សណ្ដាប់ធ្នាប់តាមបណ្ដោយផ្លូវលេខ២៣០ នៅតែជាបញ្ហាបង្កការកកស្ទះដល់អ្នកធ្វើដំណើរ

បញ្ហាសណ្ដាប់ធ្នាប់នៅកំណាត់ផ្លូវលេខ២៣០ មូលដ្ឋានសង្កាត់ផ្សារដើមគរ ខណ្ឌទួលគោក នៅតែជាចំណុចកកស្ទះចរាចរណ៍ដល់មហាជនអ្នកធ្វើដំណើរឆ្លងកាត់ ដោយអាជីវកលក់ដូរបន្លែផ្លែឈើទាំងយប់ទាំងថ្ងៃ ពេញផ្លូវ មិនខ្វល់ពីសណ្ដាប់ធ្នាប់សាធារណៈ ខណៈមានកម្លាំងសន្តិសុខសណ្ដាប់ធ្នាប់សាលាខណ្ឌទួលគោក ដើរប្រមូលលុយពីអាជីវក។

លោក ស៉ឹប សុផង់ អភិបាលរងទទួលបន្ទុកបរិស្ថានអនាម័យ សន្តិសុខ សណ្ដាប់ធ្នាប់បានឲ្យដឹងថា បញ្ហាសណ្ដាប់ធ្នាប់នៅកំណាត់ផ្លូវលេខ២៣០ លោកទទួលស្គាល់ថា ពិតជាបង្កផលប៉ះពាល់ដល់បងប្អូនអ្នកធ្វើដំណើរពិតប្រាកដមែន។ លោកអភិបាលរងបន្តទៀតថា ចំពោះកម្លាំងសន្តិសុខសណ្ដាប់ធ្នាប់ដើរប្រមូលលុយពីអាជីវកនោះ ឲ្យតែមានមុខមានរូបច្បាស់ លោកនឹងសុំគោលការពីថ្នាក់លើ អនុវត្តវិន័យ ឬអនុវត្តច្បាប់តែម្ដង។

គួរបញ្ជាក់ផងដែរ តាមបណ្ដោយផ្លូវលេខ ២៣០ ជាប់របងមជ្ឈមណ្ឌលម៉ុងឌីយ៉ាល់នេះកន្លងទៅអាជ្ញាធរមិនអនុញ្ញាតឲ្យអាជីវករទាំងអស់លក់ដូរនៅពេលថ្ងៃនោះទេ គឺអនុញ្ញាតឱ្យលក់ដូរតែនៅពេលយប់ ប៉ុន្តែសុំធ្វើយ៉ាងណាពេលព្រឹកព្រលឹមត្រូវតែសម្អាតបរិស្ថានអនាម័យឲ្យបានស្អាតប្រសើរឡើងវិញ។ ក៏ប៉ុន្តែមួយរយៈចុងក្រោយនេះអាជីវករហាក់មិនចូលរួមជាមួយអាជ្ញាធរ ដោយបន្តលក់រហូតដល់ពេលថ្ងៃ បន្ថែមទៀតនោះ បង្កការកកស្ទះដល់ពលរដ្ឋអ្នកធ្វើដំណើរ៕

អត្ថបទ៖ សុភា