MV បទថ្មី សុគន្ធ នីសា ធ្វើឱ្យបុគ្គលមួយចំនួននៅផ្ទះលេខ២ កើតទុក្ខមិនសុខចិត្ត ចេញមករិះគន់ព្រាត

រាជិនីចម្រៀងមនោសញ្ចេតនា សុគន្ធ នីសា ទើបតែចេញ MV ចម្រៀងថ្មីរបស់ខ្លួន ដើម្បីជាចូលរួមអបអរឱកាសបុណ្យចូលឆ្នាំប្រពៃណីជាតិខ្មែរដែលនឹងប្រព្រឹត្តធ្វើឆាប់ៗខាងមុខនេះ ដល់ទៅ ២បទ ខណៈបទមួយក្នុងចំណោមបទទាំងពីរ ត្រូវបានម្ចាស់គណនីជាច្រើន ដែលប្រើឈ្មោះជាភាសាថៃ ក៏ដូចជាពលរដ្ឋថៃ បានបញ្ចេញមតិមិនពេញចិត្ត។

ក្នុងនោះ មានខ្លះរិះគន់ទៅចំណងជើងនៃបទ ដោយប្រើប្រាស់ពាក្យ “សង្ក្រាន្ត” និងឈុតប្រពៃណីដែលកំពូលតារាចម្រៀងរូបនេះស្លៀកបង្ហាញក្នុងបទថ្មីរបស់ខ្លួន ចំណងជើង “សង្ក្រាន្តចួបស្នេហ៍” ។

តាមរយៈវីដេអូចម្រៀង ដែលបានផ្សាយលើហ្វេសប៊ុកផេកផ្លូវការរបស់កំពូលតារាចម្រៀងមនោសញ្ចេតនា សុគន្ធ នីសា បុគ្គលជនជាតិថៃមួយចំនួន បានសម្តែងការមិនពេញចិត្តចំពោះពាក្យ សង្ក្រាន្ត ដែលមានចំណងជើងនៃបទចម្រៀងរបស់អ្នកនាង ព្រមទាំងទាញហេតុផលថា ជាកម្មសិទ្ធិនៃជាតិសាសន៍របស់ខ្លួន។

មិនតែប៉ុណ្ណោះ មតិខ្លះ ក៏បង្ហាញការមាក់ងាយអ្នកមានឈាមជ័រជាខ្មែរ និងហ៊ានអះអាងថា តារាចម្រៀងស្រីល្បីឈ្មោះកម្ពុជា កំពុងស្លៀកឈុតរបស់ខ្លួនទៅវិញ។

យ៉ាងណាង ដ្បិតនេះពុំមែនជារឿងថ្មី ដែលអ្នកសិល្បៈរបស់កម្ពុជា រងមរិតរិះគន់មិនសុខចិត្តពីសំណាក់ពលរដ្ឋប្រទេសក្បែរខាងក៏ពិតមែន ប៉ុន្តែមតិប្រតិកម្មពីអ្នកទាំងនោះ ពិតជាធ្វើឱ្យរំខានដល់អារម្មណ៍អ្នកគាំទ្រវិស័យចម្រៀងប្រពៃណីរបស់ខ្មែរ៕