កសិករក្នុង​ខេត្តបាត់ដំបង​ប្រើ​ដ្រូនបាចជីស្រូវ មួយហិកតា ៣ ម៉ឺនរៀល ខណៈល្បឿនដាំដុះ​ស្រូវ​ឆ្នាំនេះ​ស្ទុះខ្លាំង​

ល្បឿននៃការ​ដាំដុះ​ដំណាំស្រូវវស្សា​នៅក្នុងខេត្តបាត់ដំបង​ឆ្នាំ២០២៤ មានល្បឿនលឿនជាងឆ្នាំ២០២៣ ខណះបច្ចុប្បគេសង្កេតឃើញ កសិករបានកំពុងសម្រុកបាចជីដោយប្រើដ្រូន និងបាញ់ថ្នាំការពារសត្វដង្កូវលើផល​ដំណាំដាំដុះ។

ប្រជាកសិករតាមស្រុកមួយចំនួនក្នុង​ខេត្តបាត់ដំបង​ប្រាប់ថា ផលដំណាំស្រូវបើគិតតមកដល់​ពេល​នេះ​មិន​មាន​ការប្រឈមបញ្ហាណាមួយនោះនៅឡើយ។

កសិករក្នុងស្រុកមោងឫស្សី ស្ថិតនៅក្នុងភូមិកូនខ្លុង ឃុំកំពុងព្រៀង អ្នកស្រី ឈន សុីម បានឲ្យដឹងថា ស្រូវឆ្នាំនេះ​លូតលាស់ល្អជាងឆ្នាំកន្លងទៅ ហើយការប្រឈមក៏មិនមានបញ្ហាដែរ តែ​ក៏​ត្រូវ​ការប្រើប្រាស់ជីនិងថ្នាំទប់ស្កាត់ដង្កូវផងដែរ​ដើម្បីបង្កើនទិន្នផល។

លោក ឈន ឌី ជាកូនប្រុសអ្នកស្រី ឈន សុីម បានប្រាប់ថា “ដី​ចំណែកខ្ញុំមាន ១០ ហិកតា ម៉ែខ្ញុំ ៥ ហិកតា និងប្អូនស្រីៗខ្ញុំមួយចំនួនទៀត លូតលាស់ស្របគ្នាល្អណាស់។ ពួកខ្ញុំប្រើថ្នាំការពារដង្កូវដែរ បើទោះបីមិនទាន់កើតមាន ​ដោយ​ប្រើប្រាស់តាមបច្ចេកទេសណែនាំពី​មន្ត្រីជំនាញ ដើម្បីបង្កើនទិន្នផលហើយមិនប៉ះពាល់សុខភាព”។

លោកថា ការ​បាចជីដោយជួលដ្រូនសម្រាប់បាញ់ពីលើ បើដើរបាញ់ដោយថ្មើជើងមិនងាយទេ ​ជួបផលលំបាកច្រើន រួមទាំងប៉ះពាល់​សុខភាពផងដែរ។

“បើប្រើដ្រូនល្អ មិនជួបផលលំបាក និងសុខភាព ដោយ​គេយកឈ្នួល ១ ហិកតា ៣ មុឺនរៀល តែខ្ញុំច្រើនហិកតា សុំគេចុះតម្លៃបាន ៥ ពាន់រៀលដែរ ក្នុងមួយហិកតា ឆ្នាំនេះបើបានផលច្រើនខ្ញុំនឹងទិញដ្រូន ១ ដែរ គ្រាន់បានរកកម្រៃបន្ថែមដូចគេ”។ លោក ឈន ឌី បាន​បញ្ជាក់បន្ថែម។

