សម្ដេចតេជោ ហ៊ុន សែន ទទួលព័ត៌មានពិតពីក្រុមប្រឆាំងក្រៅស្រុក តាមរយៈមនុស្សរបស់សម្ដេចនៅជាមួយពួកគេ

សម្ដេចតេជោ​ ហ៊ុន សែន នាយករដ្ឋមន្ត្រីនៃកម្ពុជា បានអះអាងថា សម្ដេច ទទួលបានព័ត៌មានពិតពីក្រុមប្រឆាំងនៅក្រៅស្រុក តាមរយៈមនុស្សរបស់សម្ដេចនៅជាមួយពួកគេ ដែលមនុស្សខ្លះជេរសម្ដេចឮជាងគេផង។ 

តាមរយៈបណ្ដាញសង្គមតេលេក្រាម នៅព្រឹកថ្ងៃទី ១ ខែមិថុនា ឆ្នាំ ២០២៣នេះ សម្ដេចតេជោ ហ៊ុន សែន បានសរសេរ ថា ដើម្បីប្រដៅពួកល្ងង់នៅក្រៅស្រុក ដែលអះអាងថា មានមនុស្សនៅក្បែរសម្ដេច។ សម្ដេចតេជោ ហ៊ុន សែន បានបញ្ជាក់ថា គឺសម្ដេចតែម្ដងដែលតែងតែផ្តល់ព័ត៌មានឲ្យលោកស្រី ជូឡុង សូម៉ូរ៉ា, លោក អេង ឆៃអ៊ាង, លោកស្រី មូរ សុខហួរ, លោក ឡុង រី, លោក ហូរ វ៉ាន់ និងមេដឹកនាំមួយចំនួនទៀត នៅក្នុងគណបក្សប្រឆាំង។

សម្ដេចតេជោ ហ៊ុន សែន សរសេរបន្តថា «អ្នកឲ្យព័ត៌មានច្រើនប្រើឈ្មោះកុសល មែនទេ? អស់លោក និងលោកស្រីមានអំនួតខ្លាំងណាស់ ដែលថាមានមនុស្សបង្កប់នៅក្បែរ ហ៊ុន សែន តែមិនដឹងថា ជាល្បិចចារកម្មអត់ស្រមោលរបស់ ហ៊ុន សែន នោះឡើយ»។

សម្ដេចតេជោ ហ៊ុន សែន បានឲ្យដឹងដែរថា សម្ដេច ទទួលបានព័ត៌មានពីក្រុមប្រឆាំងនៅក្រៅស្រុក បានព័ត៌មានពិត តាមរយៈមនុស្សរបស់សម្ដេចនៅជាមួយពួកគេ ដែលមនុស្សខ្លះជេរសម្ដេចឮជាងគេផង។ ចំណែកឯក្រុមប្រឆាំងនៅក្រៅស្រុកយកព័ត៌មានពីសម្ដេច គឺជាព័ត៌មានដែលសម្ដេចចង់ឲ្យតែប៉ុណ្ណោះ​។

សម្ដេចតេជោ ហ៊ុន សែន លើកឡើងបន្តទៀតថា ដោយសារសម្ដេច ឃើញក្រុមប្រឆាំងល្ងង់ពេក ទើបសម្ដេចប្រាប់ពីការពិត នៃការចារកម្មឥតស្រមោលមួយនេះ ដើម្បីឲ្យក្រុមប្រឆាំងនៅក្រៅប្រទេសឆ្លាតបន្តិច។ សម្ដេចតេជោ ហ៊ុន សែន បានបន្ថែមទៀតថា «នៅមានរឿងមួយដែលមេដឹកនាំម្នាក់យល់ព្រមជាមួយកុសលឲ្យធ្វើឃាដ ហ៊ុន សែន ដែលខ្ញុំទុកទូរទាត់បញ្ជីនៅពេលក្រោយ»៕