើសារធាតុគីមី ទើបគាត់អាចទុកលក់បានយូរ ហើយទម្រាំដល់ដំណាក់កាលដាក់លក់លើទីផ្សារ មិនដឹងថា គីមីប៉ុន្មានតង់ទេ ព្រោះអ្នកដាំក៏ប្រើសម្រាប់សត្វល្អិត ឯអ្នកលក់នៅផ្សារ ក៏ប្រើឱ្យនៅស្រស់ អ៊ីចឹងហើយហានិភ័យ គឺយើងអ្នកទទួលទានហ្នឹងឯង”។

ជុំវិញបញ្ហានេះ យុវតី ប៉ិច សុវុឌ្ឍិកា អ្នករៀ​នជំនាញគីមីចំណីអាហារ បានចែករំលែកថា ម្សៅស ជាប្រភេទសារធាតុគីមី មិនត្រូវបានអនុញ្ញាតឱ្យប្រើប្រាស់ជាសារធាតុបន្ថែមក្នុងម្ហូបអាហារទេ ប៉ុន្តែអាជីវករ​កម្ពុជាភាគច្រើន ​កំពុង​តែ​ប្រើ​ប្រាស់​ សារធាតុ​គីមី​ហាមឃាត់នេះ។ ក្រៅពីសារធាតុគីមីនេះ ក៏នៅមានសារធាតុ គីមីផ្សេងទៀត ដែលត្រូវបានគេប្រើ លើម្ហូបអាហារប្រចាំថ្ងៃផងដែរ ដូចជា អាសុីតសាលីសាលិច ប៉ូរ៉ាក់ និងហ្វ័រម៉ុលជាដើម នៅ​ក្នុង​សាច់ ​និង​បន្លែ ​ដែលជា​ហានិភ័យ​​នៃ​ជំងឺ​ជា​ច្រើន ​មិនត្រឹមតែប៉ះពាល់​សុខភាព​យូរ​អង្វែង អាចបង្កជាជំងឺមហារីកទៀតផង។

បើតាមរបាយ​ការណ៍​ស្រាវជ្រាវ​របស់អ្នកជំនាញផ្នែក​គីមី​ និង​ចំណី​អាហារ​នៃ​វិទ្យាស្ថាន វិទ្យា​សាស្រ្ត ​និង​បច្ចេកវិទ្យា នៃ​រាជបណ្ឌិត​សភា​កម្ពុជា អំឡុងឆ្នាំ២០១០ ក៏ធ្លាប់បានបង្ហាញថា ជាទូទៅសារធាតុ​សូដ្យូម​អុីដ្រូស៊ុល​ហ្វីត (ម្សៅស) ត្រូវបានអាជីវករខិតខូចមួយចំនួនប្រើលើ ស​ណ្តែក​បណ្តុះ ​ខ្ញី​ហាន់​ គល់​ស្លឹក​គ្រៃហាន់ ​ដូង​ខ្ចី ផ្លែត្នោត ដែល​គេ​ចិត​សំបក​រួច​ និង​ស្ករ​ត្នោត​ជាដើម ដើម្បីឱ្យនៅស្រស់ល្អ និងរក្សាទុកបានយូរ។

ប្រភពដដែលនេះ បញ្ជាក់ទៀតថា សារធាតុ​គីមីមួយនេះ ពិតជាមានផលប៉ះពាល់ចំពោះសុខភាពមនុស្ស ព្រោះវាអាចធ្វើ​ឱ្យ​សម្ពាធ​ឈាម​ធ្លាក់​ចុះខ្លាំង​ ថប់ដង្ហើម​ ឈឺ​ក្រពះ ​ក្អួត​ រាគ​ កន្ទួល​លើ​ស្បែកផងដែរ។ បើ​ចំពោះ​ អ្នក​ជំងឺ​ហឺត​វិញ គឺកាន់តែគ្រោះថ្នាក់ ព្រោះវាអាចធ្វើឱ្យពួកគាត់​ស្ទះ​ដង្ហើម​សន្លប់ ឬអាចបាត់បង់ជីវិតបាន។

គួររំលឹកថា អ្នកជំនាញផ្នែក​គីមី​ និង​ចំណី​អាហារ​ នៃ​វិទ្យាស្ថាន វិទ្យា​សាស្រ្តនិង​បច្ចេកវិទ្យា នៃ​រាជបណ្ឌិត​សភា​កម្ពុជា ក៏ធ្លាប់បានគូសបញ្ជាក់ បញ្ហានេះជារឿងសំខាន់ ដែលទាមទារឱ្យគ្រប់ភាគីពាក់ព័ន្ធទាំងអស់ រួមគ្នាទប់ស្កាត់ ទាំងការអប់រំណែនាំ និងត្រូវត្រួតពិនិត្យលើការនាំចូល ក៏ដូចជាការដាំដុះយ៉ាងម៉ត់ចត់ជាប្រចាំ៕