ទូតចិន បញ្ជាក់ជូនសម្ដេចតេជោ ថា ទំនាក់ទំនងកម្ពុជា-ចិន គឺជាគំរូនៃទំនាក់ទំនងអន្តរជាតិបែបថ្មី

អះអាងនៅចំពោះមុខសម្ដេចតេជោ ហ៊ុន សែន, លោកឯកអគ្គរដ្ឋទូតចិនប្រចាំនៅកម្ពុជា ថា ស្ថានការណ៍ពិភពលោកប្រែប្រួល តែទំនាក់ទំនងកម្ពុជា និងចិន មិនប្រែប្រួលឡើយ។ លោកឯកអគ្គរដ្ឋទូត ចាត់ទុកថា ទំនាក់ទំនងកម្ពុជា-ចិន គឺជាគំរូនៃទំនាក់ទំនងអន្តរជាតិបែបថ្មី។

នៅក្នុងជំនួបសម្ដែងការគួរសម និងជម្រាបលាសម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា នាព្រឹកថ្ងៃទី២៧ ខែឧសភា ឆ្នាំ២០២៤ លោក វ៉ាង វិនធាង ឯកអគ្គរដ្ឋទូតចិនប្រចាំកម្ពុជា សង្កត់ធ្ងន់ថា ចិន និងកម្ពុជា ជាមិត្តប្រពៃណី និងមិត្តដែកថែប ហើយលោក ពិតជាមានកិត្តិយសបំផុតក្នុងឆាកជីវិតរបស់លោក ដែលបានធ្វើជាឯកអគ្គរដ្ឋទូតប្រចាំនៅកម្ពុជា ដោយផ្តល់ឱកាសឱ្យចូលរួមលើកកម្ពស់ទំនាក់ទំនងចិន និងកម្ពុជា និងចូលរួមព្រឹត្តិការណ៍ជាប្រវត្តិសាស្ត្រជាច្រើននៅកម្ពុជា។

លោក វ៉ាង វិនធាង បានសម្ដែងការពេញចិត្តដែលបានធ្វើការជាមួយរាជរដ្ឋាភិបាលកម្ពុជា ក្រោមការដឹកនាំរបស់សម្តេច តេជោ ក្នុងនីតិកាលទី៦ និងក្រោមការដឹកនាំរបស់សម្តេចធិបតី ក្នុងនីតិកាលទី៧នេះ ដែលបាននាំមកនូវការអភិវឌ្ឍសង្គម-សេដ្ឋកិច្ច និងសុខុមាលភាពជូនប្រជាជនកម្ពុជា។ ទន្ទឹមនេះ លោក ក៏បានអបអរសារកម្ពុជា ដែលមានការផ្ទេរអំណាចដោយរលូន​​ ដល់ថ្នាក់ដឹកនាំជំនាន់ក្រោយ និងបានអបអរសាទរសម្តេចតេជោ ដែលបានជាប់ឆ្នោតជាប្រធានព្រឹទ្ធសភានៃកម្ពុជា។

លោកឯកអគ្គរដ្ឋទូតចិន ក៏បានបង្ហាញមោទកភាពដែលនៅឆ្នាំ២០១៩ ចិន និងកម្ពុជា បានចុះហត្ថលេខាមុនគេបង្អស់លើអនុស្សារណយោគយល់គ្នា ស្តីពីកិច្ចព្រមព្រៀងជាឯកច្ឆន្ទក្នុងការកសាងសហគមន៍ជោគវាសនារួមចិន-កម្ពុជា ក្នុងយុគសម័យថ្មីប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់។ លោកទូត ចាត់ទុកថា ទំនាក់ទំនងចិន-កម្ពុជា គឺជាគំរូនៃទំនាក់ទំនងអន្តរជាតិបែបថ្មី។ បើតាមការគូសបញ្ជាក់របស់លោកទូត ចិន បានចាត់ទុកកម្ពុជា ជាប្រទេសអាទិភាព និងបានប្តេជ្ញាសហការក្នុងកិច្ចសហប្រតិបត្តិការត្បូងពេជ្រ និងខិតខំជំរុញច្រករបៀងមច្ឆា និងអង្ករ និងច្រកឧស្សាហកម្ម និងបច្ចេកវិទ្យា ឱ្យមានការរីកចម្រើន ដើម្បីផលប្រយោជន៍ទៅវិញទៅមក។

លើសពីនេះ លោកឯកអគ្គរដ្ឋទូត បានថ្លែងអំណរគុណសម្តេចតេជោ និងរាជរដ្ឋាភិបាលកម្ពុជា ដែលរក្សាជំហរយុត្តិធម៌ស្តីពីសមុទ្រចិនខាងត្បូង បញ្ហាកោះតៃវ៉ាន់ និងតំបន់ស៊ីងជាំង សំដៅការពារផលប្រយោជន៍ចិន និងកម្ពុជា និងផលប្រយោជន៍អាស៊ាន-ចិនផងដែរ។

ជាការឆ្លើយតប សម្ដេចតេជោ ហ៊ុន សែន បានគូសបញ្ជាក់ថា ទំនាក់ទំនងកម្ពុជា-ចិន ដែលជាទំនាក់ទំនងប្រវត្តិសាស្ត្រយូរអង្វែង បានរីកចម្រើនរហូតដល់កម្រិតដែលមិនអាចបំបែកបាន។ សម្ដេចតេជោ សង្កត់ធ្ងន់ថា ទំនាក់ទំនងនេះ ស័ក្តិសមនឹងគុណតម្លៃនៃការជឿទុកចិត្តគ្នា ជាពិសេសទំនុកចិត្តខាងផ្នែកនយោបាយនៃប្រទេសទាំងពីរ។

សម្ដេចតេជោ បញ្ជាក់ថា ជំនួយរបស់ភាគីចិន មិនត្រឹមតែជួយអភិវឌុ្ឍសង្គម-សេដ្ឋកិច្ចប៉ុណ្ណោះទេ តែថែមទាំងជួយពង្រឹងឯករាជ្យភាពខាងនយោបាយរបស់កម្ពុជាទៀតផង។ សម្ដេចតេជោ បានបញ្ជាក់សាជាថ្មីថា ទោះមានការផ្លាស់ប្ដូរនាយករដ្ឋមន្ត្រី និងគណៈរដ្ឋមន្ត្រីនៅកម្ពុជាក៏ដោយ ក៏ពុំមានការផ្លាស់ប្ដូរគោលជំហរក្នុងទំនាក់ទំនងកម្ពុជាជាមួយចិននោះឡើយ ដោយកម្ពុជា នឹងរក្សាមិត្តភាពកម្ពុជា-ចិន ឱ្យស្ថិតស្ថេរជាអមតៈ៕