រដ្ឋបាលខេត្ត​កែប ចុះ​ពិនិត្យ​​ទីតាំង​រៀបខឿន និងចាក់​ដី​រំលោភ​ចូលឆ្នេរសមុទ្រ​

នៅព្រឹក​ថ្ងៃ​ទី​២៧ ខែ​កុម្ភៈ ឆ្នាំ២០២៤ នេះ លោក ហ៊ួ​រ មិថុនា អភិ​បាល​រង​ខេត្តកែប តំណាង បណ្ឌិត សោម ពិសពិសិដ្ឋ អភិបាលខេត្ត​កែប បាន​ដឹកនាំ​មន្ត្រីមន្ទីរ​ជំនាញ អង្គភាពពាក់ព័ន្ធ ​អាជ្ញាធរមូលដ្ឋាន និងអាជ្ញាធរ ស្រុក​ដំណាក់​ចង្អើរ ចុះ​ពិនិត្យទីតាំង ណែនាំ​ប្រជាពលរដ្ឋ​រឿងករណី​រៀបដាក់លូ រៀបខឿន ចាក់​ដី​រំលោភ​ចូលឆ្នេរសមុទ្រប្រវែង ៤០ ម៉ែត្រ នៅ​ចំណុច ​ស្រែ​យុល ដែលស្ថិតនៅ ភូមិ​អំពែង ឃុំអង្កោល ស្រុក​ដំណាក់​ចង្អើរ ខេត្ត​កែប។​

​

ប្រភព​ពី​ប្រជាពលរដ្ឋ​ម្នាក់សូម​មិន​បញ្ចេញ​ឈ្មោះ បានលួចបង្ហើបប្រាប់ឱ្យដឹងថា ជាប្រពៃណី​ទៅហើយ ដែលដីចំណីឆ្នេរសមុទ្រអង្កោល នៅ​ក្នុងស្រុក​ដំណាក់ចង្អើរ​ ត្រូវបានប្រជាពលរដ្ឋ​មួយចំនួន នៅតែ​បន្តមាន​ឆ្លៀតឱកាស លួច​ចាក់ដី​រំលោភយក​ឆ្នេរសមុទ្រ ​និង​តាម​ដៃ​ព្រែក​មួយ​ចំនួន ខណៈពេល​អាជ្ញាធរ ​និង​មន្ត្រី​ជំនាញ​កំពុងតែ​ដេកលក់​ មើលមិនឃើញ។​

​

ប្រភពខាងលើ ​បានឱ្យដឹង​បន្តថា អាជ្ញាធរ ​និង​មន្ត្រី​ជំនាញ​មួយចំនួន ​ក៏​មើល​ឃើញ​ដែរ​ អំពី​ការ​ចាក់​រំលោភ​យក​ដី​ចំណីឆ្នេរសមុទ្រ​ និង​តាម​ដង​ព្រែក​មួយនោះ ប៉ុន្តែ​ពួកគាត់​ធ្វើ​​ព្រងើយកន្តើយ ហាក់ដូចជា​មិន​ដឹង​រឿង​អ្វី​ៗទាំងអស់៕

អត្ថបទ៖ សឹង រ៉ាត់