ពលរដ្ឋភាគច្រើនចង់ទិញឈើសង់ផ្ទះ ប៉ុន្តែឈើថ្លៃជាងថ្ម

បច្ចុប្បន្នប្រជាពលរដ្ឋខ្មែរភាគច្រើនស្រឡាញ់ផ្ទះឈើណាស់ ប៉ុន្តែទាល់តែចំណាយថវិកាច្រើនជាងធ្វើផ្ទះថ្ម។
តាមប្រភពពីលោក ប៉ែន មុន្នី ដែលជាអ្នកលក់ឈើនៅម្តុំច្រាំងបាក់ ផ្លូវ៣៦៩ សង្កាត់ច្បារអំពៅទី២ ខណ្ឌច្បារអំពៅរាជធានីភ្នំពេញ បានប្រាប់ កម្ពុជាថ្មីថា បច្ចុប្បន្ននេះប្រជាពលរដ្ឋខ្មែរភាគច្រើនចង់ទិញឈើយកទៅសាងសង់ផ្ទះខ្លាំងណាស់ ប៉ុន្តែដោយសារតែឈើមានតម្លៃខ្ពស់ពេកទើបងាកមកធ្វើផ្ទះថ្មស្នាក់នៅវិញ ព្រោះមានតម្លៃធូថ្លៃជាងឈើ។

លោក ប៉ែន មុន្នី បានបញ្ជាក់ទៀតថា មូលហេតុដែលឈើមានតម្លៃខ្ពស់ គឺដោយសារតែឈើពិបាករកហើយឈើដែលដាក់លក់សព្វថ្ងៃ គឺជាឈើស្របច្បាប់ទាំងអស់អត់មានលោតឆត្រ័ដូចពីមុនឡើយ។ ចំពោះតម្លៃឈើវិញគឺប្រភេទលេខ២ ឈើទាល ១ម៉ែត្រគូបថ្លៃ៦០០ដុលារ។ បើឈើប្រភេទលេខ១ មានឈើផ្ចឹក សុក្រំ ស្រឡៅ ថ្លៃរហូតដល់៨០០ដុល្លារឯណោះ។ ដោយសារតែតម្លៃឈើឡើងថ្លៃខ្ពស់ទើបអ្នកប្រកបរបបលក់ឈើតាមដេប៉ូមិនសូវមានម៉ូយចុះមកទិញ៕

អត្ថបទ៖ នរា