អ្នកនាំពាក្យ គ.ជ.ប ៖ ច្បាប់មិនអនុញ្ញាតឲ្យមានការរៀបចំមណ្ឌលបោះឆ្នោតពិសេស សម្រាប់ពលករខ្មែរ​ចំណាកស្រុកនោះទេ  

អ្នកនាំពាក្យ គ.ជ.ប បានបញ្ជាក់ជាថ្មីទៀតថា នៅក្នុងក្របខ័ណ្ឌច្បាប់ គឺមិនអនុញ្ញាតឲ្យ គ.ជ.ប រៀបចំការិយាល័យ ឬមណ្ឌលបោះឆ្នោតពិសេស សម្រាប់ពលករចំណាកស្រុកបោះឆ្នោតនោះទេ។

ការបញ្ជាក់នេះ បន្ទាប់ពីគណបក្សនយោបាយចំនួន ៤ ដែលបានជួប គ.ជ.ប កាលពីពេលថ្មីៗនេះ បានរៀបចំសន្និសីទសារព័ត៌មានមួយ ដោយបានលើកឡើងថា គ.ជ.ប គួរតែចាប់ផ្ដើមគិតគូរអំពីការបង្កើតការិយាល័យបោះឆ្នោតពិសេស សម្រាប់ឲ្យពលករខ្មែររស់នៅ និងធ្វើការនៅក្រៅប្រទេស អាចបោះឆ្នោតបាន។ លោក គង់ ម៉ូនីកា ប្រធានគណបក្សឆន្ទៈខ្មែរ បានថ្លែងក្នុងសន្និសីទសារព័ត៌មាននេះថា គ.ជ.ប គួរតែមានការចាប់ផ្ដើមគិតគូរអំពីការរៀបចំឲ្យមានមណ្ឌលបោះឆ្នោតពិសេស សម្រាប់ឲ្យប្រជាពលរដ្ឋខ្មែរចំណាកស្រុក អាចបោះឆ្នោតបាន។

លោកថា «គ.ជ.ប ត្រូវមានការចាប់ផ្ដើមគិតគូរ អំពីការរៀបចំនូវការិយាល័យពិសេសហ្នឹង ការិយាល័យពិសេស ក៏យើងបានលើកជាយោបល់ទៅ គ.ជ.ប ហ្នឹង គឺថា ឥឡូវចាប់ផ្ដើមពីចំណុចណាមួយ ឧទា​ហរណ៍ថា ប៉ោយប៉ែតៗ យើងដឹងថា ប្រជាពលរដ្ឋខ្មែរយើង បងប្អូនអញ្ជើញទៅប្រទេសថៃ ធ្វើកិច្ចការងារមួយចំនួន ​អាចអញ្ជើញមកបោះឆ្នោតបាន នៅពេលយើងមានការបោះឆ្នោត គាត់អាចមកត្រឹមប៉ោយប៉ែត ដើម្បីបោះឆ្នោតបាន»។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ២ ខែកញ្ញានេះថា ចំណុចខាងលើនេះ គឺតំណាងគ.ជ.ប បានជជែកគ្នាជាមួយតំណាងគណបក្សយោបាយទាំង ៤ កាលពីថ្ងៃទី ៣១ ខែសីហា ឆ្នាំ ២០២២កន្លងទៅនេះ។

លោកថា បើពិនិត្យមើលតាមក្របខ័ណ្ឌច្បាប់ គឺច្បាប់មិនអនុញ្ញាតឲ្យមានការរៀបចំមណ្ឌលបោះឆ្នោតពិសេសនោះទេ ហើយអ្វីដែលគណបក្សទាំង ៤លើកឡើងនោះ គឺចង់ឲ្យប្រជាពលរដ្ឋដែលកំពុងចំណាកខ្មែរស្រុកនៅប្រទេសថៃ ឬក៏ប្រទេសដទៃទៀត មិនចាំបាច់ធ្វើដំណើរទៅដល់ឃុំ-សង្កាត់ ដែលពួកគាត់​ចុះឈ្មោះបោះឆ្នោត និងបោះឆ្នោតនោះទេ ពោលគឺអាចទៅបោះឆ្នោតនៅតាមព្រំដែន ដែលនៅទីនោះមានបង្កើតមណ្ឌលបោះឆ្នោតពិសេស។

