ក្រុមហ៊ុន Tik Tok នឹងចូលរួម​ផ្សព្វផ្សាយ​ការប្រកួត​ស៊ី​ហ្គេម​-​ប៉ា​រ៉ា​ហ្គេម ២០២៣ នៅ​កម្ពុជា​

គណៈកម្មាធិការ​ជាតិ​រៀបចំ​ការប្រកួត​កីឡា​ស៊ី​ហ្គេម​-​អាស៊ាន​ប៉ា​រ៉ា​ហ្គេម​ ​ឆ្នាំ​២០២៣ ​ជាមួយ​ក្រុមហ៊ុន​ Tik Tok ​ប្រចាំ​តំបន់​អាស៊ីអាគ្នេយ៍​ ​នា​ព្រឹក​ថ្ងៃទី​១៣ ​ខែមីនា​នេះ​ ​បាន​ចុះហត្ថលេខា​លើ​កិច្ចព្រមព្រៀង​មួយ​ ​ដើម្បី​ក្លាយជា​ដៃគូ​ច​ល​នូ​ប​ត្ថ​ម្ភ​​ក្នុង​ព្រឹត្តិការណ៍​កីឡា​ស៊ី​ហ្គេម​ ​លើក​ទី​៣២ ​និង​អាស៊ាន​ប៉ា​រ៉ា​ហ្គេម​ ​លើក​ទី​១២ ​ឆ្នាំ​២០២៣ ​នៅ​កម្ពុជា​។

ពិធី​នេះ​ ធ្វើឡើង​នៅ​ទីស្នាក់ការ​គណៈកម្មាធិកា​រ​ជាតិ​អូឡាំពិក​កម្ពុជា​ (NOCC) ​ក្រោម​វត្តមាន​ ​លោក​ វ៉ា​ត់​ ​ចំរើន​ ​អគ្គលេខាធិការ​នៃ​គណៈកម្មាធិការ​ជាតិ​រៀបចំ​ការប្រកួត​កីឡា​ស៊ី​ហ្គេម​-​អាស៊ាន​ប៉ា​រ៉ា​ហ្គេម​ ​ឆ្នាំ​២០២៣ (CAMSOC-CAMAPGOC) ​និង​តំណាង​ក្រុមហ៊ុន​ Tik Tok ​ប្រចាំ​តំបន់​អាស៊ីអាគ្នេយ៍​រួមទាំង​អ្នកពាក់ព័ន្ធ​។

ពិធី​ចុះហត្ថលេខា​លើ​កិច្ចព្រមព្រៀង​នៅថ្ងៃនេះ​ ​ដើម្បី​ក្លាយជា​ដៃគូ​ច​ល​នូ​ប​ត្ថ​ម្ភ​នេះ​គឺជា​ការរួមចំណែក​លើ​ការផ្សព្វផ្សាយ​ឱ្យបាន​កាន់តែ​ទូលំទូលាយ​នៅលើ​បណ្ដាញ​សង្គម​ Tik Tok ​អំពី​ព្រឹត្តិការណ៍​កីឡា​ស៊ី​ហ្គេម​ ​លើក​ទី​៣២ ​នៅ​កម្ពុជា​ ​ក៏ដូចជា​ធ្វើ​ឲ្យ​គោលដៅ​ទេសចរណ៍​ស៊ី​ហ្គេម​ ​ឬក៏​ផ្សព្វផ្សាយ​សក្ដានុពល​ ​និង​ទិដ្ឋភាព​កម្ពុជា​ទាំងមូល​ ​ទៅកាន់​ពិភពលោក​ ​តាមរយៈ​ TikTok​។

លោក​ វ៉ា​ត់​ ចំរើន ​មានប្រសាសន៍ថា «​ចុះហត្ថលេខា​ជាមួយ​ TikTok ​គឺជា​បណ្ដាញ​សង្គម​មួយ​ ​ដែលមាន​ឥទ្ធិពល​ក្នុង​សង្គម ទាំង​ក្នុង​ស្រទាប់​យុវជន និង​ប្រជាជន​ទូទៅ​ ​ទាំង​ក្មេង​ចាស់​ ​ប្រុស​ស្រី​ ​ជា​អ្នកមាន​ឥទ្ធិពល​ក្នុងសង្គម​របស់​យើង​ ​ប្រើប្រាស់​ TikTok ​ធ្វើជា​មធ្យោបាយ​ក្នុង​ការ​ផ្សព្វផ្សាយ​ផ្សេងៗ​។​ ​អ៊ីចឹង​យើង​ឃើញ​សារៈសំខាន់​នេះ​ហើយ​ ​បានជា​ CAMSOC ​បាន​ទំនាក់ទំនង​ ​និង​ស្វែងរក​តម្លៃបន្ថែម​ ​នៃ​ការ​ប្រ​ម៉ូដ​ ​ឬ​ការផ្សព្វផ្សាយ​ស៊ី​ហ្គេម​របស់​យើង​ទៅកាន់​ពិភពលោក​ ​ក៏ដូចជា​ក្នុងប្រទេស​របស់​យើង​ដែរ​»​។

