ភ្នំពេញ​មិន​ទាន់ធូរស្រាល ផ្ទុះ​អ្នក​ឆ្លង​ថ្មី​​ទាំង ៩ ខណ្ឌ​ក្នុង​ទីក្រុង

​ខណៈ​ខេត្ត​ព្រះសីហនុ​មាន​ភាព​ធូរស្រាល​បន្តិច រាជធានី​ភ្នំពេញ​បន្ត​រក​ឃើញ​អ្នក​ឆ្លង​ថ្មី​ច្រើន​នៅ​ថ្ងៃនេះ។ រាជធានី​មួយ​នេះ​មាន​អ្នក​ឆ្លង​ថ្មី ៣០ នាក់​ទៀត​ក្នុង​ខណ្ឌទាំង ៨ ជា​អ្នកពាក់ព័ន្ធ​ព្រឹត្តិការណ៍ ២០ កុម្ភៈ ខណៈ​ខេត្ត​ព្រះសីហនុ​ដែល​ផ្ទុះ​​​​ឆ្លង​ច្រើន​ថ្ងៃ​ជាប់​គ្នា រកឃើញ​តែ​ ២ នាក់​ប៉ុណ្ណោះ។

ខណ្ឌ​ដែល​រកឃើញ​ករណី​ឆ្លងច្រើន​ជាង​គេ​មាន​ខណ្ឌ​ដូនពេញសរុប​អ្នក​ឆ្លង ០៦ នាក់។ ​ខណ្ឌមានជ័យ និង​ខណ្ឌ​សែនសុខ ដែល​ខណ្ឌ​នីមួយៗ​មាន​អ្នក​ឆ្លង​ ០៥ នាក់​។

ក្រសួងសុខាភិបាលបានប្រកាសថាថ្ងៃនេះ មាន​អ្នកឆ្លងថ្មីចំនួន ៣៧ នាក់ ក្នុង​នោះ​ក្នុង​សហគមន៍ ៣៥ នាក់ និងអ្នកជាសះស្បើយចំនួន ៤៩ នាក់។ ករណីឆ្លងក្នុង​ព្រឹត្តិការណ៍សហគមន៍ ២០ កុម្ភៈ ដែលមកដល់ពេលនេះ កើនឡើងដល់ ១៩៤៩ ករណីក្នុងរយៈពេលជាង ១ ខែ និង​បង្ក​ឲ្យ​ស្លាប់ចំនួន ១៤ នាក់ដោយសារជំងឺកូវីដ១៩៕