នាយករដ្ឋមន្រ្តីថៃ៖ ​​ពន្ធ​ ៣៦ ភាគរយ របស់ ត្រាំ ​មិនប៉ះពាល់ GDP ថៃ ទេ

នាយករដ្ឋមន្ត្រីថៃ អ្នកស្រី ផែតងតាន ស៊ីណាវ៉ាត់ត្រា នា​ថ្ងៃព្រហស្បតិ៍នេះ បានផ្ដល់​ការ​ធានា​ថាកុំឱ្យ​មាន​ក្ដីបារម្ភ​ចំពោះការដំឡើងពន្ធរបស់សហរដ្ឋអាមេរិក ដោយ​លើកឡើងថា អត្រាពន្ធ ៣៦ ភាគរយ លើទំនិញនាំចូលពីប្រទេសថៃ មិនប៉ះពាល់ដល់ផលិតផលក្នុងស្រុកសរុប (GDP) របស់ថៃទេ ខណៈ​រដ្ឋាភិបាល​បាន​ចេញ​វិធានការដោះស្រាយរួចហើយ។ នេះបើតាម​ការចុះផ្សាយរបស់កាសែត The Nation។

​អ្នកស្រី ផែតងតាន បាន​អះអាងប្រាប់អ្នកសារព័ត៌មានថា​ ​ដំណោះស្រាយទាំងនោះ រួមមានការរៀប​ចំ​កែ​សម្រួល​រចនាសម្ព័ន្ធពន្ធលើទំនិញ​នាំចូល និងការ​បង្កើតក្រុមចរចាជាមួយ​រដ្ឋបាលអាមេរិករបស់​ប្រធានា​ធិបតី ដូណាល់​ ត្រាំ ដែល​​ប្រកប​ដោយ​ទំនុកចិត្ត ​និង​អាច​ពាំនាំមក​នូវ​ផលវិជ្ជមាន​សម្រាប់ប្រទេស​​ថៃ។​ ​

នាយករដ្ឋមន្រ្តីដដែល​បាន​ថ្លែងបន្ថែមយ៉ាងដូច្នេះថា៖ «យើងនឹងមិនធ្វើឱ្យ​ GDP ​ខក​គោលដៅនោះទេ។ ​យើងមានផែនការរឹងមាំ»។

ទោះបីជាយ៉ាងណាក៏ដោយ ​អ្នក​ស្រី​បាន​កត់​សម្គាល់​ថា ​ពន្ធ​ខ្ពស់​​អាច​​ធ្វើ​ឱ្យ​ថៃ​ស្ថិត​ក្នុង​ចំណោម​ប្រទេស​ដែល​រង​ផល​ប៉ះពាល់​ខ្លាំង​បំផុត​។ ដូច្នេះ ទាំងផែនការរយៈពេលខ្លី និងរយៈពេលវែង កំពុងត្រូវបានរៀបចំឡើង​។ អ្នកស្រីនាយករដ្ឋមន្រ្តីដដែល​បញ្ជាក់ថា សម្រាប់​រយៈពេលខ្លី ការចរចានឹងផ្តោតលើការជួយអ្នកនាំចេញ និងកាត់បន្ថយផលប៉ះពាល់ ហើយ​បច្ចុប្បន្ន​ក្រសួង​ហិរញ្ញវត្ថុ និង​ក្រសួង​ពាណិជ្ជកម្ម​ថៃ កំពុង​ធ្វើ​ការ​​លើ​បញ្ហា​នេះ​។

ក្នុងសេចក្ដីថ្លែងការណ៍ដាច់ដោយឡែក ដែលចេញផ្សាយនារសៀលថ្ងៃព្រហស្បតិ៍ដូចគ្នា អ្នកស្រី ផែតងតាន បាន​លើកឡើងថា​៖ «រដ្ឋាភិបាលថៃទទួលស្គាល់ និងយល់ពីភាពចាំបាច់សម្រាប់សហរដ្ឋ​អាមេរិកក្នុងការដោះស្រាយអតុល្យភាពពាណិជ្ជកម្មជាមួយដៃគូពាណិជ្ជកម្មជាច្រើនរបស់ខ្លួន តាមរយៈគោលនយោបាយពាណិជ្ជកម្ម និងពន្ធ​ឆ្លើយតបឱ្យស្មើគ្នា»​។ អ្នកស្រីបាន​បន្តថា៖ «វិធានការទាំងនេះ បានជះឥទ្ធិពលដល់ដៃគូពាណិជ្ជកម្មជាច្រើនរបស់សហរដ្ឋអាមេរិក ហើយវិធីសាស្រ្តរបស់ប្រធានាធិបតី ត្រាំ បង្ហាញពីការផ្លាស់ប្តូរយ៉ាង​ខ្លាំង​ពីរដ្ឋបាលមុនៗ»។

