Connect with us

នយោបាយ

តំណាងគណបក្សនយោបាយចំនួន ៤ លើកឡើងថា «ជាជំហានវិជ្ជមាន» ក្រោយបានជួបតំណាង គ.ជ.ប

បានផុស

នៅ

តំណាងគណបក្សនយោបាយចំនួន ៤ ដែលជួបជាមួយតំណាង គ.ជ.ប កាលពីពេលថ្មីៗនេះ បានលើ​កឡើងថា ជំនួបនេះ គឺជាជំហានវិជ្ជមានមួយសម្រាប់ក្រុមគណបក្សរបស់ខ្លួន ពាក់ព័ន្ធនឹងការតស៊ូមតិសម្រាប់កែលម្អប្រព័ន្ធបោះឆ្នោត។ តំណាងគណបក្សនយោបាយចំនួន ៤ ដែលបានជួបជាមួយតំណាង គ.ជ.ប រួមមាន៖ គណបក្សភ្លើងទៀន គណបក្សឆន្ទៈខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ ម៉ូនីកា ប្រធានគណបក្សឆន្ទៈខ្មែរ បានថ្លែងក្នុងសន្និសីទសារព័ត៌មាន ស្ដីពី សំណើកែលម្អប្រព័ន្ធបោះឆ្នោត និងសេរីភាពនយោបាយនៅកម្ពុជា នាព្រឹកថ្ងៃទី ២ ខែកញ្ញានេះថា ជំនួបរវាងតំណាង គ.ជ.ប ជាមួយតំណាងគណបក្សនយោបាយទាំង ៤ខាងលើនេះ គឺជាជំនួបមួយដែលជាជំហានវិជ្ជមាន ពាក់ព័ន្ធនឹងការតស៊ូមតិសម្រាប់កែលម្អប្រព័ន្ធបោះឆ្នោត។

លោកថា កន្លងមក មានជំនួបដែររវាងមន្ត្រី គ.ជ.ប ជាមួយតំណាងគណបក្សនយោបាយ តែជាជំនួបជជែកតតាំងគ្នាអំពីបញ្ហាអ្វីមួយ ដែលខុសពីជំនួបលើកនេះ។ ជំនួបលើកនេះ គឺ​ជជែកគ្នាអំពីអ្វីដែល ចង់បានឲ្យការបោះឆ្នោតមួយនាពេលខាងមុខ មានភាពល្អប្រសើរសម្រាប់គណបក្សនយោបាយទាំងអស់ ដែលចូលរួមការបោះឆ្នោត​។

ប្រធានគណបក្សឆន្ទៈខ្មែរ បានបញ្ជាក់យ៉ាងដូច្នេះថា «ជារួម យើងឃើញថា វាមានចំណុចល្អប្រសើ​រច្រើនក្នុងជំនួបហ្នឹង ហើយយើងវាយតម្លៃថា ការជួបនេះ គឺការបោះជំហានមួយទៅមុខ សម្រាប់គណបក្សនយោបាយ ដែលមាននិន្នាការប្រជាធិបតេយ្យ ឬក៏អាចថា មាននិន្នាការប្រឆាំង គឺយើងរីករាយដែលបានជួបជាមួយនឹង គ.ជ.ប ហើយយើងរំពឹងថា គ.ជ.ប នឹងផ្ដល់ឱកាសបែបនេះតទៅទៀត ជាមួយគណបក្សនយោបាយយើងខ្ញុំ»។

គួររំលឹកថា កាលពីថ្ងៃទី ៣១ ខែសីហា ឆ្នាំ ២០២២ លោក ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានដឹកនាំក្រុមការងារ ដែលមានថ្នាក់ដឹកនាំអគ្គលេខាធិការដ្ឋាន គ.ជ.ប ទទួលជួបជាមួយតំណាងគណបក្សនយោបាយចំនួន ៤ រួមមាន៖ គណបក្សភ្លើងទៀន គណបក្សឆន្ទៈខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន។