កសិករមួយ​រូបទៀត​រស់នៅភូមិព្រែកទ្រព្យ ឃុំព្រែកនរិន្ទ ស្រុកឯកភ្នំ គឺលោក សុជាតិ បានឲ្យដឹងដែរថា ដោយសារតែ លោកមានការពិបាកខ្លាំង ក្នុងការបាញ់ថ្នាំស្មៅនិងដាក់ជីស្រូវម្តងៗ ត្រូវដើរលុយទឹកទំរាំបាញ់ថ្នាំរួច ហើយក្នុងមួយហិកតាប្រើ ពេលរហូតពេញមួយថ្ងៃ ខណះដែលលោកបានធ្វើស្រូវប្រដេញទឹកចំនួន ១០ ហិកតា ហើយក៏ប្រឈមសុខភាពផងដែរ ចំពោះការដើរបាញ់ថ្នាំ។ ដោយសារតែកត្តានេះហើយ ទើបលោកសន្សំលុយហើយសម្រេចចិត្តទិញដ្រូនមកប្រើតែម្តង ហើយការប្រើប្រាស់ដ្រូន សម្រាប់បាញ់ថ្នាំនិងជី គឺចំណាយពេលត្រឹមតែជាង ១០ នាទីប៉ុណ្ណោះក្នុងមួយហិកតា។

លោកថ្លែង​យ៉ាងដូច្នេះថា “ដោយសារ តែខ្ញុំជួបផលលំបាកខ្លាំង និងគិតដល់សុខភាពផង ទើបសម្រេចទិញដ្រូនតូចមួយនេះ ក្នុងតម្លៃ ៧ ពាន់ដុល្លារ ហើយក៏​រកបាន​កម្រៃបន្ថែម”។

លោក​បន្ត​ថា ក្រៅពីប្រើប្រាស់ទៅលើដំណាំស្រូវខ្លួន​ឯងផ្ទាល់ ក៏ឆ្លៀតពេលស៊ី​ឈ្នួលបាញ់ថ្នាំនិងជីឱ្យអ្នកភូមិរកកម្រៃ​ផងដែរ ក្នុងនោះមានបាញ់ជីនិងថ្នាំលើគ្រប់ផលដំណាំក្រៅពីស្រូវ ដោយ​មួយហិកតាយកកម្រៃ ៣ មុឺនរៀលហើយមានអ្នកស្រុក ច្រើនដែលពួកគាត់ត្រូវការជួល អាចរកចំណូលបានគ្រាន់បើដែរ មិនលំបាកសម្រាប់ជីវិភាពគ្រួសារ។

បើយោងតាមរបាយការណ៍ពីមន្ទីរកសិកម្មខេត្តបាត់ដំបង គិតត្រឹមថ្ងៃទី ២៥ ខែកក្កដាឆ្នាំ ២០២៤ នេះ បានបង្ហាញឲ្យដឹងថា ផ្នែកវិស័យកសិកម្មក្នុងខេត្តបាត់ដំបងក្នុងឆ្នាំ២០២៤ បង្កើនល្បឿននៃការដាំដុះជាងឆ្នាំ២០២៣។ ក្នុងនោះផលដំណាំស្រូវបានភ្ជួររាស់ និងដាំដុះលើផ្ទៃដីតាមផែនការចំនួន ៣៣៥.០០០ហិកតា កើនឡើង ៨២.២៥% បើធៀបក្នុងឆ្នាំ​២០២៣​។

ដំណាំសាកវប្បកម្ម និងឧស្សាហកម្មសរុប ២៥៦.៥៦០ ហិកតា ក្នុងនោះផ្ទៃដីដំណាំសាកវប្បកម្ម ២.០៤០ ហិកតា ស្មើនិង ៥៨.៧៥% បើធៀបក្នុងឆ្នាំ ២០២៣។ ប្រភពដដែលបញ្ជាក់ថា បើគឹតត្រឹមថ្ងៃទី២៥ ខែកក្កដា ឆ្នាំ២០២៤នេះ ផលដំណាំទាំងអស់នៅមិនទាន់មានការរងផលប៉ះពាល់ឬខូចខាត ដោយកត្តាធម្មជាតិនៅឡើយនោះទេ៕

អត្ថបទ៖ សៅ សារិទ្ធ