ទូក ជាប់ចំណាត់ថ្នាក់លេខ១ ក្នុងខេត្តបន្ទាយមានជ័យ ធ្វើពិធី​ក្រុង​ពាលី​ដើម្បីត្រៀមទៅ​ប្រកួត​ថ្នាក់ជាតិនៅរាជធានីភ្នំពេញ

នៅសៀល​ថ្ងៃទី​៩ ខែវិច្ឆិកា​ ឆ្នាំ២០២៤​ រដ្ឋបាលខេត្តបន្ទាយមានជ័យ អមដំណើរដោយលោក អ៊ុំ រាត្រី​ អភិបាល​ខេត្ត​​ លោកអភិបាលរងស្រុក កងកម្លាំងទាំង៣ ប្រភេទ អាជ្ញាធរ សមត្ថកិច្ច និងពលរដ្ឋអ្នកគាំទ្រជាច្រើនាក់បានចូលរួមពិធីសែនក្រុងពលីប្រោះព្រំលើករាសីដល់ចំណុះទូក ង ឈ្មោះ សុវណ្ណរាជសីហ៍ បារមីបន្ទាយមហានគរ មានចំណុះ ៧៦នាក់ ជាទូកជាប់លេខ១ នៅក្នុងវត្តគយម៉ែង​ ក្នុងស្រុកមង្គលបូរី​ ខេត្តបន្ទាយមានជ័យ។ ទូក ង នេះ ត្រូវចេញដំណើរននៅថ្ងៃទី១០ ខែវិច្ឆិកា ឆ្នាំ២០២៤ ទៅប្រកួតថ្នាក់ជាតិ ដែលជាទូកជ័យលាភីក្នុងការប្រណាំទូកនៅក្នុងខេត្តបន្ទាយមានជ័យកាលពីថ្ងៃទី២៧ ខែតុលាឆ្នាំ ២០២៤ កន្លងមកលើស្ទឹងទឹកថ្លា នាបរិវេណសាកលវិទ្យាល័យជាតិមានជ័យ ផ្លូវជាតិលេខ៥ ផ្លូវដែកនៅភូមិបាណយ សង្កាត់ទឹកថ្លា ក្រុងសិរីសោភ័ណ ដែលមានភ្ញៀវទៅទស្សនា២ថ្ងៃជាង១៣ម៉ឺននាក់

លោក អ៊ុំ រាត្រី បានមានប្រសាសន៍ថា ការធ្វើក្រុងពាលី ទូក ង ឈ្មោះ សុវណ្ណរាជសីហ៍បារមីបន្ទាយមហានគរ ដែលមានចំណុះ ៧៦នាក់ ជាទូកលេខ១ នៅក្នុងវត្តគយម៉ែង​ ដើម្បីយកទៅប្រកួតនៅក្រុងភ្នំពេញនៅថ្ងៃទី១០នេះហើយ។ លោកអភិបាលខេត្តបានមានប្រសាសន៍បន្តទៀតថា ការប្រកួតចាញ់ ឈ្នះ គឺវាសំខាន់ណាស់សម្រាប់ដណ្តើមយកកេរ្តិ៍ឈ្មោះឲ្យខេត្ត កីឡាករនីមួយៗត្រូវបញ្ចេញអស់ពីកម្លាំងកាយចិត្ត ទោះបីការប្រណាំងទូកនេះជាប់លេខ១ លេខ ២ លេខ៣ លេខ៤ ក៏ដោយក៏មានកេរ្តិ៍ឈ្មោះដែរ តែស្មារតីនៃការរាប់អាន និងមានសាមគ្គីភាព រវាងកីឡាករ និងកីឡាករក៏វាសំខាន់ណាស់ដែរ។

លោក អ៊ុំ រាត្រី បន្តឲ្យដឹងទៀតថា ការធ្វើពិធីបួងសួង ក៏ដូចជាពិធីក្រុងពាលីនេះ គឺជាពិធីដែលស្ថិតក្នុងជំនឿតាមបែបព្រលឹងដែលប្រជាជនខ្មែរមានជំនឿជឿថា នៅលើលោកនេះ អ្នកខ្លាំងពូកែដែលបានចែកស្ថានទៅ ពិតជាបានប្រើប្រាស់ព្រលឹងរបស់ខ្លួននៅតាមថែរក្សាក្រុមកីឡាករទាំងអស់​ នឹងមើលការខុសត្រូវដោយឬទ្ធានុភាពជួយគាំទ្រកីឡាករទាំងអស់ឲ្យមានមនសិការស្នេហាកីឡា ព្រោះកីឡាជា កេរ្តិ៍ដំណែលតាំងពីដូនតាមកម្លេះ។ ការប្រារព្ធពិធីនេះ ក៏បានបង្ហាញអំពីបេះដូងដ៏ទូលំទូលាយរបស់កីឡាករដែលបានរក្សាប្រពៃណីជំនឿនៃជាតិសាសន៍របស់ខ្លួនតាំងតែពីសម័យកាលដ៏រុងរឿងនៃអាណាចក្រអង្គរមកម្លេះ។

ក្នុងពិធីក្រុងពលី បួងសួងនេះដែរ លោកគ្រូអាចារ្យ បានធ្វើការបួងសួងបារមីដ៏ស័ក្តសិទ្ធ ព្រះធរណី ព្រះគង្គា និងបារមីព្រះមហាក្សត្រ គ្រប់ជំនាន់តាមជួយថែរក្សាកីឡាករទាំងអស់ពេលចេញប្រកួតឲ្យមានកម្លាំងខ្លាំងយកជ័យជំនះឲ្យបាននៅនៅពេលប្រកួតឲ្យខានតែបានផងដែរ៕

អត្ថបទ៖ វ៉ាន់ ណាង