សេចក្ដីប្រកាសព័ត៌មានរបស់ គ.ជ.ប បានឲ្យដឹងថា ក្នុងជំនួបនោះ ភាគីគណបក្សនយោបាយ បានលើកឡើងចំនួន ១៧ ចំណុច ដើម្បីកែលម្អប្រព័ន្ធបោះឆ្នោត ហើយតំណាងគណបក្សនយោបាយបានពន្យល់នូវចំណុចនីមួយៗ ដល់ភាគី គ.ជ.ប អំពីបញ្ហាដែលគណបក្សនយោបាយជួបការលំបាក និងបញ្ហាខ្លះទៀតសំណូមពរឲ្យមានការធ្វើវិសោធនកម្មច្បាប់ ដើម្បីកែលម្អប្រព័ន្ធបោះឆ្នោត។

ក្រោយពីបានស្តាប់ ការលើកឡើងរបស់ភាគីគណបក្សនយោបាយរួចមក ភាគី គ.ជ.ប បានជម្រាបជូនដល់ភាគីគណបក្សនយោបាយវិញថា ចំណុចខ្លះមិនពាក់ព័ន្ធនឹងសមត្ថកិច្ច គ.ជ.ប ទេ គឺទាក់ទងនឹងស្ថាប័នរដ្ឋសភា ដែលជាស្ថាប័នរៀបចំច្បាប់ និងស្ថាប័នក្រសួងមហាផ្ទៃ ពាក់ព័ន្ធនឹងអាជ្ញាធរដែនដី។ ស្ថាប័ន គ.ជ.ប ទាក់ទងនឹងការងារបច្ចេកទេសនៅក្នុងការអនុវត្តច្បាប់តែប៉ុណ្ណោះ។ ជារួម ចំពោះសំណើរបស់គណបក្សនយោបាយទាំង ៤ បានស្នើឡើងនោះ ភាគី គ.ជ.ប ទទួលយក និងរៀបចំជារបាយការណ៍ ដើម្បីដាក់ជូន គ.ជ.ប ពិនិត្យ និងសម្រេចថា តើគួរយក ឬមិនគួរយកទៅលើចំណុចណាមួយ ដើម្បីកែលម្អស្របទៅតាមច្បាប់។

សេចក្ដីប្រកាសព័ត៌មានរបស់ គ.ជ.ប បានបញ្ជាក់ទៀតថា កិច្ចប្រជុំពិភាក្សាបានប្រព្រឹត្តទៅអស់រយៈពេលជាងពីរម៉ោង ភាគីទាំងពីរបានទទួលស្គាល់ ថា មានលក្ខណៈល្អ យោគយល់គ្នា ដោយបានជជែកគ្នាត្រង់ទៅ ត្រង់មក ហើយការជួបគ្នាបែបនេះ គឺជាយន្តការល្អ ពីព្រោះអាចយកបញ្ហាមកដាក់លើតុ ដើម្បីជជែកគ្នារកវិធានការ និងរកវិធីដោះស្រាយនូវបញ្ហាប្រឈម ដែលអាចកើតមានឡើង ជាពិសេសធ្វើយ៉ាងណា ដើម្បីឲ្យដំណើរការរៀបចំការបោះឆ្នោត ដែលនឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ២០២៣ ខាងមុខនេះ មានលក្ខណៈកាន់តែល្អប្រសើរឡើង៕

អត្ថបទ៖ ឃួន សុភ័ក្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ៥ ថ្ងៃ មុន

អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា

ព័ត៌មានជាតិ៣ ថ្ងៃ មុន

ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ

ព័ត៌មានជាតិ៣ ថ្ងៃ មុន

បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»

ព័ត៌មានជាតិ៣ ថ្ងៃ មុន

កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា

សេដ្ឋកិច្ច៤ ថ្ងៃ មុន

មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ

Sokha Hotels

ព័ត៌មានពេញនិយម