សន្តិសុខសង្គម

សមត្ថកិច្ចចុះបង្រ្កាបបទល្មើស Online scam នៅសណ្ឋាគារយីហោ ប៊ីជេ រកឃើញគ្រឿងញៀនជាង៧គីឡូ និងជនបរទេសជាង៣០នាក់

បានផុស

២ ថ្ងៃ មុន

នៅ

ថ្ងៃសុក្រ ៥ មិថុនា ២០២៦

ដោយ

កម្លាំងសមត្ថកិច្ចចម្រុះ បើកប្រតិបត្តិការណ៍បង្រ្កាបទីតាំង សណ្ឋាគារយីហោ ប៊ីជេ លួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាOnline Scam ឃាត់ខ្លួនជនបរទេសបានចំនួន៣៨នាក់ ដកហូតវត្ថុមួយចំនួន និងរកឃើញគ្រឿងញៀនជាង៧គីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយអនុវត្តតាមបទបញ្ជាដ៏ខ្ពង់ខ្ពស់ពី លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងលោក ប៉េង ពោធិ៍សា អភិបាលនៃគណៈអភិបាលខេត្តស្វាយរៀង ស្តីពីការអនុវត្តយុទ្ធនាការបង្ក្រាបបទល្មើសអនឡាញស្គេមនៅទូទាំងខេត្តស្វាយរៀង កាលថ្ងៃទី៤ ខែមិថុនា ឆ្នាំ២០២៦ កម្លាំងនគរបាល នៃស្នងការដ្ឋាននគរបាលខេត្តស្វាយរៀង សហការជាមួយលោកឧត្តមសេនីយ៍ទោ ប៉ុល រតនា អនុប្រធាននាយកដ្ឋានព្រហ្មទណ្ឌ សហការជាមួយសមត្ថកិច្ចខេត្តស្វាយរៀង និងគណៈបញ្ជាការឯកភាពរដ្ឋបាលក្រុងបាវិត ដោយមានការសម្របសម្រួលពីលោក ហួត វិចិត្រ ព្រះរាជអាជ្ញារង នៃអយ្យការអមសាលាដំបូងខេត្ត ចុះស្រាវជ្រាវ និងបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅចំណុចសណ្ឋាគារយីហោ ប៊ីជេ ( BJ )ស្ថិតក្នុងភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង។

កម្លាំងសមត្ថកិច្ចកំពុងបន្តស្រាវជ្រាវករណីឃាតកម្ម ក៏បានប្រទះឃើញមានជនបរទេសជាច្រើនស្នាក់នៅសណ្ឋាគារខាងលើ តាមបន្ទប់រកឃើញមានសម្ភារមួយចំនួនលួចលាក់ប្រព្រឹត្តបទល្មើស ឆបោកតាមប្រព័ន្ធបច្ចេកវិទ្យា Online scam។ ភ្លាមៗកម្លាំងសមត្ថកិច្ចចម្រុះ បានបើកប្រតិបត្តិការបង្រ្កាបជាក់ស្តែង ដោយឃាត់ខ្លួនជនសង្ស័យបានចំនួន៣៤នាក់ ជាជនជាតិ និងដកហូតបានវត្ថុតាងមួយចំនួនដូចជា iPad ២គ្រឿង , កំព្យូទ័រយួរដៃ ២គ្រឿង , ទូរស័ព្ទដៃចម្រុះម៉ាក ១២៧គ្រឿង , លិខិតឆ្លងដែន ៤ក្បាល, ID card ១០ សន្លឹក , អាវុធមួយដើមម៉ាក CZ មាន៤០ គ្រាប់ បង់ចំនួន២។

ក្នុងនោះកម្លាំងសមត្ថកិច្ចបានរកឃើញ មុខសញ្ញាជាអ្នកចែកចាយគ្រឿងញៀនចំនួន៣នាក់ ជាបុរសជនជាតិចិន នៅបន្ទប់លេខ ៨១១០ រកឃើញមួយកញ្ចប់តូច សថ្លាសង្ស័យជាគ្រឿងញៀន ប្រគល់ជូនកម្លាំងជំនាញផ្នែកគ្រឿងញៀននៃអធិដ្ឋាននរគបាលក្រុងបាវិត ដើម្បីបន្តនីតិវិធី។ កម្លាំងសមត្ថកិច្ចបានបន្តប្រតិបត្តិការ ឆែកឆេរបន្តរកឃើញ ក្រាមសថ្លា សង្ស័យជាសារធាតុញៀនចំនួន៧គីឡូក្រាម និង១៤៥ កញ្ចប់។

ក្រោយប្រតិបត្តិការ កម្លាំងសមត្ថកិច្ចរួមជាមួយអាជ្ញាធរ បានសម្រេចបានសៀលបណ្ដោះអាសន្នចំនួន៤០បន្ទប់ ចំណែកអ្នកពាក់ព័ន្ធត្រូវបានបញ្ជូនកាន់ការិយាល័យជំនាញខេត្តធើ្វការសាកសួរនាំ ដើម្បីចាត់ការតាមនីតិវិធីច្បាប់៕ អត្ថបទ៖ អុឹងម៉េង