លោក Keisuke Honda៖ ក្លិប Soltilo Angkor FC ត្រូវបានបិទ ដោយសារតែរកដៃគូសហការឧបត្ថម្ភ មិនបាន

លោក Keisuke Honda អតីតអ្នកចាត់ការទូទៅនៃក្រុមបាល់ទាត់ជម្រើសជាតិ និងជាប្រធានក្លិបបាល់ទាត់ Soltilo Angkor FC នៅក្នុងខេត្តសៀមរាប បានចេញមកប្រកាសនៅព្រឹកព្រហាមថ្ងៃព្រហស្បតិ៍នេះថា លោក បានសម្រេចបិទក្លិប Soltilo Angkor FC ហើយ។ មូលហេតុចម្បងនៃការឈានទៅបិទនេះ គឺដោយសារលោកស្វែងរកដៃគូសហការឧបត្ថម្ភដល់ក្លិប មិនបាន។

( រូបភាព៖ Keisuke Honda Facebook)

តាមរយៈទំព័រហ្វេសប៊ុក លោក Keisuke Honda បានសរសេរបែបនេះថា៖ « ប្រជាជនកម្ពុជា និងខេត្តសៀមរាប! ខ្ញុំមានដំណឹងមួយជម្រាបជូនអ្នក យើងបានសម្រេចចិត្តបញ្ចប់ប្រតិបត្តិការរបស់ក្លិប Soltilo Angkor FC ដែលយើងបានដំណើរការតាំងពីឆ្នាំ ២០១៧។ ពួកយើងបានដំណើរការក្លិបនេះអស់រយៈពេលប្រាំមួយឆ្នាំមកហើយជាមួយនឹងគោលគំនិតចង់ធ្វើឱ្យបាល់ទាត់មិនត្រឹមតែនៅទីក្រុងភ្នំពេញប៉ុណ្ណោះទេ ថែមទាំងនៅតំបន់ជនបទផងដែរ»។

លោក Keisuke Honda បានបន្តទៀតថា៖ «ជាអកុសល យើងមិនអាចស្វែងរកដៃគូសហការឧបត្ថម្ភនៅពេលនេះបានទេ ហើយយើងមិនមានជម្រើសអ្វីក្រៅពីធ្វើការសម្រេចចិត្តឈប់បន្តប្រតិបត្តិការនេះតទៅទៀត។ ខ្ញុំសូមថ្លែងអំណរគុណយ៉ាងជ្រាលជ្រៅចំពោះលោក វ៉ាន់និត ដែលបានគាំទ្រខ្ញុំក្នុងនាមជាដៃគូសហការអស់រយៈពេលប្រហែល ៧ ឆ្នាំមកនេះ ហើយលើសពីនេះទៅទៀត ខ្ញុំសូមសម្ដែងនូវអំណរគុណចំពោះអ្នកគាំទ្រទាំងអស់ដែលបានគាំទ្រខ្ញុំរហូតមកដល់ពេលនេះ»។

(រូបភាព៖ Soltilo Angkor FC Facebook)

ដ្បិតថា អស់ភារកិច្ចនៅក្រុមបាល់ទាត់ជម្រើសជាតិកម្ពុជា និងបិទដំណើរការក្លិបបាល់ទាត់ Soltilo Angkor FC ក្តី តែលោក Keisuke Honda នៅតែគាំទ្រវិស័យបាល់ទាត់នៅកម្ពុជានៅកម្ពុជា។ លោក Keisuke Hondaបានគូសបញ្ជាក់ដូច្នេះថា៖«ខ្ញុំគាំទ្រប្រទេសកម្ពុជា ហើយជឿជាក់ថាថ្ងៃណាមួយកម្ពុជានឹងបានលេងក្នុងព្រឹត្តិការណ៍ World Cup។ សូមសំណាងល្អកម្ពុជា!»៕

ដោយ៖ វណ្ណ សុគន្ធា