ចំពោះការលើកឡើងរបស់គណបក្សទាំង ៤នេះ លោក សោម សូរីដា បានបញ្ជាក់ថា «សូមបញ្ជាក់ឡើងវិញថា ទៅលើក្របខ័ណ្ឌច្បាប់ គឺយើងមិនមានការរៀបចំជាមណ្ឌលបោះឆ្នោតពិសេសនោះទេ នេះគឺជាទិដ្ឋភាពច្បាប់ ហើយបើយើងពិនិត្យលើទិដ្ឋភាពបច្ចេកទេស គ.ជ.ប មិនអាចញែកបញ្ជីអ្នកមានឈ្មោះនៅក្នុងបញ្ជីបោះឆ្នោត នៃឃុំ-សង្កាត់ទាំងអស់ទាំង ១៦៥២ឃុំ-សង្កាត់ ដែលមានការិយាល័យបោះឆ្នោតជាង ២ម៉ឺន ៣ពាន់ការិយាល័យនេះ ទាញយកអ្នកបោះឆ្នោតដែលបានធ្វើចំណាកស្រុក ហើយបង្កើតជាការិយាល័យបោះឆ្នោត ឲ្យពួកគាត់បានទេ»។

អ្នកនាំពាក្យ គ.ជ.ប បានបន្ថែមថា ចំពោះការងារបច្ចេកទេស គឺ គ.ជ.ប មិនអាចដឹងថាតើអ្នកដែលធ្វើចំណាកស្រុកទាំងនោះ ពួកគាត់មានឈ្មោះបោះឆ្នោតនៅការិយាល័យណា នៃឃុំ-សង្កាត់ណា និងចំណុះ​ឲ្យរាជធានី-ខេត្ត ណាមួយ? ពីព្រោះការបោះឆ្នោតនាឆ្នាំ ២០២៣ខាងមុខ ជាការបោះឆ្នោតជ្រើសតាំងតំណាងរាស្រ្ដ ហើយរាជធានី-ខេត្ត ជាមណ្ឌលបោះឆ្នោត។

មន្ត្រីជាន់ខ្ពស់ គ.ជ.ប រូបនេះ បានបន្ថែមទៀតថា «ចឹងការបោះឆ្នោត នៅការិយាល័យបោះឆ្នោតណា ត្រូវរាប់សន្លឹកឆ្នោតនៅការិយាល័យនោះ ចឹងទៅលើទិដ្ឋភាពបច្ចេកទេស គឺមិនអាចធ្វើកើតទេ ចឹងយើងបានបង្ហាញទៅគណបក្សទាំង ៤ហើយថា អត់មានគោលការណ៍ ឬការបញ្ញត្តិនៅក្នុងច្បាប់ឲ្យ គ.ជ.ប បង្កើតមណ្ឌលបោះឆ្នោតពិសេសនៅតាមព្រំដែន ឬតាមច្រករបៀងអីណាផ្សេងៗ ឬក៏ខេត្តនៅជាប់នឹងទល់ដែននោះទេ»។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប បានគូសបញ្ជាក់ថា អ្វីដែលជាការលើកឡើង ឬស្នើឡើងដោយគណបក្សនយោបាយទាំង ៤ខាងលើ ឲ្យបង្កើតមណ្ឌលបោះឆ្នោតពិសេ​សនេះ គឺហួសនូវគោលការណ៍ច្បាប់ដែលបានបញ្ញត្តិឲ្យ គ.ជ.ប ក្នុងការរៀបចំការិយាល័យបោះឆ្នោត៕

អត្ថបទ៖ ឃួន សុភ័ក្រ