នគរបាលកម្ពុជា ឈ្នះមេដាយ២គ្រឿងដំបូងពីព្រឹត្តិការណ៍កីឡានគរបាល និងកងពន្លត់អគ្គិភ័យពិភពលោក នៅហូឡង់

កីឡាករនគរបាលកម្ពុជា ២រូប បានឈ្នះមេដាយដំបូងរៀងៗខ្លួន ក្នុងព្រឹត្តិការណ៍កីឡានគរបាល និងកងពន្លត់អគ្គិភ័យពិភពលោក លើកទី១៩ ឆ្នាំ២០២២ (The 19th World Police and Fire Games) នៅទីក្រុង Rotterdam ប្រទេសហូឡង់ ពោលគឺប្រាក់១ សំរឹទ្ធ១។

កីឡាករ នុត សេរីរដ្ឋា ដណ្តើមបានមេដាយប្រាក់ និងកីឡាករ នង គ្រឹះស្នា ដណ្តើមបានមេដាយសំរឹទ្ធម្នាក់១គ្រឿង លើវិញ្ញាសា Jiu Jitsu អាយុ៣០ឆ្នាំឡើង ក្នុងប្រភេទទម្ងន់ក្រោម៧០គីឡូក្រាម នារសៀល ថ្ងៃសៅរ៍ ទី២៣ ខែកក្កដា ឆ្នាំ២០២២ ម្សិលមិញ ត្រូវនឹងវេលាយប់ម៉ោងនៅកម្ពុជា។

ព្រឹត្តិការណ៍នេះ ប្រព្រឹត្តទៅពីថ្ងៃទី២២ ដល់៣១ ខែកក្កដា ឆ្នាំ២០២២ ដោយមានកីឡា ៦៣ប្រភេទដាក់ឱ្យប្រកួត ខណៈប្រភេទកីឡាដែលសហភាពកីឡានគរបាលជាតិកម្ពុជា បញ្ជូនចេញទៅប្រកួតប្រជែង មាន ៦ប្រភេទរួមមាន៖ តេក្វាន់ដូ WT, វាយសី, វាយកូនឃ្លីលើតុ, ចំបាប់, យូដូ និងការ៉ាតេ ដោយមានប្រតិភូ គ្រូបង្វឹក និងកីឡាករ-កីឡាការិនី ចំនួន ២២រូប។

ការប្រកួត World Police & Fire Games 2022 នឹងប្រើប្រាស់កីឡាជាមធ្យោបាយនៃការបង្កើតការជួបគ្នារវាងអ្នកឆ្លើយតបដំបូង។ លើសពីនេះ គោលបំណងគឺដើម្បីជំរុញទឹកចិត្តកីឡា និងបង្កើតការគោរពចំពោះបុគ្គលិកសង្គ្រោះបន្ទាន់ទាំងអស់ ដែលត្រៀមខ្លួនសម្រាប់ប្រជាជនទាំងយប់ទាំងថ្ងៃ៕

អត្ថបទ៖ មន្នីរ័ត្ន