សេចក្ដីថ្លែងការណ៍ដដែល​របស់អ្នកស្រី ផែតងតាន បានបន្តថា ​ពន្ធរបស់រដ្ឋបាល ត្រាំ ​នឹងជះឥទ្ធិពលដោយ​ជៀសមិនរួចដល់ដៃគូពាណិជ្ជកម្មទាំងអស់ ជាពិសេសលើអំណាចទិញរបស់​អ្នកប្រើប្រាស់នៅ​អាមេរិក ដែលអាចប្រឈមនឹង​កំណើន​តម្លៃទំនិញខ្លាំង និង​យ៉ាងឆាប់រហ័ស។​ អ្នកស្រីបាន​បន្តថា៖ «អ្នកនាំចេញរបស់ថៃ គួរតែស្វែងរកទីផ្សារ​​សក្តានុពលថ្មី ដើម្បី​កាត់បន្ថយហានិភ័យពីការពឹងផ្អែកលើទីផ្សារតែមួយ។ រដ្ឋាភិបាលថៃទទួលស្គាល់សារៈសំខាន់នៃបញ្ហានេះ ហើយបានរៀបចំវិធានការដើម្បីជួយ និងកាត់បន្ថយផលប៉ះពាល់លើអ្នកនាំចេញថៃ ដែលមានទីផ្សារសហរដ្ឋអាមេរិក​ចម្បង​»។

គួរគូស​បញ្ជាក់ថា​ ពន្ធឆ្លើយតប​​ឱ្យស្មើគ្នា​របស់​​ ត្រាំ កំណត់គោលដៅ​លើ​ប្រទេស និងតំបន់​​ចំនួន​ ១៨០ ទូទាំងពិភពលោក រួមទាំងថៃ។ ពន្ធមូលដ្ឋាន​ ដែលមានអត្រា​ត្រឹម​ ១០ ភាគរយ នឹង​ចូលជាធរមាន​នៅចុង​សប្ដាហ៍នេះ ខណៈ​ពន្ធ​ដែល​ខ្ពស់ជាង​នេះលើ​ប្រទេសផ្សេង​​ នឹង​ចូលជាធរមាន​នៅថ្ងៃពុធសប្ដាហ៍ក្រោយ។

លោក​ ត្រាំ បាន​អះអាងថា​ កន្លងមក​ ​បណ្ដា​ប្រទេសនានា​បាន​ដាក់ពន្ធលើទំនិញ​អាមេរិកខ្ពស់ជាងអត្រាពន្ធដែល​អាមេរិកដាក់លើពួកគេ ដែល​ជាផ្នែកមួយ​បង្កឱនភាពពាណិជ្ជកម្ម​អាមេរិក​ខ្ពស់។ ឆ្នាំមុន រដ្ឋាភិបាល​ថៃកត់ត្រាពីអតិរេកពាណិជ្ជកម្ម ៣៥,៤ ប៊ីលាន​ដុល្លារ ប៉ុន្តែរដ្ឋបាល ត្រាំ​ ដាក់តួលេខនេះដល់ ៤៥ ប៊ីលាន​ដុល្លារ។

​បើតាម​ការអះអាង​របស់រដ្ឋបាល ត្រាំ ថៃបាន​ដាក់ពន្ធលើទំនិញ​អាមេរិកជាមធ្យម ៧២ ភាគរយ។ ប៉ុន្តែអ្នកស្រី ផងតងតាន ថា ជាក់ស្ដែងពន្ធថៃមាន​ត្រឹមតែ ៩ ភាគរយ ប៉ុណ្ណោះជាមធ្យម ហើយថា តួលេខរបស់រដ្ឋបាល​ ត្រាំ គឺផ្អែកលើវិធីសាស្រ្តគណនារបស់រដ្ឋបាល៕