U-15 ស្វាយរៀង ជាក្រុមមិនមែនមកពីក្លិបអាជីពតែមួយគត់ ដែលបានឡើងវគ្គផ្ដាច់ព្រ័ត្រពានយុវជនប្រចាំប្រទេស

ក្រុម U-15 សាលាតម្រង់ទិសខេត្តស្វាយរៀង បានកក់កៅអីឡើងវគ្គផ្ដាច់ព្រ័ត្រពានរង្វាន់ជ្រើសរើសជើងឯកយុវជន (U-15 Youth League) ដែលរៀបចំដោយសហព័ន្ធកីឡាបាល់ទាត់កម្ពុជា ប្រចាំឆ្នាំ២០២២ ខណៈក្រៅពីនេះសុទ្ធសឹងតែជាក្រុមរបស់ក្រុមនៅលីគអាជីព។

ក្រុម U-15 យុវជនសាលាតម្រង់ទិសខេត្តស្វាយរៀង បានកៅអីឡើងវគ្គផ្ដាច់ព្រ័ត្រពានរង្វាន់ជ្រើសរើសជើងឯកយុវជន U-15 ដោយបានយកឈ្នះ U-15 អង្គរថាយហ្គឺរ ដោយបាល់ ១១ម៉ែត្រកាត់សេចក្ដី ៦-៧ នៅវគ្គពាក់កណ្ដាលផ្ដាច់ព្រ័ត្រ ហើយត្រូវជួបក្រុម យុវជនសមាគមកីឡាបាល់ទាត់កងយោធពលខេមរភូមិន្ទ (U-15 Tiffy Army) នៅវគ្គផ្ដាច់ព្រ័ត្រ។

ដោយឡែកពាន U-18 វិញ ភ្នំពេញក្រោន ជាមួយ វិសាខា ដឹកដៃគ្នាឡើងវគ្គផ្ដាច់ព្រ័ត្រដូចគ្នា ដែលនេះបានសេចក្ដីថា នៅវគ្គផ្ដាច់ព្រ័ត្រមានតែ ក្រុម U-15 យុវជនសាលាតម្រង់ទិសខេត្តស្វាយរៀង ជាក្រុមមិនមែនមកពីក្លិបអាជីពតែមួយគត់ ដែលបានឡើងមកដល់វគ្គដណ្ដើមពានយុវជនប្រចាំប្រទេសមួយនេះ។

តាមគម្រោងវគ្គផ្ដាច់ព្រ័ត្រ នឹងធ្វើឡើងនៅថ្ងៃទី០៤ ខែកញ្ញា ឆ្នាំ២០២២ សប្ដាហ៍ក្រោយ។ សូមបញ្ជាក់ថា ពានរង្វាន់ជ្រើសរើសជើងឯកយុវជននេះធ្វើឡើងជារៀងរាល់ឆ្នាំ ដោយមានក្លិប និងក្រុមមកពីគ្រប់ ២៥រាជធានី-ខេត្តចូលរួម ខណៈឆ្នាំ២០២២នេះ បានចាប់ផ្ដើមប្រកួតតាំងពីខែមីនា៕

អត្ថបទ៖ មន្នីរ័ត្ន