Connect with us

ព័ត៌មានជាតិ

លុបបំបាត់ការិយាធិបតេយ្យ​​ តើ​ប្រព័ន្ធបញ្ជរតែមួយជាតិមាន​ប្រវត្តិ​បង្កើត​ឡើង​យ៉ាងណា?

បានផុស

នៅ

ការអភិវឌ្ឍប្រព័ន្ធបញ្ជរតែមួយជាតិត្រូវបានផ្តួចផ្តើមបង្កើត​ដោយអនុលោមតាមយុទ្ធសាស្ត្រ និងគោល​នយោបាយ​របស់រាជរដ្ឋាភិបាល​ស្តីពីកិច្ចសម្រួលពាណិជ្ជកម្ម និង​កិច្ចព្រមព្រៀង​ស្តីពីការ​បង្កើតនិង​អនុវត្ត បញ្ជរតែមួយអាស៊ាន ពិធីសារស្តីពីការបង្កើតនិង​អនុវត្តបញ្ជរតែមួយ​អាស៊ាន ពិធី​សារ​ស្តីពីក្របខណ្ឌច្បាប់ សម្រាប់អនុវត្តបញ្ជរតែមួយអាស៊ាន និងកិច្ចព្រមព្រៀង​ស្ដីពីកិច្ចសម្រួល​ពាណិជ្ជកម្ម​របស់អង្គការពាណិជ្ជកម្ម ពិភពលោក ដែលកម្ពុជា​បានអនុម័តយល់ព្រម​ជាបន្តបន្ទាប់​កន្លង​មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុលោមតាមគោលនយោបាយ និងកិច្ចព្រមព្រៀងនានាដូចខាងលើ គណៈកម្មាធិការដឹកនាំ​គម្រោង​បញ្ជរតែមួយជាតិ ត្រូវបានបង្កើតឡើងកាលពីឆ្នាំ២០០៨ ពេលនោះមាន​កម្រិតត្រឹម​ប្រកាស​របស់​ក្រសួង​សេដ្ឋកិច្ច និងហិរញ្ញវត្ថុ ដែលដឹកនាំដោយ​​អគ្គនាយកនៃអគ្គនាយកដ្ឋានគយ​និងរដ្ឋាករ​កម្ពុជា។

ដោយយល់ថា ការអនុវត្តគម្រោងនេះ​មានវិសាលភាពធំ​ទូលាយគ្របដណ្តប់​ដល់​ក្រសួង-ស្ថាប័ន​ជំនាញផ្សេងទៀត ក្រសួង​សេដ្ឋកិច្ច និងហិរញ្ញវត្ថុ ក៏បានគោរពស្នើសុំ​សម្ដេច​អគ្គមហាសេនាបតី​តេជោ ហ៊ុន សែន អតីតនាយករដ្ឋមន្ត្រី​នៃព្រះរាជាណាចក្រកម្ពុជា និងទទួល​បាន​ការសម្រេច​អនុញ្ញាតិ​ដ៍ខ្ពង់ខ្ពស់ ឱ្យកែ​សម្រួល​គណៈកម្មាធិការដឹកនាំគម្រោងបញ្ជរ​តែមួយជាតិ​នេះមកជា​កម្រិតអនុក្រឹត្យវិញ ដែលដឹកនាំ​ដោយរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងមានសមាសភាព​តំណាងមកពីគ្រប់ក្រសួងស្ថាប័នពាក់ព័ន្ធ និងវិស័យ​ឯកជន ដូចមានក្នុងអនុក្រឹត្យលេខ ២៥ អនក្រ.បក ចុះថ្ងៃទី១១ ខែមីនា ឆ្នាំ២០១៥ ដើម្បីគ្រប់គ្រងនិងដឹកនាំការអភិវឌ្ឍ និង​អនុវត្ត​គម្រោង​បញ្ជរតែមួយជាតិ។

ចំណុះឱ្យគណៈកម្មាធិការ​ដឹកនាំគម្រោង​បញ្ជរតែមួយជាតិ (គ.ដ.ប.ជ) មាន​ក្រុមការងារ​ចំនួន ២ រួមមាន ក្រុមផ្តល់​ប្រឹក្សាផ្នែកច្បាប់ និងគោលនយោបាយគម្រោងបញ្ជរតែមួយជាតិ (ក.ច.ប.ជ) និង​ក្រុម​អនុវត្ត​គម្រោងបញ្ឈរតែមួយ​ជាតិ ( ក.អ. ប.ជ) ព្រមទាំងមានលេខាធិការដ្ឋាន (ល.គ.ប.ជ) នៅ​អគ្គនាយកដ្ឋានគយ​និងរដ្ឋាករកម្ពុជា។

