កីឡា

កីឡាការិនីវ៉ូវីណាម ពៅ សុខា ក្លាយជាអគ្គរដ្ឋទូតកីឡាស្ត្រីអាស៊ាន

បានផុស

៣ years មុន

នៅ

ថ្ងៃសុក្រ ២៩ តុលា ២០២១

ដោយ

“ខ្ញុំអត់រំពឹងទុកថា ខ្ញុំបានក្លាយជាអគ្គរដ្ឋទូតកីឡាស្ត្រីអាស៊ាន តំណាងឲ្យកម្ពុជាទេ”។ នេះជាសម្តីហូរចេញពីមាត់ កីឡាការិនី ពៅ សុខា ដែលជាកីឡាការិនីកីឡាវ៉ូវីណាម របស់មជ្ឈមណ្ឌលកីឡាកងយោធពលខេមរភូមិន្ទនៃក្រសួងការពារជាតិ និងជាកីឡាការិនីជម្រើសជាតិកម្ពុជាប្រភេទកីឡាវ៉ូវីណាម ហើយត្រូវបានក្លាយជាអគ្គរដ្ឋទូតកីឡាស្ត្រីអាស៊ានរបស់ប្រទេសកម្ពុជា អញ្ជើញចូលរួម “កម្មវិធីជជែកពិភាក្សាដើម្បីលើកកម្ពស់ការចូលរួមរបស់ស្ត្រីក្នុងវិស័យកីឡានៅអា ស៊ាន” និងការផ្តល់កិត្តិយសដល់ម្ចាស់មេដាយអូឡាំពិក និងប៉ារ៉ាឡាំពិកអាស៊ានតូក្យូ ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនី ពៅ សុខា បានប្រាប់ឲ្យដឹងថា ខ្ញុំបានក្លាយជាអគ្គរដ្ឋទូតកីឡាស្ត្រីអាស៊ានរបស់ប្រទេសកម្ពុជា ឲ្យចូលរួមជាតំណាងកម្ពុជា ក្នុងកម្មវិធីលើកកម្ពស់ការចូលរួមរបស់ស្ត្រីក្នុងវិស័យកីឡា នៅអាស៊ាន ខ្ញុំពិតជាមានអារម្មណ៍សប្បាយរីករាយមែនទែន ព្រោះខ្ញុំអត់រំពឹងទុកថា ខ្ញុំបានក្លាយជាអគ្គរដ្ឋទូតកីឡាស្ត្រីអាស៊ានតំណាងឲ្យកម្ពុជាទេ ដោយសារមានបេក្ខនារីចូលរួមមិនមែនម្នាក់ គឺមានច្រើននាក់ ហើយក៏មិនមានតែកីឡាវ៉ូវីណាដែរ គឺមានកីឡាជាច្រើនប្រភេទ។

√ កីឡាការិនី ពៅ សុខា សន្យាជួយដណ្តើមមេដាយជូនកម្ពុជានៅឆ្នាំ២០២៣ សិន ទើបសម្រេចចិត្តរើសគូអនាគត

កីឡាការិនីរូបនេះ បានបន្តថា ជាការពិតនៅក្នុងកម្មវិធី គឺគេតម្រូវឲ្យយើងនិយាយពីការជំរុញ និងលើកចិត្តបំផុសឲ្យស្ត្រីឬយុវនារីចូលរួមសកម្មភាពកីឡាមិនថាកីឡាប្រភេទណាក៏ដោយ ជាក់ស្តែងខ្ញុំជាកីឡាវ៉ូវីណាមផ្ទាល់ជាប្រភេទយុទ្ធគុនចម្រុះ ដូច្នេះខ្ញុំបាននិយាយពីអត្ថប្រយោជន៍ និងគុណសម្បត្តិ កីឡាវ៉ូវីណាមកម្មវិធីខាងលើ ដើម្បីអូសទាញដូចជាជំរុញទឹកចិត្តឲ្យពួកគាត់ហ្វឹកហាត់កីឡាប្រភេទក្បាច់គុន។

អគ្គរដ្ឋទូតកីឡាស្ត្រីអាស៊ានរបស់ប្រទេសកម្ពុជា បានបន្ថែមទៀតថា អ្វីដែលសំខាន់មួយទៀត គឺយើងទទួលបានបទពិសោធន៍ថ្មីៗជាច្រើនពីបណ្តាប្រទេសដទៃទៀត ព្រោះកម្មវិធីនេះក៏មានកីឡាការិនីមកពី៩ប្រទេសដែរ ដោយនិយាយពីប្រភេទកីឡារបស់ពួកគេ ដើម្បីផ្លាស់ប្តូរបទពិសោធន៍គ្នាទៅវិញទៅមក។ ខ្ញុំសង្ឃឹម និងរំពឹងទទួលបានបទពិសោធន៍ថ្មីជាច្រើនទៀតនៅកម្មវិធីនេះ។

ពៅ សុខា កីឡាការិនីកីឡាវ៉ូវីណាម ត្រូវបានលេខាធិការដ្ឋានអាស៊ាន អញ្ជើញឲ្យចូលរួម “កម្មវិធីជជែកពិភាក្សា ដើម្បីលើក កម្ពស់ការចូលរួមរបស់ស្ត្រី ក្នុងវិស័យកីឡានៅអាស៊ាន និងការផ្តល់កិត្តិយសដល់ម្ចាស់មេដាយអូឡាំពិកនិងប៉ារ៉ាឡាំពិកអាស៊ានតូក្យូ ២០២០ នាថ្ងៃទី៣ ខែធ្នូ ឆ្នាំ ២០២១ នាទីក្រុងហ្សាការតា ប្រទេសឥណ្ឌូនេស៊ី តាមរយៈសន្និសីទវីដេអូក្នុងនាមជាអគ្គរដ្ឋទូតកីឡាស្ត្រីអាស៊ានរបស់ប្រទេសកម្ពុជារួមជាមួយ និងឯកអគ្គរដ្ឋទូតកីឡាស្ត្រីអាស៊ានមកពីប្រទេស៩ផ្សេងទៀតផងដែរ ។

កីឡាការិនី ពៅ សុខា បានថ្លែងអំណរគុណដល់ថ្នាក់ដឹកកីឡាទាំងអស់ និងប្រធានសហព័ន្ធកីឡាវ៉ូវីណាម ព្រមទាំងសមាជិកសហព័ន្ធ លោកគ្រូអ្នកគ្រូ ដែលមានទំនុកចិត្តលើរូបនាង សម្រាប់ការចូលរួមកម្មវិធីជជែកពិភាក្សាដើម្បីលើកកម្ពស់ការចូលរួមរបស់ស្ត្រីក្នុងវិស័យកីឡានៅអាស៊ាន៕

អត្ថបទ៖ វិសិទ្ធ

Related Topics: