អាជីករផ្សារដើមគរ ជឿជាក់លើរាជរដ្ឋាភិបាល មិនជឿតាមការញុះញង់របស់ក្រុមជនជ្រុលនិយមមានចេតនាបង្កចលាចលនោះឡើយ

អាជីករនៅផ្សារដើមគរ ក្នុងរាជធានីភ្នំពេញ បានបង្ហាញការជឿជាក់លើរាជរដ្ឋាភិបាលបច្ចុប្បន្ន ដោយពួកគេមិនជឿតាមការញុះញង់របស់ក្រុមជ្រុលនិយមមានចេតនាទុច្ចរិតបង្កចលាចល ឬការប៉ងផ្តួលរំលំរដ្ឋាភិបាលស្របច្បាប់នោះឡើយ។

អាជីវករអ្នកលក់សម្លៀកបំពាក់ អ្នកលក់ការហ្វេ ដែលកំពុងប្រកបអាជីវកម្មក្នុងផ្សារដើមគរយល់ឃើញថា ប្រទេសជាតិកំពុងឋិតក្នុងសម័យសុខសន្តិភាព ការអភិវឌ្ឍន៍ មានអាគារខ្ពស់ៗ ផ្លូវថ្នល់សាលារៀន ដូច្នោះហើយគ្មានហេតុផលអ្វីដែលពួកគាត់ត្រូវទៅស្តាប់តាមការញុះញង់របស់ជនទាំងឡាយណា ដែលមានបំណងបំផ្លាញសន្តិភាពរបស់ប្រទេសនោះឡើយ។

លោក ទិត្យ វុទ្ធី ប្រធានគណៈកម្មការគ្រប់គ្រងផ្សារដើមគរ បានប្រាប់ឱ្យដឹងថា ស្ថានភាពទូទៅ នៅក្នុងផ្សាររបស់លោក គឺមានភាពល្អប្រសើរជាធម្មតា ដោយអាជីករនៅបន្តប្រកបរបរអាជីកម្មដដែល ហើយភ្ញៀវក៏នៅបន្តចូលមកទិញទំនិញធម្មតា ដោយពលរដ្ឋទាំងអស់គ្នាមិនមានការព្រួយបារម្ភ ឬខ្វាយខ្វល់អំពីការញុះញង់បង្កចលាចលពីសំណាក់ក្រុមជ្រុលនិយមក្រៅច្បាប់ ដែលបានឃោសនាបំផុសបំផុលឱ្យពលរដ្ឋធ្វើបាតុកម្មតវ៉ាជាមួយរាជរដ្ឋាភិបាល។

គួរបញ្ជាក់ថា បរិយាកាសទូទៅក្នុងសង្គម មានភាពប្រក្រតីប្រសើរធម្មតា ទាំងការធ្វើដំណើរ ការប្រកបអាជីវកម្មរកស៊ីទទួលទាន និងការបំពេញកិច្ចការងារជាដើម។ នេះជាការសបញ្ជាក់ឱ្យឃើញថា ពលរដ្ឋនៅទូទាំងប្រទេសកម្ពុជា មិនបានជឿជាក់តាមការញុះញង់របស់ក្រុមជនអគតិជ្រុលនិយមនោះឡើយ ពោលគឺពលរដ្ឋជឿជាក់ និងទុកចិត្តបំផុតលើរាជរដ្ឋាភិបាល ក្រោមការដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាពេលបច្ចុប្បន្ននេះ៕

អត្ថបទ៖ សុភា