កីឡា

វៀតណាម ប្រកាសផ្ដល់ប្រាក់រង្វាន់ ១ លានដុល្លារ សម្រាប់អត្តពលិកឈ្នះមេដាយមាស នៅអូឡាំពិក ឆ្នាំក្រោយ

បានផុស

៣ years មុន

នៅ

ថ្ងៃចន្ទ ៦ កុម្ភៈ ២០២៣

ដោយ

យោងតាមសេចក្ដីប្រកាសរបស់គណៈកម្មាធិការអូឡាំពិកវៀតណាម (VNO) និងមូលនិធិយុទ្ធសាស្ត្រកីឡាអន្តរជាតិ (ISF) នៅទីក្រុងហាណូយ បានឲ្យដឹងថា ក្នុងសកម្មភាពជាប្រវត្តិសាស្ត្រ អត្តពលិកវៀតណាម ដែលឈ្នះមេដាយមាសនៅព្រឹត្តិការណ៍កីឡាអូឡាំពិក នាទីក្រុងប៉ារីស ឆ្នាំ ២០២៤ (Olympic 2024) នឹងទទួលបានប្រាក់រង្វាន់បំបែកកំណត់ត្រាចំនួន ១ លានដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការទាំងពីរបានចុះហត្ថលេខាលើអនុស្សរណៈ នៃការយោគយល់គ្នា (MoU) សម្រាប់ការឧបត្ថម្ភដល់ម្ចាស់មេដាយវៀតណាម ក្នុងការប្រកួតកីឡាដែលនឹងប្រព្រឹត្តទៅចាប់ពីថ្ងៃទី ២៤ ខែកក្កដា ដល់ថ្ងៃទី ១១ ខែសីហា ឆ្នាំ ២០២៤។

ក្រៅពីប្រាក់រង្វាន់ ISF និងដៃគូយុទ្ធសាស្ត្ររបស់ខ្លួននៅវៀតណាម Asong Invest ក៏នឹងគាំទ្រដល់ការអភិវឌ្ឍកីឡារបស់ប្រទេសផងដែរ។ នេះនឹងរួមបញ្ចូលការបញ្ជូនអត្តពលិកទៅបោះជំរំហ្វឹកហាត់ខ្លាំងនៅក្នុងប្រទេសកូរ៉េខាងត្បូង និងកម្មវិធីផ្លាស់ប្ដូរសម្រាប់មន្ត្រីកីឡា និងអ្នកជំនាញមកពីប្រទេសទាំងពីរដើម្បីស្វែងយល់អំពីការអប់រំកីឡា ការគ្រប់គ្រង និងការអភិវឌ្ឍកីឡាប្រកបដោយនិរន្តរភាព។

ដោយឡែកម្ចាស់មេដាយប្រាក់ និងសំរឹទ្ធ នឹងទទួលបាន ៥០០,០០០ ដុល្លារ និង ២០០,០០០ ដុល្លារ រៀងៗខ្លួន។

គួររំលឹកថា លទ្ធផលអូឡាំពិកខ្ពស់បំផុតរបស់វៀតណាម គឺមេដាយមាស លើកីឡាបាញ់កាំភ្លើង ដោយកីឡាករ Hoàng Xuân Vinh នៅទីក្រុង Rio ប្រទេសប្រេស៊ីល កាលពីឆ្នាំ ២០១៦។

នៅក្នុងអូឡាំពិកហ្គេមចុងក្រោយបង្អស់ នាទីក្រុងតូក្យូ ប្រទេសវៀតណាម បានបញ្ជូនអត្តពលិក ១៨ រូបចូលរួម លើ ១១ ប្រភេទកីឡា ប៉ុន្តែមិនមានអត្តពលិកណាម្នាក់ស្ថិតក្នុងលំដាប់កំពូលទាំង ៣ (មេដាយមាស ប្រាក់ សំរឹទ្ធ) នោះទេ៕

ប្រភព ៖ vietnamnews.vn

អត្ថបទ ៖ មន្នីរ័ត្ន