គណបក្សថ្មីមួយទៀត ត្រូវបានក្រសួងមហាផ្ទៃ សម្រេចចុះបញ្ជីឱ្យធ្វើសកម្មភាពនយោបាយ

ស្របតាមលទ្ធិប្រជាធិបតេយ្យ សេរីពហុបក្ស ក្រសួងមហាផ្ទៃ បានសម្រេចចុះឈ្មោះគណបក្សថ្មីមួយបន្ថែមទៀត គឺគណបក្សរបស់លោក រស់ សារ៉ុម ដើម្បីអាចធ្វើសកម្មភាពនយោបាយ ស្របទៅតាមច្បាប់។

យោងតាមប្រកាសរបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា ចុះថ្ងៃទី២១ ខែមីនា ឆ្នាំ២០២៥ បានសម្រេចចុះឈ្មោះ គណបក្សសន្តិភាពជាតិ សរសេរអក្សរកាត់ គ.ស.ជ ក្នុងបញ្ជីគណបក្សនយោបាយនៅក្រសួងមហាផ្ទៃ ដោយទីស្នាក់ការកណ្តាលរបស់បក្សនេះ ស្ថិតនៅផ្ទះលេខ៦៩z ផ្លូវបេតុង ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

ភ្ជាប់ទៅនឹងការសម្រេចនេះ ប្រមុខក្រសួងមហាផ្ទៃ ក៏បានប្រាប់ឱ្យគណបក្សសន្តិភាពជាតិ ត្រូវធ្វើសកម្មភាព និងបំពេញកាតព្វកិច្ច ស្របតាមច្បាប់ស្តីពីគណបក្សនយោបាយ លិខិតបទដ្ឋានគតិយុត្តនានាជាធរមាន និងលក្ខន្តិកៈរបស់ខ្លួនដូចបានតម្កល់ទុកនៅក្រសួងមហាផ្ទៃ។

គិតមកដល់ពេលនេះ គណបក្សនយោបាយប្រមាណជិត៥០គណបក្សហើយ ដែលបានចុះក្នុងបញ្ជីជាផ្លូវការនៅក្រសួងមហាផ្ទៃ៕