ជាសាវតាតាម​ការណែនាំ​របស់ គ.ដ.ប.ជ ដែល​ដឹកនាំ​ដោយ​អគ្គនាយក​គយ ក្រុមការងារ​អគ្គនាយកដ្ឋាន​គយ​និងរដ្ឋាករ (អគរ) បាន​សហការ​ជាមួយ​ក្រុមហ៊ុន Project Management Group ក្នុង​គម្រោង Trade Facilitation Facility (TFF) ក្រោមជំនួយធនាគារ​ពិភពលោក បានកសាងនូវ​ឯកសារផែនការ​លម្អិត​សម្រាប់ការអភិវឌ្ឍប្រព័ន្ធបញ្ជរតែ​មួយជាតិ (Blueprint) ដែលមានការវាយតម្លៃ​លម្អិតអំពី​តម្រូវការ​ហេដ្ឋារចនាសម្ព័ន្ធ​រូបវន្ត អរូបវន្ត ព្រមទាំងគ្រោងចំណាយថវិកាប្រមាណ ១៧ លាន​ដុល្លារ​អាម៉េរិក សម្រាប់​គម្រោង​ទាំងមូល។

យោងតាមឯកសារគោលនេះ គ.ដ.ប.ជ បានណែនាំ​ដល់ ក.អ.ប.ជ ពិសេស​ក្រុមការងារ អគរ រៀបចំជា​ផែនការជាក់លាក់ សម្រាប់ការផ្តួចផ្តើមអភិវឌ្ឍន៍ប្រព័ន្ធ ដោយបានប្រកាន់​យកអភិក្រម​ជា​ដំណាក់កាលនិង​ក្បិតក្បៀត​ថវិកា ដែលសរុបថវិកាចំណាយ​ផ្នែកទុន (Software Development) ក្នុង​រយៈពេល ៧ ឆ្នាំ (២០១៨ – ២០២៤) អស់​ប្រមាណ ៣,៤០០,៧៦០ ដុល្លារអាម៉េរិក ក្នុងនោះដំណាក់កាល​ទី១ ប្រើប្រាស់ថវិកា​ប្រមាណ ១០០,០០០ ដុល្លារ​អាមេរិក ជាជំនួយរបស់​គម្រោង US ASEAN Connectivity through Trade and Investment Project (US-ACTI) តាមរយៈ​លេខាធិការដ្ឋាន​អាស៊ាន ដំណាក់កាលទី២ ប្រើប្រាស់​ថវិកាជាតិ​ប្រមាណ ២,៨០៥,៧៦០ ដុល្លារអាម៉េរិក, និង​ដំណាក់កាលទី៣ ប្រើប្រាស់ថវិកា​ជាតិប្រមាណ ៤៩៥,០០០ ដុល្លារអាម៉េរិក។

១. ការអភិវឌ្ឍនិងអនុវត្តគម្រោងបញ្ជរតែមួយជាតិ

ការអភិវឌ្ឍគម្រោងបញ្ជរតែមួយជាតិបែកចែកជា ៣ ដំណាក់កាល។

គម្រោង​បញ្ជរ​តែមួយជាតិ​ដំណាក់កាលទី១៖ ក្រុមការងារ​អនុវត្ត​គម្រោង​បញ្ជរ​តែមួយ​ជាតិ​ បាន​ជួប​ប្រជុំ​ជាបន្តបន្ទាប់​ជាមួយ​​ដៃគូ​អភិវឌ្ឍន៍​មាន​ជាអាទិ៍ ធនាគារពិភពលោក ធនាគារអភិវឌ្ឍន៍​អាស៊ី សហភាពអឺរ៉ុប US-Asian Connectivity through Trade and Investment Project (US-ACTI) និង​ទីភ្នាក់ងារសហប្រតិបត្តិការជប៉ុន (JICA) ដើម្បី​ស្វែងរកប្រភព​ថវិកា​សម្រាប់ការអភិវឌ្ឍន៍​ប្រព័ន្ធបញ្ជរតែមួយជាតិ។

