សន្តិសុខសង្គម

នគរបាលបង្ហាញមុខក្រុមក្មេងទំនើង ៩ នាក់ និងមុខសញ្ញាឆក់-ប្លន់ ៣ នាក់

បានផុស

៣ ខែ មុន

នៅ

ថ្ងៃសៅរ៍ ២៨ ធ្នូ ២០២៤

ដោយ

ស្នងការដ្ឋាននគរបាលរាជធានីភ្នំពេញ កាលពីព្រឹកថ្ងៃទី ២៧ ខែធ្នូ ២០២៤ ម្សិលមិញ បានបង្ហាញមុខជនសង្ស័យចំនួន ១២ នាក់ (ស្រី ៣ នាក់) ក្នុងនោះមាន ៩ នាក់ ពាក់ព័ន្ធនឹងករណីហិង្សាបង្ករបួសស្នាម និង ៣ នាក់ ពាក់ព័ន្ធករណីឆក់ និងកាប់ប្លន់យកម៉ូតូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍សមត្ថកិច្ចបានឲ្យដឹងថា កាលពីថ្ងៃទី ២២ ដល់ថ្ងៃទី ២៥ ខែធ្នូ ឆ្នាំ ២០២៤ កម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលខណ្ឌ ៧ មករា ,កម្លាំងអធិការដ្ឋាននគរបាលខណ្ឌមានជ័យ ស្រាវជ្រាវឃាត់ខ្លួនជនសង្ស័យជាបន្តបន្ទាប់សរុបចំនួន ១២ នាក់ (ស្រី ៣ នាក់) ពាក់ព័ន្ធបទល្មើសចំនួន ០៧ ករណី ដោយក្នុងនោះ មានករណីឆក់យកទូរស័ព្ទដៃចំនួន ៤ ករណី មាន ៦ លើក និងកាប់ប្លន់យកម៉ូតូ ១ ករណី ១ លើក ឃាត់ខ្លួនជនសង្ស័យបានចំនួន ៣ នាក់។ ចំណែក ២ ករណីទៀត គឺ ករណីក្មេងទំនើង យកជើងធាក់ផ្ដួលម៉ូតូ និងវាយបង្ករបួសស្នាម ឃាត់ខ្លួនបានចំនួន ៩ នាក់(ស្រី ៣ នាក់)។

គួរបញ្ជាក់ថា កាលពីវេលាម៉ោង ២៣ និង ៣០ នាទី ថ្ងៃទី ១៩ ខែធ្នូ ឆ្នាំ ២០២៤ នៅចំណុចផ្លូវជាតិលេខ ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មានក្រុមក្មេងទំនើង ១ ក្រុម បានជិះម៉ូតូ បង្កហិង្សាដោយចេតនា ជិះទៅធាក់ម៉ូតូអ្នកធ្វើដំណើរ រួចទៅវាយស្ត្រីម្នាក់ រងរបួស ធ្វើឲ្យបាត់បង់សណ្ដាប់ធ្នាប់ និងសុខសុវត្ថិភាពដល់ពលរដ្ឋ ជាពិសេសបង្ករបួសស្នាមដល់អ្នកដទៃ។

ដោយឡែកជនសង្ស័យ ៣ នាក់ ផ្សេងទៀតនោះ ធ្វើសកម្មភាពឆក់ទូរស័ព្ទ ៤ ករណីផ្សេងគ្នា ដោយនៅក្នុងថ្ងៃទី ៤ ខែធ្នូ ឆ្នាំ ២០២៤ ធ្វើសកម្មភាពចំនួន ៣ លើកផ្ទួនៗ និងកាប់ប្លន់យកម៉ូតូម៉ាកហុងដាសេ ១២៥ ពណ៌ខ្មៅ ស៊េរីឆ្នាំ ២០២៣ ពាក់ផ្លាកលេខភ្នំពេញ ១KC-៩៧៤៤) ប្រព្រឹត្តនៅចំណុចចុងស្ពានព្រែកសំរោង ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ កាលពីវេលាម៉ោង ៣ និង ១៥ នាទី ថ្ងៃទី ៣ ខែធ្នូ ឆ្នាំ ២០២៤។

នគរបាលជំនាញព្រហ្មទណ្ឌ បានបញ្ជាក់ថា នគរបាលការិយាល័យជំនាញ កំពុងស្រាវជ្រាវបន្តយកបក្ខពួកសេសសល់បន្តទៀត។ ចំពោះមុខសញ្ញាសេសសល់ និងរត់គេចខ្លួន ដែលធ្វើសកម្មភាពហិង្សាដោយចេតនា ក្មេងទំនើង សមត្ថកិច្ចនឹងតាមបង្ក្រាបឲ្យដល់ឫសគល់ ដោយមិនយោគយល់នោះឡើយ។

បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងនគរបាលជំនាញការិយាល័យព្រហ្មទណ្ឌកម្រិតស្រាលឃាត់ខ្លួន និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕

អត្ថបទ ៖ សំណាង