១សប្ដាហ៍ សមត្ថកិច្ចឃាត់ខ្លួនមនុស្សជាង៣០០នាក់ ពាក់ព័ន្ធបទល្មើសគ្រឿងញៀន

រយៈពេលមួយសប្ដាហ៍ រាប់ពីថ្ងៃទី២៦ ខែកុម្ភៈ ដល់ថ្ងៃទី៣ ខែមីនា ឆ្នាំ២០២៤នេះ សមត្ថកិច្ចនគរបាលជាតិទូទាំងប្រទេស បានឃាត់ខ្លួនជនសង្ស័យចំនួន៣១៩នាក់ ពាក់ព័ន្ធនឹងបទល្មើសគ្រឿងញៀន ចំនួន១៦១ករណី។ នេះបើតាមការឱ្យដឹងរបស់អ្នកនាំពាក្យរងក្រសួងមហាផ្ទៃ លោក ទូច សុខៈ។

តាមលោក ទូច សុខៈ ក្នុងប្រតិបត្តិការបង្ក្រាបករណីគ្រឿងញៀននោះ សមត្ថកិច្ចបង្ក្រាបបានករណីគ្រឿងញៀនទ្រង់ទ្រាយធំចំនួន២ករណី គឺនៅរាជធានីភ្នំពេញ និងខេត្តព្រះសីហនុ ក្នុងនោះឃាត់ខ្លួនអ្នកពាក់ព័ន្ធសរុបចំនួន៦នាក់ និងប្រមូលបានគ្រឿងញៀនជាង១៧គីឡូក្រាម រួមទាំងសារធាតុផ្សុំមួយចំនួនទៀត។

បញ្ហាគ្រឿងញៀន ស្ថិតក្នុងចំណោមទិសដៅអាទិភាពទាំង៦ ដែលលោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានប្រកាសជាឧឡារិក ក្រោយចូលកាន់មុខតំណែងជារដ្ឋមន្ត្រីក្រសួងមហាផ្ទៃ ក្នុងនោះការប្រយុទ្ធប្រឆាំងគ្រឿងញៀន ក៏ត្រូវបានអនុវត្តចំពោះមន្ត្រីនគរបាលជាតិរបស់ខ្លួន។

មន្ត្រីនគរបាលជាតិទាំងកម្រិតអង្គភាពចំណុះក្រសួងមហាផ្ទៃ រហូតដល់អង្គភាពចំណុះស្នងការដ្ឋាននគរបាលរាជធានី-ខេត្ត ជាបន្តបន្ទាប់ បានអនុវត្តការធ្វើតេស្តរកសារធាតុញៀន។ ទីបំផុតមានមន្ត្រីមួយចំនួនតូចត្រូវបានបណ្ដេញចេញពីក្របខ័ណ្ឌ បន្ទាប់ពីរកឃើញមានសារធាតុញៀន។

កាលពីពេលថ្មីៗនេះ សម្ដេចមហាបវរធិបតី ហ៊ុន ម៉ាណែត ក៏បានចេញបទបញ្ជាលេខ០០១ ឱ្យគ្រប់អង្គភាពរដ្ឋ ទាំងថ្នាក់ជាតិ និងថ្នាក់ក្រោមជាតិ ធ្វើតេស្តលើមន្ត្រីទាំងអស់ ហើយមន្ត្រីដែលរកឃើញមានសាធាតុញៀនក៏នឹងត្រូវបណ្ដេញចេញពីក្របខ័ណ្ឌរដ្ឋដូចគ្នាដែរ៕