ចរាចរណ៍

ស្រវឹងស្រាបើករថយន្ដស៊េរីទំនើបបុកអ្នកឈប់ប៉ះកង់ម៉ូតូរងរបួសធ្ងន់

បានផុស

៤ years មុន

នៅ

ថ្ងៃសុក្រ ៣ កញ្ញា ២០២១

ដោយ

បុរសស្រវឹងស្រាម្នាក់ត្រូវបានប៉ូលិសនាំមកកាន់ប៉ុស្ដិ៍នគរបាលរដ្ឋបាលស្ទឹងមានជ័យទី២ បន្ទាប់ពីបានបើករថយន្តFordមួយគ្រឿងទៅបុករ៉ឺម៉កសណ្ដោងកំពុងឈប់ប៉ះកង់នៅចិញ្ចើមផ្លូវ ហើយរុញទៅបុកម្ចាស់រ៉ឺម៉កបណ្ដាលឲ្យរបួសធ្ងន់កាលពីវេលាម៉ោង១១និង២០នាទីយប់ថ្ងៃទី២ ខែកញ្ញា ឆ្នាំ២០២១ ស្ថិតនៅតាមបណ្ដោយផ្លូវព្រះមុនីរ៉េត កែងច្រកចូលទីលានចាក់សំរាមចាស់ ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីកន្លែងកើតហេតុបានឲ្យដឹងថា មុនពេលកើតហេតុមានប្ដីប្រពន្ធពីរនាក់បានបើករ៉ឺម៉កសណ្ដោងមកប៉ះកង់ម៉ូតូ ដោយចករ៉ឺម៉កសណ្ដោងលើចិញ្ចើមផ្លូវ។ ខណៈកំពុងប៉ះកង់ម៉ូតូសណ្ដោងរ៉ឺម៉ក ស្រាប់តែមានរថយន្តម៉ាកFord មួយគ្រឿង ពណ៌ស ពាក់ស្លាកលេខភ្នំពេញ2BD-4333ធ្វើដំណើរតាមបណ្ដោយផ្លូវព្រះមុនីរ៉េតទិសដៅពីលិចមកកើតក្នុងល្បឿនលឿន និងរេចង្កូតមកស្ដាំដៃឡើងលើចិញ្ចើមផ្លូវមកបុករ៉ឺម៉កសណ្ដោងពីក្រោយពេញទំហឹង ធ្វើឲ្យរ៉ឺម៉កសណ្ដោងរុញទៅបុកបុរសម្នាក់ជាម្ចាស់កំពុងឈរមើលជាងប៉ះកង់បណ្ដាលឲ្យរងរបួសធ្ងន់ ហើយត្រូវបានរថយន្តសង្គ្រោះបន្ទាន់ដឹកយកទៅមន្ទីរពេទ្យភ្លាមៗផងដែរ។

ក្រោយកើតហេតុសមត្ថកិច្ចមូលដ្ឋានបានចុះទៅដល់ និងឃាត់តៃកុងរថយន្តបង្កមកកាន់ប៉ុស្ដិ៍នគរបាលរដ្ឋបាលស្ទឹងមានជ័យទី២ និងទំនាក់ទំនងទៅសមត្ថកិច្ចជំនាញចរាចរណ៍ខណ្ឌមានជ័យឲ្យធ្វើការវាស់វែងយករថយន្តបង្ក និងរ៉ឺម៉កសណ្ដោងទៅរក្សាទុកអធិការដ្ឋាននគរបាលខណ្ឌមានជ័យ ដើម្បីដោះស្រាយតាមច្បាប់នាពេលក្រោយ៕

អត្ថបទ៖ ឧត្តរ៉ា