ជាលទ្ធផល គម្រោងបញ្ជរតែមួយជាតិដំណាក់កាលទី១ ទទួល​បាន​ជំនួយ​បច្ចេកទេសគិតជា​ថវិកា​ប្រមាណ ១០០,០០០ ដុល្លា​រអាម៉េរិក​ពីគម្រោង US-ACTI ចំណាយ​ជួល​ក្រុមហ៊ុន vCargo Cloud Pte Ltd (VCC) មកសហការ​ ដើម្បីរៀបចំ​ការ​តភ្ជាប់រវាង​ប្រព័ន្ធ​ស្វ័យប្រវត្តិកម្ម​ទិន្នន័យ​គយ (អាស៊ីគូដា) និងប្រព័ន្ធស្វ័យប្រវត្តិកម្មវិញ្ញាបនបត្រ​បញ្ជាក់ដើមកំណើត​​​ទំនិញ​របស់​ក្រសួងពាណិជ្ជកម្ម សម្រាប់ការត្រៀមភ្ជាប់ទៅប្រព័ន្ធបញ្ចរតែមួយអាស៊ាន​ ដើម្បីទទួលនិងបញ្ចូន​ឯកសារ​វិញ្ញាបនបត្រ​បញ្ជាក់ប្រភពដើមកំណើត​ទំនិញ (e-ATIGA Form D) ក្នុងទម្រង់អេឡិចត្រូនិក។

គម្រោងបញ្ជរតែមួយជាតិដំណាក់កាលទី១ មានរយៈពេល ១៥ ខែ ដោយបានចាប់ផ្តើមអភិវឌ្ឍ​នៅខែ តុលា ឆ្នាំ២០១៦ ដល់ ខែធ្នូ ឆ្នាំ២០១៧។

គម្រោងបញ្ជរតែមួយជាតិ​ដំណាក់កាលទី២៖ ការរៀបចំ​គម្រោង​បញ្ជរ​តែមួយជាតិ​ដំណាក់កាលទី២ មាន​រយៈពេល ១៥ ខែ ដោយបានចាប់ផ្តើម​អភិវឌ្ឍនៅថ្ងៃទី១ ខែឧសភា ឆ្នាំ២០១៨ ដល់ខែមិថុនា ឆ្នាំ២០១៩ ដោយប្រើប្រាស់ថវិកាជាតិ​ប្រមាណ ២,៨០៥,៧៦០ ដុល្លារអាម៉េរិក និង​បន្តជ្រើសរើស​ក្រុមហ៊ុន VCC ជាអ្នកអភិវឌ្ឍប្រព័ន្ធ។

គម្រោងបញ្ជរតែមួយជាតិដំណាក់កាលទី២ មានមុខងារ​សម្រាប់ស្នើសុំ​និងផ្តល់​អាជ្ញាប័ណ្ណ លិខិតអនុញ្ញាត វិញ្ញាបនបត្រ និងឯកសារផ្សេងៗ (LPCO) ក្នុង​ទម្រង់​អេឡិចត្រូនិក​នៅក្នុងប្រព័ន្ធ​បញ្ជរ​តែមួយ​ជាតិសម្រាប់ទំនិញនាំចេញ-នាំចូលស្រប​តាម​ខ្លឹមសារ​នៃអនុក្រឹត្យស្តី​ពីការដាក់ឱ្យប្រើប្រាស់​បញ្ជីទំនិញ​ហាមឃាត់ និងទំនិញជាប់កម្រិតកំណត់ ទំនិញ​ដែលទទួលបានការលើកលែងពន្ធ​និងអាករ ការព្យួរពន្ធនិងអាករ និងការដាក់ពន្ធ​និងអាករ​ជាបន្ទុករបស់​រដ្ឋ​តាមច្បាប់និងបទប្បញ្ញត្តិពាក់ព័ន្ធជាធរមាន។

ដំណាក់កាលទី២ នេះ មានការចូលរួម​ពីក្រសួង-ស្ថាប័ន ​ដែលមានប្រតិបត្តិការច្រើនក្នុងការចេញ LPCO ក្នុង​នោះមាន អគ្គនាយកដ្ឋានគយនិងរដ្ឋាករកម្ពុជា ក្រសួងពាណិជ្ជកម្ម ក្រសួងសុខាភិបាល ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ក្រុមប្រឹក្សាអភិវឌ្ឍន៍កម្ពុជា និង​ក្រសួង​កសិកម្ម រុក្ខាប្រមាញ់ និងនេសាទដែលមានអង្គភាពចំនួន ៣ គឺ អគ្គនាយកដ្ឋាន​សុខភាពសត្វ​និងផលិតកម្ម​សត្វ អគ្គនាយកដ្ឋានកសិកម្ម និងរដ្ឋបាលជលផល។

