សន្តិសុខសង្គម

នគរបាលបង្ហាញមុខក្រុមក្មេងទំនើងលួច ឆក់ និង បង្កហិង្សា ចំនួន ២០ នាក់

បានផុស

៤ ខែ មុន

នៅ

ថ្ងៃពុធ ២៦ មីនា ២០២៥

ដោយ

ជនសង្ស័យចំនួន ២០ នាក់ ជាក្រុមក្មេងទំនើងបង្កហិង្សា និងធ្វើសកម្មភាព លួច ឆក់ ត្រូវបាននគរបាល ស្នងការនគរបាលរាជធានីភ្នំពេញ សហការជាមួយកម្លាំង បណ្ដាខណ្ឌនានា ស្រាវជ្រាវបង្ក្រាបបានជាបន្តបន្ទាប់ក្នុងរយៈពេល ៣ ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី ២៦ ខែមីនា ឆ្នាំ ២០២៥ នេះ កម្លាំងនគរបាលបានយកជនសង្ស័យទាំង ២០ នាក់ បង្ហាញមុខជាសាធារណៈនៅស្នងការដ្ឋាននគរបាលរាជធានីភ្នំពេញ។

បើតាមការបញ្ជាក់ពី លោកឧត្ដមសេនីយ៍ត្រី ប៊ុត សត្យា ស្នងការរងទទួលផែនព្រហ្មទណ្ឌ បានឲ្យដឹងថា ដោយអនុវត្តតាមបទបញ្ជារបស់លោកឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កម្លាំងការិយាល័យនគរបាលព្រហ្មទណ្ឌកម្រិតស្រាល បានសហការជាមួយនគរបាលនៅតាមបណ្ដាលខណ្ឌនានា ធ្វើការស្រាវជ្រាវបង្ក្រាប បទល្មើសជាក់ស្ដែងជាបន្តបន្ទាប់ក្នុងរយៈពេល ៣ ថ្ងៃ។ ជាលទ្ធផលបង្ក្រាបបាន ១០ ករណី ដោយឃាត់ខ្លួនជនសង្ស័យចំនួន ២០ នាក់ ក្នុងនោះ ករណីឆក់ , ករណីលួច និងករណីក្មេងទំនើងប្រើហិង្សា។

លោកបានបន្តទៀតថា ចំណោមជនសង្ស័យចំនួន ២០ នាក់ ក្នុងនោះ នគរបាលការិយាល័យព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ បង្ក្រាបបាន ១ ករណីឆក់ទូរស័ព្ទ ,នគរបាលខណ្ឌដូនពេញ បង្ក្រាបបាន ២ ករណី (ឆក់ទូរស័ព្ទ ១ ករណី , ករណីលួចម៉ូតូ និងខ្សែភ្លើង ១ ករណី) , នគរបាលខណ្ឌដង្កោ បង្ក្រាបបាន ២ ករណី (ឆក់ទូរស័ព្ទ និងលួចម៉ូតូ) , នគរបាលខណ្ឌបឹងកេងកងបង្ក្រាបបានជនសង្ស័យឆក់ ១ ករណី , ខណ្ឌ ៧ មករា បង្ក្រាបបាន ១ ករណី លួចខ្សែភ្លើង , ខណ្ឌសែនសុខ បង្ក្រាបក្រុមក្មេងទំនើងហិង្សា ទំនាស់វាយគ្នា និងកាប់ម៉ូតូ , ខណ្ឌពោធិ៍សែនជ័យ បង្ក្រាបបាន ២ ករណី (រំលោភលើទំនុកចិត្តខ្ចីម៉ូតូ និងធ្វើឲ្យខូចខាតចេតនាគប់កញ្ចក់ឡាន)។