មុខសញ្ញាចែកចាយគ្រឿងញៀន ត្រូវប៉ូលីសស្រុកបាទីបង្ក្រាប

ខេត្តតាកែវ៖ មុខសញ្ញាចែកចាយគ្រឿងញៀនម្នាក់ត្រូវប៉ូលីជំនាញនៃអធិការដ្ឋាននគរបាលស្រុកបាទីបង្ក្រាបបាន ជាមួយនឹងវត្ថុតាងបញ្ជូនទៅសាលាដំបូងខេត្តតាកែវចាត់ការតាមនីតិវិធី។

អនុវត្តតាមបទបញ្ជាយ៉ាងម៉ឺងម៉ាត់ពីសំណាក់លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ នៅល្ងាចថ្ងៃទី១៦ ខែវិច្ឆិកា ឆ្នាំ២០២១ លោកវរសេនីយ៍ឯក ឆាយ កែមុន្នី អធិការនគរបាលស្រុកបាទី បានដឹកនាំកម្លាំងជំនាញផ្នែកគ្រឿងញៀនចេញល្បាតក្នុងភូមិសាស្រ្តសំខាន់ៗ។ លុះមកដល់ចំណុចភូមិស្តុកប្រីយ៍ ឃុំត្រពាំងសាប ស្រុកបាទី ខេត្តតាកែវ បានប្រទះឃើញជនសង្ស័យម្នាក់ ឈ្មោះ អៀ ភា ភេទប្រុស អាយុ ២៦ ឆ្នាំ មុខរបរមិនពិតប្រាកដ ស្នាក់នៅភូមិស្តុកប្រីយ៍ ឃុំត្រពាំងសាប ស្រុកបាទី ខេត្តតាកែវ ដែលជាមុខសញ្ញាជួញដូរសារធាតុញៀនខុសច្បាប់។

ក្រោយឃាត់ខ្លួន សមត្ថកិច្ចបានឆែកឆេររកឃើញក្រាមពណ៌ ស ២៣ កញ្ចប់ ១ កញ្ចប់ធំ និង ២២ កញ្ចប់តូច ទូរស័ព្ទដៃ ០១ គ្រឿង នៅនឹងខ្លួនជនសង្ស័យ។

បច្ចុប្បន្នជនសង្ស័យខាងលើត្រូវបានកម្លាំងជំនាញធ្វើការសាកសួរ និងកសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនិតិវិធី៕

អត្ថបទ៖ វីរៈ