ទន្ទឹមនេះ កម្ពុជាបាន​ប្រកាស​អំពីការតភ្ជាប់​ប្រព័ន្ធស្វ័យប្រវត្តិកម្មទិន្នន័យគយ (អាស៊ីគូដា) និង​ប្រព័ន្ធ​ស្វ័យប្រវត្តិកម្ម​វិញ្ញាបនបត្របញ្ជាក់ដើមកំណើតទំនិញ​របស់​ក្រសួងពាណិជ្ជកម្ម ទៅប្រព័ន្ធបញ្ចរ​តែមួយ​អាស៊ាន ដើម្បីទទួលនិងបញ្ជូនឯកសារវិញ្ញាបនបត្របញ្ជាក់ប្រភពដើមកំណើតទំនិញ (e-ATIGA Form D) និង​ប្រតិវេទន៍គយ​អាស៊ាន​ក្នុងទម្រង់​អេឡិចត្រូនិក ដែលកម្ពុជាជាប្រទេសទី ៧ ដែល​បានប្រើប្រាស់​ប្រព័ន្ធបញ្ជរតែមួយអាស៊ាន។

ការអភិវឌ្ឍគម្រោងបញ្ជរ​តែមួយជាតិ​ត្រូវបានធ្វើឡើងដោយ ក.អ.ប.ជ និង ល.គ.ប.ជ ដែលដឹកនាំ​ដោយ អគរ សហការ​ជាមួយក្រុមហ៊ុន VCC ចុះសិក្សាអំពីរំហូរនីតិវិធីផ្ទៃក្នុង (As-Is) តាមក្រសួង-ស្ថាប័ន​នីមួយៗ រួច​ចាប់ផ្ដើមអភិវឌ្ឍ​ប្រព័ន្ធ​ស្របតាមឯកសារ​យោង​ និង​ធាតុចូល​ពី​មន្ត្រីជំនាញ​ដោយ​ផ្អែក​លើ​គោលការណ៍​អនុវត្តរបស់ប្រព័ន្ធគឺការដាក់ស្នើដោយវិស័យឯកជន (Request) ផ្ទៀងផ្ទាត់ (Verify) ទូទាត់ (Payment) ពិនិត្យ (Review) និងអនុម័ត (Approve) ដោយ​មន្ត្រី។

បន្ទាប់ពីអភិវឌ្ឍប្រព័ន្ធរួច ក្រុមការងារអនុវត្តគម្រោង​បញ្ជរ​តែមួយជាតិ រួមជាមួយ​និងក្រុមហ៊ុន VCC បាន​អញ្ជើញមន្ត្រីជំនាញ​តាមក្រសួងជំនាញពាក់ព័ន្ធ មកធ្វើតេស្ត​សាកល្បងមុខងារប្រព័ន្ធ (User Acceptance Testing-UAT) និងផ្តល់​ធាតុចូលបន្ថែម។ ក្រោយពីក្រសួង- ស្ថាប័ននីមួយៗបានឯកភាព​អំពីរំហូរ​នីតិវិធីក្នុងប្រព័ន្ធ (To-be) រួច សាមីក្រសួង-ស្ថាប័ន បានចាត់តាំង​មន្រ្តីជំនាញ​និងថ្នាក់ដឹកនាំ​ឱ្យទទួល​បន្ទុកភារកិច្ចក្នុង​ប្រព័ន្ធ​បញ្ជរតែមួយជាតិ។ ក្រសួង-ស្ថាប័ន​ បានរៀបចំ​នីតិវិធី​លម្អិត (SOP) អំពី​ការប្រើប្រាស់​ប្រព័ន្ធរៀបចំសិក្ខាសាលា​បណ្តុះបណ្តាល ព្រមទាំង​សេចក្តីជូនដំណឹង ផ្សព្វផ្សាយ​ជាផ្លូវការឱ្យបាន​ទូលំទូលាយដល់​វិស័យឯកជន។

លទ្ធផលនៃការចូលរួមអនុវត្តគម្រោងបញ្ជរតែមួយជាតិដំណាក់កាលទី២ របស់ក្រសួង-ស្ថាប័នមានដូចខាងក្រោម៖

