សម្តេចអគ្គមហាសេនាបតីតេជោ ហ៊ុន សែន នាយរកដ្ឋមន្ត្រីនៃព្រះរាជាណាចក្រកម្ពុជា បានអំពាវនាវដល់ប្រព័ន្ធផ្សព្វផ្សាយទាំងអស់ ត្រូវជួយផ្សព្វផ្សាយដំណើររាប់ថយក្រោយ១០០ថ្ងៃ នៃព្រឹត្តិការណ៍កីឡាអាស៊ីអាគ្នេយ៍​ លើកទី​៣២ ឆ្នាំ២០២៣ នៅកម្ពុជា។

មានប្រសាសន៍ក្នុងពិធីជួបសំណេះសំណាល និងពិសារអាហារសាមគ្គីជាមួយអ្នកសារព័ត៌មាន ប្រមាណជិត ៥ពាន់នាក់ និងបណ្ដុំទៅដោយបណ្ដាញសារព័ត៌មានជាច្រើន នៅរសៀលថ្ងៃទី១៤ ខែមករា ឆ្នាំ២០២៣ នាសាលពិព័ណ៌កោះពេជ្រ សម្តេចតេជោនាយករដ្ឋមន្ត្រីមានប្រសាសន៍ថា ស្ថាប័នព័ត៌មានរដ្ឋ និងឯកជនត្រូវចូលរួមថែរក្សាសន្តិភាព ស្ថេរភាពនយោបាយ សន្តិសុខសណ្ដាប់ធ្នាប់សង្គម តាមរយៈភូមិឃុំមានសុវត្ថិភាព ដោយធ្វើការផ្សព្វផ្សាយជំរុញឱ្យ​អាជ្ញាធរ​និងស្ថាប័នមានសមត្ថកិច្ចទប់ស្កាត់ និងចាត់វិធានការរាល់បទល្មើសគ្រឿងញៀន ល្បែងស៊ីសងគ្រប់ប្រភេទ ក្មេងទំនើង​ចោរប្លន់ប្រដាប់អាវុធ គ្រោះថ្នាក់ចរាចរណ៍ជាដើម ដែលកើតឡើងនៅក្នុងមូលដ្ឋានរបស់ខ្លួនដើម្បីកសាងសង្គមកម្ពុជាមួយឱ្យមានសុវត្ថិភាព សណ្ដាប់ធ្នាប់ល្អ និងរក្សាកិត្តិយស សេចក្ដីថ្លៃថ្នូរលើកមុខមាត់កម្ពុជាលើឆាកអន្តរជាតិ ក្នុងនាមជាម្ចាស់ផ្ទះនៃការប្រកួតកីឡាស៊ីហ្គេម ឆ្នាំ២០២៣ ជាប្រវត្តិសាស្ត្រ។

ថ្ងៃទី២៥ ខែមករា ឆ្នាំ២០២៣ ខាងមុខនេះ ប្រព័ន្ធផ្សព្វផ្សាយទាំងអស់ សូមចូលរួមយុទ្ធនាការផ្សព្វផ្សាយការរាប់ថយក្រោយ១០០ថ្ងៃ នៃព្រឹត្តិការណ៍ប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា ឱ្យបានផុលផុសដើម្បីឱ្យប្រជាជន ប្រជាពលរដ្ឋ ទាំងក្នុង និងក្រៅប្រទេសបានដឹង និងបំផុស្មារតីលើកទឹកចិត្តដល់កីឡាករ កីឡាការិនី ឱ្យខិតខំហ្វឹកហាត់ដើម្បីទទួលបានមេដាយច្រើនក្នុងការប្រកួតនាពេលខាងមុខ និងលើកទឹកចិត្តឱ្យយុវជន និងប្រជាពលរដ្ឋយើងគាំទ្រ និងស្នេហាវិស័យកីឡាក្រោមពាក្យស្លោក ‘កីឡារស់ក្នុងសន្តិភាព’ ‘ប្រជាជនម្នាក់លេងកីឡាមួយមុខ’ ‘កម្ពុជាកាត់បន្ថយគ្រៅថ្នាក់ចរាចរណ៍’ និង ‘កម្ពុជាស្អាត’»។ 

សម្តេចតេជោ ហ៊ុន សែន ក៏បានប្រកាសជួបសំណេះសំណាលជាមួយកីឡាករ-កីឡាការិនី សារជាថ្មីផងដែរ នៅថ្ងៃទី០៤ ខែមេសា ឆ្នាំ២០២៣ ផងដែរដើម្បីជាការលើកទឹកចិត្តមុននឹងការត្រៀមខ្លួនប្រកួតស៊ីហ្គេម​ លើកទី៣២​ឆ្នាំ២០២៣ នៅមួយខែបន្ទាប់។

កម្ពុជា នឹងធ្វើពិធីរាប់ថយក្រោយ ១០០ថ្ងៃ នៃព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ នៅថ្ងៃទី២៥ ខែមករា ខាងមុខនេះ ដោយពិធីបើកជាផ្លូវការនឹងធ្វើឡើងនៅថ្ងៃទី០៥ ខែឧសភា ឆ្នាំ២០២៣ ហើយបិទបញ្ចប់នៅថ្ងៃទី១៧ ខែឧសភា ឆ្នាំ២០២៣។ 

ក្នុងអំឡុងរយៈពេលសល់ ១០០ថ្ងៃ CAMSOC នឹងរៀបចំផ្សព្វផ្សាយឲ្យបានខ្លាំងក្លានូវកម្មវិធីសំខាន់ៗទាំងអស់ ជាមួយ​នឹងកម្មវិធីប្រារព្ធពិធី ១០០ថ្ងៃ, ព្រះរាជពិធីសុំភ្លើង ‘អទិទេពកីឡា’ ការដង្ហែរភ្លើងគប់ បូកជាមួយនឹងកិច្ចប្រជុំនាយបេសក​កម្មស៊ីហ្គេម នៃ ១១ប្រទេសក្នុងអាស៊ានផងដែរ៕

អត្ថបទ៖ មន្នីរ័ត្ន