គម្រោងស្ថាបនាស្ពានឆ្លងទន្លេបាសាក់ តម្លៃ ៦០ លានដុល្លារសម្រេចបានជាង ១១ ភាគរយ

គម្រោ​ងស្ថាបនា​ស្ពានឆ្លងទន្លេបាសាក់(​ចាក់អង្រែក្រោម-ព្រែកប្រា) សម្រេចបានការសាងសង់ ១១,៥០ ភាគរយ គិតត្រឹមដំណាច់ខែមិថុនា ឆ្នាំ ២០២៤។ គម្រោង​ស្ថាបនាស្ពានឆ្លងកាត់ទន្លេបាសាក់នេះ បានចាប់ផ្ដើមបើកការដ្ឋានសាងសង់នៅថ្ងៃទី ១៩ ខែកុម្ភៈ ឆ្នាំ ២០២៤។

សសរគ្រឹះ៣៦ដើម បានចាក់បេតុងរួចរាល់ ក្នុង១៥៦ដើម នៃសរសរគ្រឹះ និងកំពុងបន្តរៀបចំដំឡើងពុម្ពជើងតាង ដែលបច្ចប្បន្នសម្រេចបាន ៦ ក្នុងចំណោម ២០ ជើងតាង ព្រមទាំងការងារសំខាន់ៗមួយចំនួនទៀត។

គម្រោ​ងស្ថាបនា​ស្ពាន ​ចាក់អង្រែក្រោម-ព្រែកប្រា ត្រូវបានសាងសង់ឡើងដោយចាយ​ថវិកា​ប្រមាណ ៦០លានដុល្លារអាមេរិក និង​ប្រើរយៈ​ពេលសាងសង់ ៤២ខែ ដោយ​ឥណ​ទានសម្បទានពីប្រទេសចិន។

គម្រោងស្ពានឆ្លងទន្លេបាសាក់-ចាក់អង្រែក្រោម មានប្រវែងសរុប ១.៦៥០ម៉ែត្រ (ប្រវែងស្ពាន ៨៤៥,៧០ម៉ែត្រ, ទទឹងផ្លូវ២៧ម៉ែត្រ,ផ្លូវតភ្ជាប់ក្បាលស្ពានប្រវែង ៨០៤,៣០ម៉ែត្រ, ទទឹងផ្លូវ ២៧ម៉ែត្រ)សាងសង់ដោយក្រុមហ៊ុន សំណង់សៀងហៃ,ទីប្រឹក្សាគម្រោង​ដោយក្រុមហ៊ុន​ក្វាងចូវវ៉ានអាន៕