-អគ្គនាយកដ្ឋានគយ​និងរដ្ឋាករកម្ពុជា ក្រសួងពាណិជ្ជកម្ម ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា​និង​នវានុវត្តន៍ បានចូលរួមអនុវត្តពេញលេញ
-ក្រសួងសុខាភិបាល និងក្រុមប្រឹក្សាអភិវឌ្ឍន៍កម្ពុជា ពុំទាន់បានចូលរួមអនុវត្តពេញលេញ ដោយ​នៅ​បន្ត​ចេញ LPCO តាមប្រព័ន្ធបញ្ជរតែមួយជាតិ និងតាមទម្រង់ក្រដាស
-ក្រសួងកសិកម្ម រុក្ខាប្រមាញ់និងនេសាទ ពុំមានវឌ្ឍនភាព​ឡើយ ដោយអង្គភាព​ដែលត្រូវ​អនុវត្ត​គម្រោង​ពុំបាន​ផ្តល់កិច្ច​សហការពេញលេញ ដើម្បីបញ្ចប់នីតិវិធីអភិវឌ្ឍមុខងារចេញ LPCO ក្នុង​ប្រព័ន្ធ​បញ្ជរ​តែមួយ​ជាតិ ទោះបីជា គ.ដ.ប.ជ បានធ្វើលិខិតជំរុញ​ និង​ទទូចឱ្យក្រសួង​កសិកម្ម រុក្ខាប្រមាញ់ និងនេសាទ ចូលរួមគម្រោងបញ្ជរតែមួយជាតិចំនួន ២ លើកក៏ដោយ។ មួយវិញទៀត តាមការ​ស្នើសុំរបស់សាមីក្រសួង ល.គ.ប.ជ សហការជាមួយ​ក្រុមហ៊ុន VCC ក៏បានផ្តល់ការ​បណ្តុះបណ្តាល​ដោយផ្ទាល់​ និងតាមប្រព័ន្ធអនឡាញជូនមន្ត្រីនិងវិស័យឯកជនចំនួន ០៤ លើក ដែល​មាន​សិក្ខាកាមចូលរួមចំនួន ២៣២ រូប ហើយសាមីក្រសួងបានរៀបចំសិក្ខាសាលា​ស្តីពី​ការ​ផ្សព្វផ្សាយ និងដាក់ឱ្យអនុវត្តប្រព័ន្ធបញ្ជរ​តែ​មួយជាតិ​ក្រោមអធិបតីភាព​លោក វេង សាខុន អតីត​រដ្ឋមន្ត្រី​ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៦ ខែឧសភា ឆ្នាំ២០២២។

គម្រោងបញ្ជរតែមួយជាតិដំណាក់កាលទី៣៖ ការរៀបចំគម្រោងបញ្ជរតែមួយជាតិដំណាក់កាលទី៣ បាន​ចាប់ផ្តើមអភិវឌ្ឍនៅថ្ងៃទី៣ ខែ​មករា ឆ្នាំ២០២៣ ដល់ថ្ងៃទី៣១ ខែធ្នូ ឆ្នាំ២០២៣ ដែល​មាន​រយៈពេល ១២ ខែ និងត្រូវបានពន្យាររហូតដល់​ថ្ងៃទី៣០ ខែ​មេសា ឆ្នាំ២០២៤ ប្រើប្រាស់​ថវិកាជាតិ​ប្រមាណ ៤៩៥,០០០ ដុល្លារអាម៉េរិក និងជ្រើសរើសក្រុមហ៊ុន GUUD (International) Pte Ltd (អតីត​ក្រុមហ៊ុន vCargo Cloud Pte Ltd) ដើម្បីបន្តអភិវឌ្ឍប្រព័ន្ធ។

ការអភិវឌ្ឍប្រព័ន្ធ ក្នុងគោលបំណងពង្រីកវិសាលភាពបន្ថែមឱ្យគ្របដណ្ដប់​គ្រប់ក្រសួង-ស្ថាប័ន ​ដែលមាន​សមត្ថកិច្ចពាក់ព័ន្ធនឹងការចេញ (LPCO សម្រាប់ទំនិញនាំចេញ-នាំចូល ដែលក្នុង​នោះ​មាន ក្រសួងបរិស្ថាន ក្រសួង​វប្បធម៌និងវិចិត្រសិល្បៈ ក្រសួងរ៉ែនិងថាមពល ក្រសួង​ប្រៃសណីយ៍​និងទូរគមនាគមន៍ ក្រសួងមហាផ្ទៃ ក្រសួងការពារជាតិ ក្រសួងការបរទេស​និងសហប្រតិបត្តិការ​អន្តរជាតិ ធនាគារជាតិនៃកម្ពុជា អគ្គនាយកដ្ឋានសហប្រតិបត្តិការអន្តរជាតិ ​និងគ្រប់គ្រងបំណុល​នៃក្រសួងសេដ្ឋកិច្ច​និងហិរញ្ញវត្ថុ គណៈកម្មការគ្រប់គ្រងល្បែងពាណិជ្ជកម្ម​កម្ពុជា និង​ក្រសួងកសិកម្ម រុក្ខាប្រមាញ់ និងនេសាទ ដែលបន្តអនុវត្តពីគម្រោងបញ្ជរតែមួយជាតិដំណាក់កាលទី២ និង​បន្ថែម​អង្គភាព​អនុវត្តចំនួន ២។