«​យើង​សហការ​នេះ​ ​គឺ​យើង​សហការ​ក្នុង​កម្រិត​នៃ​ការផ្សព្វផ្សាយ​រួមគ្នា​ ​ដោយ​បណ្ដាញ​សង្គម​ TikTok ​នេះ​ ​គាត់​បាន​ជួយ​យើង​ក្នុង​ការ​ធ្វើ​ឲ្យ​ព្រឹត្តិការណ៍​ស៊ី​ហ្គេម​ ​ក៏ដូចជា​ធ្វើ​ឲ្យ​គោលដៅ​ទេសចរណ៍​ស៊ី​ហ្គេម​ ​ឬក៏​គាត់​ធ្វើការ​ផ្សព្វផ្សាយ​អំពី​កម្ពុជា​ ​បាន​ន័យ​ថា ​ ​ផ្សព្វផ្សាយ​សក្ដានុពល​ ​និង​ទិដ្ឋភាព​កម្ពុជា​ទាំងមូល​ ​ទៅកាន់​ពិភពលោក​ ​តាមរយៈ​ TikTok»​។ ប្រសាសន៍​បន្ថែម​របស់​លោក។

Tik Tok ​ក៏​នឹង​ជួយ​ទៅលើ​ការផលិត​មាតិកា​សំខាន់ៗ​ ​និង​គាំទ្រ​ដល់​ការផ្សាយ​ព្រឹត្តិការណ៍​ប្រកួត​ ​ក៏ដូចជា​ទិដ្ឋភាព​ពីក្រោយ​ឆាក​ ​ការសម្ភាសន៍​អត្ត​ព​លិ​ក​ ​និង​ highlight ​ការប្រកួត​ជាដើម​។​

​លោក​ Nicholas Pham ​តំណាង​ក្រុមហ៊ុន​ Tik Tok ​ប្រចាំ​តំបន់​អាស៊ីអាគ្នេយ៍​ ​បាន​មានប្រសាសន៍ថា «​ខ្ញុំ​ពិតជា​រីករាយ​ដែល​បាន​មក​ទីនេះ​ ​ក្នុងនាម​តំណាងឱ្យ​ Tik Tok ​ប្រចាំ​តំបន់​អាស៊ីអាគ្នេយ៍​ ​ចុះហត្ថលេខា​ក្លាយជា​ដៃគូ​ច​ល​នូ​ប​ត្ថ​ម្ភ​ Premium Sponsor ​និង​រីករាយ​ដែល​បាន​ក្លាយ​ជា​ផ្នែក​មួយ​នៃ​ព្រឹត្តិការណ៍​ស៊ី​ហ្គេម​ ​លើក​ទី​៣២ ​ដែល​អបអរ​ស្មារតី​កីឡា​ ​ការរួបរួម​ ​និង​មិត្តភាព​»​។​

លោក​ក៏បាន​សង្កត់​ធ្ងន់​ថា ​ ​នាម​ជា​អ្នក​ឧបត្ថម្ភ​លើ​ការផលិត​មាតិកា​ Tik Tok ​ប្តេជ្ញា​គាំទ្រ​អត្ត​ព​លិ​ក​ ​គ្រប់​បណ្ដា​ប្រទេស​ ​និង​អ្នកគាំទ្រ​ ​ដែល​នឹង​រួមចំណែក​ធ្វើ​ស៊ី​ហ្គេម​ឱ្យ​ក្លាយជា​ព្រឹត្តិការណ៍​ដ៏​ពិសេស​អស្ចារ្យ​។​  «​យើង​រីករាយ​នឹង​ដោយ​នឹង​ប្រើប្រាស់​បណ្ដាញ​សង្គម​របស់​យើង​ដើម្បី​ផ្សព្វផ្សាយ​ពី​ការប្រកួត​ ​នាំ​អ្នកគាំទ្រ​ឱ្យ​កាន់តែ​កៀក​ទៅនឹង​សកម្មភាព​ ​និង​ចែករំលែក​រឿងរ៉ាវ​ដ៏​អស្ចារ្យ​របស់​អត្ត​ព​លិ​ក​ជាមួយ​ពិភពលោក​»​។​ ​សម្ដី​របស់​ ​លោក​ Nicholas Pham​។

តំណាង​ Tik Tok ​ប្រចាំ​តំបន់​អាស៊ីអាគ្នេយ៍​រូបនេះ​ក៏បាន​សង្កត់ធ្ងន់​ទៀតផង​ដែរ​ថា​ ​ការ​ក្លាយជា​ដៃគូ​ចល​នូ​ប​ត្ថ​ម្ភ​នេះ​ ​មិនមែន​ត្រឹមតែ​ការផលិត​មាតិកា​តែមួយ​មុខ​នោះទេ​ ​ប៉ុន្តែ​ក៏​ជាការ​ផ្សព្វផ្សាយ​ពី​តម្លៃ​របស់​ស៊ី​ហ្គេម​ ​ដែល​រួមមាន​ ​ការរួបរួម​, ​ការ​គោរព​គ្នា​ទៅវិញទៅមក​ ​និង​គោលការណ៍​យុត្តិធម៌​៕

អត្ថបទ ​៖ មន្នី​រ័ត្ន