រាយ​​ខ្សែភ្លើង​ឆក់កណ្ដុរ តែ​បែរជា​ឆក់មនុស្សស្លាប់ទៅវិញ​

បុរស​ពីរនាក់​ឪពុក​នឹងកូន ត្រូវ​បានកម្លាំង​នគរបាល​ស្រុក​បវេល​ធ្វើការ​ឃាត់ខ្លួនកសាង​សំណុំរឿង​បញ្ជូន​ចាត់ការ​តាម​និតិវិធីច្បាប់ បន្ទាប់​ពីរាយ​ខ្សែភ្លើង​ឆក់យកសត្វកណ្ដុរ បណ្ដាលឲ្យឆក់មនុស្ស​ម្នាក់​ស្លាប់​ កាលពី​វេលា​ម៉ោង​រំលង​អា​ធ្រាត្រឈានចូលថ្ងៃទី​១៧ ​ខែ​កុម្ភៈ ​ឆ្នាំ​២០២១​ ត្រង់ចំណុច​ភូមិ​ម៉ាក់ឃ្លឿ​ ឃុំ​ព្រៃ​ខ្ពស់​ ស្រុក​បវេ​ល​ខេត្តបាត់ដំបង​។

លោក​វរសេនីយ៍​ឯក​ សុខ​ សារិន​ អធិការនគរបាល​ស្រុកបវេល​ បាន​ប្រាប់​ឲ្យ​ដឹងថា​ ជនរងគ្រោះ​ដែលត្រូវខ្សែភ្លើងឆក់​ស្លាប់​មានឈ្មោះ ​ឡើយ លួយ​ ភេទ​ប្រុស​អាយុ​៣៣​ឆ្នាំ មាន​ទីលំនៅ​ក្នុងភូមិ​ឃុំ​កន្លែងកើតហេតុ។ ​ចំណែក​ម្ចាស់​ឧបករណ៍​ខ្សែ​ភ្លើងឆក់​សត្វ​កណ្តុរ​ រាយ​ដោយ​ឪពុក​កូន​២​នាក់​មាន​ឈ្មោះ ​គុណ ឃួន ​ភេទ​ប្រុស​អាយុ៥៨​ឆ្នាំ(ឪពុក​)​និង​កូន​ឈ្មោះ ឃួន ចំណាប់​ ភេទ​ប្រុស​អាយុ​២៩​ឆ្នាំ​រស់នៅ​ភូមិ​ឃុំ​កើតហេតុ។

ប្រភពបានឲ្យដឹងថា ​មុនពេល​មានករណីឆក់ស្លាប់នេះ ​ជនរងគ្រោះបាន​វិលត្រឡប់​មកពី​ដើរលេង​ហើយក៏​​ដើរទាក់ប៉ះ​នឹង​ខ្សែភ្លើង​ដែល​គេរាយ​ដាក់យកសត្វកណ្តុរ​ពេលយប់​តែម្តង​។​

​បច្ចុប្បន្ន​ជនបង្ក​ហេតុ​ត្រូវបាន​កម្លាំង​សមត្ថ​កិច្ចនាំ​ខ្លួន​មក​សាកសួរ និង​កសាង​សំណុំរឿង​ដើម្បី​បញ្ចូន​បន្ត​តាម​និតិ​វិធី​៕

អត្ថបទ ៖ ​សៅ សារិទ្ធ​