គម្រោងបញ្ជរតែមួយជាតិដំណាក់កាលទី៣ បានបន្ថែមមុខងារ​ចំនួន ៤ នៅក្នុង​ប្រព័ន្ធបញ្ជរ​តែមួយ​ជាតិ ដូចជា មុខងារ​គ្រប់គ្រងហានិភ័យ មុខងារ​និហិតដ្ឋាន​ឯកសាពាណិជ្ជកម្ម មុខងារ​ប្រតិបត្តិករ​សេដ្ឋកិច្ច​បានទទួលការអនុញ្ញាត និងមុខងារគ្រប់គ្រងគណនីប្រើប្រាស់តែមួយ។

លទ្ធផលនៃការចូលរួមអនុវត្តគម្រោងបញ្ជរតែមួយជាតិដំណាក់កាលទី៣ របស់ក្រសួង- សា្ថប័ន មានដូចខាងក្រោម៖

ក្រសួង-ស្ថាប័នចំនួន ៦ ដែលបានបញ្ចប់ការអភិវឌ្ឍមុខងារប្រព័ន្ធ បានធ្វើតេស្ត UAT ព្រមទាំង​បាន​បណ្តុះបណ្តាល​ជូន​មន្ត្រី​ជំនាញ​និង​វិស័យ​ឯកជន ត្រូវ​បាន​ដាក់​ឱ្យ​អនុវត្ត​សាកល្បង​ប្រព័ន្ធ​បញ្ជរ​តែ​មួយ​ជាតិ​ដំណាក់កាល​ទី ៣ នៅថ្ងៃទី២៥ ខែ​ធ្នូ ឆ្នាំ២០២៣។ គិតត្រឹមដំណាច់​ខែ​កុម្ភៈ ឆ្នាំ២០២៤ ក្រសួងបរិស្ថាន​ឈានមុខក្នុងការប្រើប្រាស់ប្រព័ន្ធ។

ជាមួយ​គ្នា​នេះ ក្រសួងកសិកម្ម រុក្ខាប្រមាញ់ និងនេសាទបាន​ចូលរួមអនុវត្ត តែ​ពុំទាន់ពេញលេញដោយ​បាន​ចេញ LPCO តាមប្រព័ន្ធបញ្ជរតែមួយ​ជាតិ និងតាមទម្រង់ក្រដាសស្របគ្នា។

ដោយឡែក ក្រសួងរ៉ែនិងថាមពល ធនាគារជាតិនៃកម្ពុជា ក្រសួងប្រៃសណីយ៍ និងទូរគមនាគមន៍ និង​ក្រសួងវប្បធម៌និងវិចិត្រសិល្បៈ ពុំទាន់បានចូលរួមប្រើប្រាស់ប្រព័ន្ធនៅឡើយ ដោយ​ហេតុថា​ពុំទាន់​បញ្ចប់​ការរៀបចំនីតិវិធីផ្ទៃក្នុង​សម្រាប់ការអនុវត្ត (SOP) ។

ក្រសួង-ស្ថាប័នចំនួន ២ រួមមាន ក្រសួងការបរទេស​និងសហប្រតិបត្តិការ​អន្តរជាតិ និង​អគ្គនាយកដ្ឋាន​សហប្រតិបត្តិការអន្តរជាតិ​និងគ្រប់គ្រងបំណុល នៃក្រសួងសេដ្ឋកិច្ចនិងហិរញ្ញវត្ថុ រង់ចាំ​ការសម្រេច​ពីថ្នាក់ដឹកនាំ លើសេចក្តីព្រាងរំហូរនីតិវិធី​ក្នុងប្រព័ន្ធដែល ល.គ.ប.ជ បានរៀបចំជូន។

ក្រសួងចំនួន ២ រួមមាន ក្រសួងការពារជាតិ និងក្រសួងមហាផ្ទៃ រង់ចាំការសម្រេច​ពីថ្នាក់ដឹកនាំ​ក្នុង​ការចូលរួមអនុវត្ត។

