រថយន្ដ៣គ្រឿង និងម៉ូតូ៦គ្រឿង ត្រូវបានដកហូត​មករក្សាទុកនៅអធិការដ្ឋានខណ្ឌដង្កោ ពាក់ព័ន្ធករណីល្មើសជាតិស្រវឹង

កម្លាំងនគរបាលនៃអធិការដ្ឋាននគរបាលខណ្ឌដង្កោ បានដកហូតរថយន្ដចំនួន៣គ្រឿង និងម៉ូតូចំនួន៦គ្រឿងយកមករក្សាទុកនៅអធិការដ្ឋាននគរបាលខណ្ឌ ពាក់ព័ន្ធការបើកបរល្មើសជាតិស្រវឹង និងរង់ចាំម្ចាស់យានយន្តទាំងនោះចូលខ្លួនដោះស្រាយ និងបង់ផាកពិន័យតាមច្បាប់។

ការដកហូតយានយន្ដទាំង៩គ្រឿងនេះ ធ្វើឡើងក្នុងយុទ្ធនាការដាក់គោលដៅរឹតបណ្តឹងអនុវត្តច្បាប់ចរាចរណ៍ផ្លូវគោក ជាពិសេសត្រួតពិនិត្យលើអ្នកបើកបរយានយន្តក្រោមឥទ្ធិពលជាតិស្រវឹង កាលពីយប់រំលងអធ្រាត្រ ឈានចូលថ្ងៃទី៩ ខែមករា ឆ្នាំ២០២៥ នៅចំណុចមុខសាលាអន្តរជាតិប្រាយឡាញ លើបណ្តោយផ្លូវបេតុងព្រៃស ភូមិថ្មី សង្កាត់ដង្កោ ខណ្ឌដង្កោ។

លោកវរសេនីយ៍ឯក ជឹម ស៊ីថា អធិការនៃអធិការដ្ឋាននគរបាលខណ្ឌដង្កោ បានឲ្យដឹងថា ការចុះដាក់គោលដៅរឹតបណ្តឹងអនុវត្តច្បាប់ចរាចរណ៍ផ្លូវគោក ជាពិសេសត្រួតពិនិត្យលើអ្នកបើកបរយានយន្តក្រោមឥទ្ធិពលជាតិស្រវឹងនេះ ធ្វើឡើងតាមបទបញ្ជានាយឧត្តមសេនីយ៍ អគ្គស្នងការនគរបាលជាតិ និងស្នងការនគរបាលរាជធានីភ្នំពេញ ដោយបានសហការជាមួយកម្លាំងនគរបាលការិយាល័យជំនាញរបស់ស្នងការដ្ឋាននគរបាលរាជធានីភ្នំពេញ។

លោកអធិការបន្ថែមថា ក្នុងប្រតិបត្តិការនេះ មានយានយន្តឆ្លងកាត់គោលដៅមានចំនួន ៩៧គ្រឿង ក្នុងនោះយានយន្តល្មើសជាតិស្រវឹង ៩គ្រឿង (រថយន្តចំនួន ៣គ្រឿង និងម៉ូតូចំនួន ៦គ្រឿង) ល្មើសជាតិអាកុលកម្រិត ០.៤០mg/Lឡើង ហើយយានយន្តទាំង ៩គ្រឿងនេះ ត្រូវបានដកហូតយកមករក្សាទុកជាបណ្ដោះអាសន្ននៅអធិការដ្ឋាននគរបាលខណ្ឌដង្កោ ដើម្បីតម្រូវឲ្យម្ចាស់យានយន្តទាំងនោះចូលខ្លួនដោះស្រាយ និងបង់ផាកពិន័យ។

ជាមួយគ្នានេះដែរ លោកវរសេនីយ៍ឯក ជឹម ស៊ីថា ក៏បានអំពាវនាវដល់ប្រជាពលរដ្ឋទាំងអស់ចូលរួមសហការជាមួយក្រុមសមត្ថកិច្ចដែលកំពុងអនុវត្តច្បាប់ចរាចរណ៍ផ្លូវគោក និងជាតិស្រវឹងនៅតាមបណ្តាគោលដៅនានាដើម្បីកាត់បន្ថយករណីគ្រោះថ្នាក់ចរាចរណ៍៕