អ្នកមិនអនុវត្តច្បាប់ថ្មីស្ដីពីការទប់ស្កាត់ជំងឺកូវីដ-១៩ ត្រូវប្រឈមនឹងបទល្មើសចំនួន៥

ច្បាប់ស្តីពីការទប់ស្កាត់ជំងឺកូវីដ-១៩ មានបទល្មើសចំនួន៥ ដែលត្រូវអនុវត្តសម្រាប់អ្នកមិនគោរព។ នេះជាការបញ្ជាក់ពីលោក កើត រិទ្ធ រដ្ឋមន្ត្រីក្រសួងយុត្តិធម៌ បានថ្លែងនៅក្នុងសន្និសីទសារព័ត៌មានផ្សព្វផ្សាយច្បាប់ ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេង ទៀត នាព្រឹកថ្ងៃទី១៥ ខែមីនា ឆ្នាំ២០២១ នេះ។ 

លោក កើត រិទ្ធ បញ្ជាក់ថា ច្បាប់នេះបានផ្ដល់នូវសិទ្ធិអំណាចនានាដល់រាជរដ្ឋាភិបាលដើម្បីដាក់ចេញនូវវិធានការចាំបាច់នានា ដូចជាវិធានការសុខាភិបាល វិធានការរដ្ឋបាល និងវិធានការផ្សេងទៀត ដែលមានភាពចាំបាច់ ក្នុងការទប់ស្កាត់ជំងឺកូវីដ-១៩ ក៏ដូចជាជំងឺកាចសាហាវផ្សេងទៀត ហើយដើម្បីធានាឲ្យការអនុវត្តច្បាប់នេះមានប្រសិទ្ធភាព គ្រប់ច្បាប់ទាំងអស់ គឺត្រូវតែមានទោសបញ្ញត្តិ ដែលនិយាយពីការដាក់ទោសទណ្ឌ ហើយមិន មែនតែសម្រាប់កម្ពុជាទេ នៅប្រទេសណាក៏គេធ្វើដែរ។

បើតាមលោក កើត រិទ្ធ ច្បាប់នេះបានបង្កើតឲ្យមានបទល្មើសចំនួន៥ ដែលដាក់ចេញដោយរាជរដ្ឋាភិបាលក្នុងការទប់ស្កាត់កុំអោយឆ្លងរីករាលដាល ហើយបទល្មើសសំខាន់ៗដែលមានចែងនៅក្នុងច្បាប់ចំនួន៥នោះរួមមាន៖

បទល្មើសទី១៖ គឺការគេចវេសចេញពីការធ្វើចត្តាឡីស័ក ឬគេចចេញពីកន្លែងធ្វើ កន្លែងធ្វើចត្តាឡីស័ក ពីព្រោះប្រសិនបើគ្មានការការពារគេចខ្លួនចេញពីកន្លែងធ្វើធ្វើការធ្វើចត្តាឡីស័កនោះទេ ការឆ្លងរីករាលដាលចូលសហគមន៏នោះទេ ហើយការគេចចេញពីកន្លែងធ្វើចត្តាឡីស័កនេះ នឹងត្រូវផ្ដន្ទាទោសចាប់ពី ៦ខែទៅ៣ ឆ្នាំ។

បទល្មើសទី២៖ អំពើគេចវេសចេញពីការព្យាបាល ឬពីកន្លែងព្យាបាល។ អ្នកកំពុងសម្រាកព្យាបាលមានន័យថា អ្នកនោះបានផ្ទុកជម្ងឺរួចទៅហើយ ដូច្នេះហានិភ័យនៃការឆ្លងទៅកាន់អ្នកដទៃខ្ពស់បំផុត  ហើយបទល្មើសនេះ ត្រូវដាក់ពន្ធនាគារពី១ ឆ្នាំទៅ៥ ឆ្នាំ ប៉ុន្តែបើការគេចចេញពីកន្លែងព្យាបាលនេះហើយ ទៅចម្លងអ្នកដទៃ និងត្រូវជាប់ពន្ធនាគារពី៥ ឆ្នាំទៅ១០ឆ្នាំ ដូច្នេះទោសនេះមិនខុសពីសម្លាប់មនុស្សទេ ពីព្រោះវាអាចសម្លាប់មនុស្ស ហើយមិនមែនសម្រាប់តែម្នាក់ទេ វាអាចសម្លាប់ប្រជាពលរដ្ឋនៅក្នុងប្រទេសកម្ពុជាទាំងមូល។ 

បទល្មើសទី៣៖ មានចេតនាចម្លងជំងឺកូវីដ-១៩ដល់អ្នកដទៃ ដែលទោសនេះត្រូវដាក់ពន្ធនាគារពី៥ ឆ្នាំទៅ១០ឆ្នាំ។ យើងចាំបានថា មានបុរសបរទេសម្នាក់ ដែលមានអាការក្អក ហើយយកទឹកមាត់ទៅផ្តិតពេញទូអេធីអឹម នេះគឺជាចេតនានៃការចម្លងមេរោគទៅកាន់អ្នកដទៃ។ 

បទល្មើសទី៤៖ ការមិនគោរពវិធានការរដ្ឋបាល ដែលទោសនេះត្រូវដាក់ពន្ធនាគារពី៦ ខែទៅ៣ឆ្នាំ ហើយទោសនេះអាចកើនដល់៥ឆ្នាំ ប្រសិនបើការមិនគោរពវិធានការរដ្ឋបាលនេះ ធ្វើឲ្យប៉ះពាល់ដល់សុខភាពសាធារណ។  

បទល្មើសទី៥៖ ការរារាំង ឬធ្វើឲ្យមានឧបសគ្គ ដល់ការអនុវត្តវិធានការសុខាភិ បាល ទោសនេះត្រូវដាក់ពន្ធនាគារពី ៦ខែទៅ៣ ឆ្នាំ ហើយទោសនេះអាចកើនឡើងដល់៥ ឆ្នាំ ប្រសិនបើអំពើនេះបានធ្វើឲ្យមានការចម្លងរីករាលដាលជំងឺកូវីដ-១៩ ដទៃ។  

គួរបញ្ជាក់ថា ច្បាប់នេះចូលជាធរមានតាំងពីថ្ងៃទី១២ ខែមីនា ឆ្នាំ២០២១ វេលាម៉ោង០០:០០ នាទីមកម្ល៉េះ៕

អត្ថបទ៖ កោះកែវ