គណៈកម្មការគ្រប់គ្រងល្បែងពាណិជ្ជកម្មកម្ពុជា ពុំទាន់មានបទប្បញ្ញត្តិគាំទ្រសម្រាប់ការចូលរួមអនុវត្ត​គម្រោង​បញ្ចរ​តែមួយជាតិ។

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួង​សេដ្ឋកិច្ច​និង​ហិរញ្ញវត្ថុ​ថ្លែង​នៅក្នុង​ពិធីប្រកាស​ដាក់​ឲ្យ​អនុវត្ត​ជា​ផ្លូវការ​ប្រព័ន្ធ​បញ្ជរ​តែ​មួយ​ជាតិ​កាល​ពី​ ៧ ខែ​ឧសភា ឆ្នាំ ២០២៤​ ថា ការដាក់ឱ្យអនុវត្ត​ប្រព័ន្ធបញ្ជរ​តែ​មួយ​ជាតិ នឹង​នាំមកនូវផលប្រយោជន៍ជាច្រើនទាំង​សម្រាប់វិស័យសាធារណៈ និងវិស័យឯកជន។

សម្រាប់​វិស័យ​សាធារណៈ ប្រព័ន្ធ​បញ្ជរ​តែ​មួយជាតិ​មាន​តួនាទីសំខាន់​ក្នុងការ​សម្របសម្រួល និងការ​ពង្រឹង​កិច្ចសហការ​រវាងក្រសួង-ស្ថាប័នជំនាញ​ពាក់ព័ន្ធ សំដៅបង្កើនប្រសិទ្ធភាព និងស័ក្ដិសិទ្ធភាព​បន្ថែម​ទៀត​នូវកិច្ចសម្រួល​ពាណិជ្ជកម្ម, ជាពិសេសសម្រួល​ដល់ការ​បំពេញ​ឱ្យបាន​ឆាប់នូវបែបបបទនាំចេញ-នាំចូល​ទំនិញ ស្របតាមយុទ្ធសាស្ត្រនិង​គោលនយោបាយរបស់​រាជរដ្ឋាភិបាល។ ជារួម, ប្រព័ន្ធនេះបាន​ផ្តល់អត្ថប្រយោជន៍សំខាន់ដល់ក្រសួង-ស្ថាប័ន​ជំនាញ​ពាក់ព័ន្ធ ឱ្យទទួលបាននូវព័ត៌មាន និង​ទិន្នន័យ​ត្រឹមត្រូវនិង​ទាន់ពេល សម្រាប់​ធ្វើការវិភាគ​វាយតម្លៃ​ហានិភ័យ និងសម្រាប់​ប្រើប្រាស់តាមតម្រូវការផ្សេងទៀត។

ដោយឡែក, វិស័យឯកជនក៏នឹងទទួលបានអត្ថប្រយោជន៍ជាច្រើនផងដែរដូចជា ចំណេញពេលព្រម​ទាំង​ការកាត់បន្ថយ​ចំណាយ និង​ជាពិសេស​ការកាត់បន្ថយ​ការិយាធិបតេយ្យ​ក្នុង​ការ​រត់​ការ​ឆ្លង​កាត់​ពី​ក្រសួង-ស្ថាប័ន​មាន​សមត្ថកិច្ច​មួយ​ទៅ​មួយ​ទៀត ពាក់ព័ន្ធ​នឹងការស្នើសុំ​អាជ្ញាបណ្ណ, លិខិត​អនុញ្ញាត, វិញ្ញាបនបត្រ, និង​ឯកសារ​តម្រូវផ្សេងៗ​សម្រាប់​ការ​នាំចេញ-នាំចូល​ទំនិញ។

លើស​ពីនេះ ប្រតិបត្តិករនៃវិស័យឯកជន​ក៏អាចប្រើប្រាស់ឡើងវិញ​នូវ​ទិន្នន័យ​ក្នុង​ប្រព័ន្ធ​សម្រាប់​ជា​ប្រយោជន៍​ក្នុងការគ្រប់គ្រងទិន្នន័យរបស់ខ្លួនឱ្យបានទាន់ពេល, មាន​សង្គតិភាព និងមានភាពច្បាស់លាស់​ផង​ដែរ។

នា​ឱកាស​នោះ​ដែរ សម្តេចធិបតី ហ៊ុន ម៉ាណែត នាយករដ្ឋមន្រ្តី​កម្ពុជា​ក៏​បាន​ស្នើវិស័យឯកជន​ចូលរួម​ប្រើប្រាស់​និង​ទាញយកអត្ថប្រយោជន៍ពីប្រព័ន្ធបញ្ជរតែមួយជាតិដោយជួយគិតគូរ ជួយធ្វើ ជួយ​ទទួលខុសត្រូវ​។

