ព័ត៌មានជាតិ

មន្ទីរសុខាភិបាលខេត្ត ដាក់ទីតាំងត្រួតពិនិត្យថ្មី សហការជាមួយអាជ្ញាធរស្រុកសេសាន ដើម្បីចាត់វិធានការបង្ការជំងឺកូវីដ១៩

បានផុស

៥ years មុន

នៅ

ថ្ងៃព្រហស្បតិ៍ ២៤ មិថុនា ២០២១

ដោយ

មន្ទីរសុខាភិបាលខេត្តស្ទឹងត្រែង បានសហការជាមួយអាជ្ញាធរស្រុកសេសាន រៀបចំទីតាំងត្រួតពិនិត្យតាមផ្លូវគ្រួសក្រហមមួយខ្សែចំណុចភូមិក្របីជ្រុំ ឃុំក្បាលរមាស ស្រុកសេសាន ជាប់ព្រំប្រទល់ខេត្តរតនគិរី កាត់ចូលមកខេត្តស្ទឹងត្រែង ដើម្បីចាត់វិធានការ បង្ការជំងឺកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត អ៊ុង សូវៀត ប្រធានមន្ទីរសុខាភិបាលមានប្រសាសន៍ថា បច្ចុប្បន្នជំងឺកូវីដ១៩បានឆ្លងចូលមកក្នុងសហគមន៍ខេត្តរតនគិរី ជាខេត្តមួយមានភូមិសាស្ត្រ ទឹកដីជាប់ជាមួយខេត្តស្ទឹងត្រែង។ លោកវេជ្ជបណ្ឌិតបន្តថា ទោះបីអាជ្ញាធរមានសមត្ថកិច្ចបានរៀបចំទីតាំងពិនិត្យថ្មីនេះដោយ អាជ្ញាធរនៅតាមមូលដ្ឋានទាំងអស់ ត្រូវពិនិត្យតាមដានឲ្យបានដិតដល់ និងបង្កើនការផ្សព្វផ្សាយ អប់រំប្រជាពលរដ្ឋ កុំឱ្យបងប្អូនយើងភ្លេចខ្លួន ក្នុងការអនុវត្តវិធានសុខាភិបាលបង្ការជំងឺឆ្លងកូវីដ១៩ឲ្យមានប្រសិទ្ធភាព។

លោក ស៊ុយ អ៊ាមឡន អភិបាលរងស្រុកសេសានបានបញ្ជាក់បន្តថា អាជ្ញាធរមូលដ្ឋាននិងអនុវត្តឱ្យបានម៉ឺងមាត់ ចំពោះការធ្វើដំណើរឆ្លងកាត់របស់ប្រជាពលរដ្ឋរវាងខេត្តស្ទឹងត្រែង និងខេត្តរតនគីរី ក្នុងគោលបំណងតែមួយ គឺរួមគ្នាបង្ការជំងឺឆ្លងកូវីដ១៩នេះ កុំឱ្យឆ្លងចូលមកក្នុងសហគមន៍។

សូមបញ្ជាក់ថា ខេត្តស្ទឹងត្រែងមានទីតាំងត្រួតពិនិត្យចំនួនបីកន្លែងរួចមកហើយ ទី១នៅព្រំប្រទល់រវាងខេត្តក្រចេះស្ទឹងត្រែង, ទី២រតនគីរីស្ទឹងត្រែង, ទី៣ព្រះវិហារស្ទឹងត្រែងនៅតាមផ្លូវជាតិ ។ ហើយពេលនេះរៀបចំទីតាំង ត្រួតពិនិត្យនៅភូមិក្របីជ្រុំ ឃុំក្បាលរមាសស្រុកសេសានខេត្តស្ទឹងត្រែង ជាប់ព្រំប្រទល់រវាងឃុំត្រពាំងក្រហម ស្រុកកូនមុំ ខេត្តរតនគីរី មួយបន្ថែមទៀត ដើម្បីអនុវត្តវិធានការសុខាភិបាលឱ្យមានប្រសិទ្ធភាព៕

អត្ថបទ៖ ងិនលីម

សូមចុចអាន៖ ឃាត់ខ្លួនមេខ្យល់២នាក់ បម្រុងនាំពលករ១១នាក់ឆ្លងដែនខុសច្បាប់ទៅប្រទេសថៃ