បង្ហើប​តម្លៃ​ផ្លែ​មៀន​ប៉ៃលិន ​រដូវប្រមូល​អាច​ហក់​ឡើង​ដល់​ ១ គីឡូក្រាម ៤៤០០ រៀល

ចាប់ពីថ្ងៃទី ២០ ខែធ្នូ ជាពេលវេលាកសិករត្រូវប្រមូលផលផ្លែមៀនប៉ៃលិនជាបណ្តើរៗ ខណះដែលការប្រមូលផលរបស់កសិករមិនពិបាកស្វែងរកទីផ្សារនោះទេ គឺត្រូវបានសហគមន៍ទទួលយកនិងបាន​កំណត់​តម្លៃតាំងពីមិនទាន់ប្រមូលផល ក្នុង​​តម្លៃមួយដែលកសិករទទួលយកបាន។

លោក ខ្លូត រិនដា អាយុ ៤៣ ឆ្នាំ ជាកសិករ​គម្រូ​មួយ​រូប​រស់នៅភូមិចំការស្រូវ ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង​បាន​ឲ្យ​ដឹង​ថា ផលិតផលផ្លែមៀនប៉ៃលិនសហគមន៍ផ្តោតលើការ​ទាមទារឲ្យកសិករថែទាំតាមបច្ចេកទេស មានអនាម័យ​ល្អ​ទាំងគុណភាពទាំងការវេចខ្ចប់ មិនមែនចេះតែទទួលទិញយក​ដោយគ្មានការពិនិត្យត្រឹមត្រូវនោះទេ ព្រោះ​សហគមន៍​ក៏នាំ​ចេញបន្តទៅក្រៅប្រទេសផងដែរ ដើម្បីលើកកម្ពស់ផ្លែមៀនរបស់ខេត្តបាត់ដំបង។

កសិកររូបនេះបន្តថា មុនលោកប្រកបរបរដាំមៀននេះ លោកបានចូលសិក្សាវគ្គខ្លីជាច្រើនលើកច្រើនសារជាមួយមន្ត្រីជំនា ញកសិកម្មក្នុងខេត្ត ហើយលោកក៏បានរៀនយកជំនាញពីសាស្ត្រាចារ្យផ្នែកកសិកម្មពីប្រទេសថៃផងដែរ កាលពីលោកនៅធ្វើជាកម្មករសំណាកស្រុក។ កត្តាទាំងនេះហើយទើបផលកសិកម្មរបស់លោក ត្រូវបានសហគមន៍មានចំណាប់អារម្មណ៍ជាងកសិករដទៃទៀត។

ដំណាំមៀនប៉ៃលិនរបស់លោកដែលត្រៀមនិងប្រមូលផលចាប់ពីថ្ងៃទី ២០ ខែធ្នូលើផ្ទៃដី​ចំនួនជាង​ ៨ ហិកតា ស្មើ ១៤០០ ដើម ដែលកំពុងហុចផលបានល្អគួរសមដូចឆ្នាំមុនៗដែរ។

លោកបន្តថា ខាងសហគមន៍គេមកកុងត្រាតាំងពីចេញផ្កានិងក្តិបមកម្លេះ ចឹងហើយទើបលោកមិនបារម្ភរឿងទីផ្សារនោះទេ ហើយតម្លៃក៏លោកអាចទទួលយកបាន ដោយក្នុង ១ គីឡូក្រាមចន្លោះពី ៣៤០០-៣៨០០រៀល។ លោកថា បើលោកប្រមូល​ផលក្នុងខែប្រាំងបាន ១ គីឡូក្រាមពី ៤០០០ រៀលដល់ ៤៤០០ រៀល។

ក្រៅពីនេះលោកបានលើកទឹកចិត្តដល់កសិករដូចគ្នាឲ្យមានការអត់ធ្មត់នឹងតស៊ូ បើសិនជាខ្វះបច្ចេកទេសណាមួយពាក់ព័ន្ធដំណាំកសិកម្មមៀនប៉ៃលិន លោកនឹងជួយផ្តល់យោបល់គ្រប់ពេលតាមតម្រូវការរបស់បងប្អូន ដើម្បីជាប្រយោជន៍គ្រួសារ ក្នុងការរស់នៅប្រកបដោយជីវភាពល្អប្រសើរតាមរយះរបរកសិកម្មនៅក្នុងស្រុកភូមិ។

ខេត្តបាត់ដំបង ត្រូវបានគេស្គាល់ថា ជាជង្រុកកសិកម្មយ៉ាងសម្បើម ហើយក៏មានផលដំណាំខ្លះក៏ត្រូវបាប្រឈនិងទីផ្សារផង ដែរ ខណះមន្ត្រីជំនាញបានលើកឡើងថា ការប្រឈមនិងទីផ្សារនេះមិនមែនខ្វះនូវទីផ្សារទាំងស្រុងនោះទេ គឺមកពីគុណភាព នៃផលដំណាំនោះថយចុះឬការវេចខ្ចប់នៅមានកម្រិតនៅឡើយ ដែលកត្តាទាំង២នេះធ្វើឲ្យរាំងស្ទះទីផ្សារ។

កន្លងមកអភិបាលខេត្តបាត់ដំបង​បានលើកឡើងជាសាធារណះផងដែរថា ខេត្តបាត់ដំបងដំណាំកសិកម្មសម្បូរបែបណាស់ តែការវេចខ្ចប់នៅមានកម្រិតនៅឡើយ ដែល​ទាម​ទារ​ឲ្យមន្ត្រីជំនាញត្រូវពង្រឹងឲ្យបានប្រសើរឡើង ដើម្បីផលប្រយោជន៍របស់ប្រជាកសិករទូទាំងខេត្តបាត់ដំបង៕

អត្ថបទ៖ សៅ សារិទ្ធ