សម្តេចធិបតី ហ៊ុន ម៉ាណែត ស្នើវិស័យឯកជនចូលរួមប្រើប្រាស់ និងទាញយកអត្ថប្រយោជន៍​ឱ្យ​បាន​ជាអតិបរមាពីប្រព័ន្ធបញ្ជរតែមួយជាតិនេះ និង ចូលរួមផ្តល់មតិយោបល់ សម្រាប់​ការកែលម្អ​ឱ្យកាន់​តែ​ប្រសើរ។

ការស្នើបែបនេះ​របស់​សម្តេចធិបតី ហ៊ុន ម៉ាណែត បានធ្វើឡើង​ក្នុងឱកាស​ដែល​សម្តេច​បាន​អញ្ជើញ​ជា​អធិបតី​ប្រកាស​ដាក់ឱ្យអនុវត្ត​ជាផ្លូវការ «ប្រព័ន្ធបញ្ជរ​តែមួយជាតិ» កាលពី​ថ្ងៃទី៧ ខែ​ឧសភា ឆ្នាំ​២០២៤។

ជាមួយគ្នានេះដែរ សម្តេចធិបតី​ក៏​បានណែនាំដល់​គណៈកម្មាធិការ​ដឹកនាំ​គម្រោង​បញ្ជរ​តែ​មួយ​ជាតិត្រូវ​តាមដាន និង​វាយតម្លៃការអនុវត្ត ព្រមទាំង​បន្តកែលម្អនិងពង្រីក​មុខងារ​ប្រព័ន្ធ ក៏​ដូចជា​ពង្រីក​ការ​តភ្ជាប់​ទៅប្រព័ន្ធបច្ចេកវិទ្យាព័ត៌មានផ្សេងទៀត ដែល​ពាក់ព័ន្ធ​ការ​ធ្វើ​ធុរកិច្ចនិង​ពាណិជ្ជកម្ម ដើម្បី​បន្ត​ឆ្លើយតប​តម្រូវការជាក់ស្ដែងរបស់ធុរជន។

សម្តេច​បន្ត​ថា «ប្រព័ន្ធបញ្ជរតែមួយជាតិ» គឺជាសមិទ្ធិផលថ្មីមួយទៀតរបស់រាជរដ្ឋាភិបាល ក្នុង​កិច្ច​ប្រឹងប្រែង​ធ្វើឱ្យប្រសើរ​ឡើង​នូវបរិយាកាសធុរកិច្ច ជំរុញការធ្វើពាណិជ្ជកម្ម និងលើក​កម្ពស់កំណើន​សេដ្ឋកិច្ច​នៅ​កម្ពុជា៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

សេចក្ដីជូនដំណឹង២២ នាទី មុន

កម្មការិនីរោងចក្រកាត់ដេរម្នាក់នៅស្រុកអង្គស្នួល ខេត្តកណ្តាល ឈ្នះរង្វាន់១២៥លានរៀលពីភេសជ្ជៈប៉ូវកម្លាំង ខារ៉ាបាវ

ព័ត៌មានជាតិ៣ ម៉ោង មុន

UPDATE៖ ករណីឡានទំនើបបុកម៉ូតូ បណ្តាលឱ្យបុរសម្នាក់ស្លាប់ គ្រួសាររងគ្រោះប្ដឹងឱ្យសមត្ថកិច្ចជួយរកយុត្តិធម៌

ព័ត៌មានជាតិ៣ ម៉ោង មុន

បង្កើតផ្លូវថ្មីតភ្ជាប់ពីផ្លូវជាតិលេខ១ រហូតដល់គល់ស្ពានព្រែកប្រា-ចាក់អង្រែ

ព័ត៌មានអន្ដរជាតិ៣ ម៉ោង មុន

អាមេរិក ជប៉ុន និងកូរ៉េខាងត្បូង រួមដៃគ្នាធ្វើកិច្ចសហប្រតិបត្តិការដោះស្រាយ​ការបាញ់មីស៊ីលរបស់ កូរ៉េខាងជើង

ព័ត៌មានជាតិ៣ ម៉ោង មុន

ទូតអង់គ្លេស៖ រាជរដ្ឋាភិបាលថ្មីរបស់សម្ដេច ហ៊ុន ម៉ាណែត មានសកម្មភាពមមាញឹក ពិសេសការជំរុញពាណិជ្ជកម្ម

Sokha Hotels

ព័ត៌មានពេញនិយម