អាជ្ញាធរទុកពេល ១០ ថ្ងៃ​​ឲ្យពលរដ្ឋ​រុះរើផ្ទះ ប៉ះពាល់​ការដ្ឋាន​សាងសង់​ស្ពានឆ្លងកាត់ទន្លេបាសាក់​(ចាក់អង្រែក្រោម-ព្រែកប្រា)

លោក ជា សុខៃ ចៅសង្កាត់ចាក់អង្រែក្រោមបានឲ្យកម្ពុជាថ្មីដឹងថា អាជ្ញាធរបានចេញសេចក្តីជូនដំណឹងដល់​ពលរដ្ឋ​រស់នៅ​ក្នុងភូមិព្រែកតាឡុង ២ សង្កាត់ចាក់អង្រែក្រោម ខណ្ឌមានជ័យដែលប៉ះពាល់គម្រោងធ្វើស្ពានឆ្លងកាត់ទន្លេបាសាក់ មេត្តារួសរាន់ក្នុងការរុះរើផ្ទះក្នុងអំឡុងពេល ១០ ថ្ងៃគិតចាប់ពីថ្ងៃទី ៦ ខែវិច្ឆិកា នេះទៅ។

លោក ជា សុខៃ បាន​ឲ្យ​ដឹង​ថា បច្ចុប្បន្នការដ្ឋានសាងសង់ស្ពានឆ្លងកាត់ទន្លេបាសាក់ បានដំណើការសាងសង់នៅ​លើផ្ទៃទឹក​និង​បន្តមកឆ្លងកាត់ផ្លូវជាតិលេខ ២ ឆ្ពោះមកភូមិព្រែកតាឡុង ២ សង្កាត់ចាក់អង្រែក្រោម ខណ្ឌមានជ័យ ហើយប៉ះចំលំនៅដ្ឋានពលរដ្ឋចំនួន ៦៩ ដីឡូត៍និងខ្នងផ្ទះ។

«ចំពោះដីនិងផ្ទះដែលប៉ះពាល់ ក៏ទទួលបានសំណងពីរដ្ឋ ដូច្នេះពេលផុតបុណ្យអុំ​ទូកដល់ពេលបើកការដ្ឋាន​សាងសង់ស្ពានប៉ែកដីគោកហើយ។ ដូច្នេះសូមបងប្អូនរូតរះរុះរើឲ្យទាន់ពេល ដើម្បីឲ្យការសាងសង់បានរួចរាល់តាមការគ្រោងទុក»។ នេះបើតាមលោក ជា សុខៃ។

គិតត្រឹមពាក់កណ្តាលខែតុលា ឆ្នាំ២០២៤ គម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេច​វឌ្ឈនភាព​ការងារបាន ១៤, ៥០%។

ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) បាន​បើក​ការដ្ឋានសាងសង់កាលពីថ្ងៃទី ១៩ ខែកុម្ភៈ ឆ្នាំ២០២៤ ដែល​ចំណាយថវិកាសរុបប្រមាណ ៦០,២ លានដុល្លារអាមេរិក។ គម្រោង​ស្ពាន​ដែល​ប្រើប្រាស់​ឥណទានសម្បទានពី រដ្ឋាភិបាលនៃសាធារណរដ្ឋប្រជាមានិតចិន​ នៅពេល​សាងសង់​រួច​នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស ឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ ជួយពង្រឹង​ដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលាន​យន្តហោះអន្តរជាតិតេជោក្រុងតាខ្មៅ កាត់បន្ថយការកកស្ទះចរាចរណ៍នៅតាមដងទន្លេ​បាសាក់ និងជួយពន្លឿនការអភិវឌ្ឍតំបន់នោះ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ៕

អត្ថបទ៖ នរា