Update៖ ករណីបុករះនៅផ្លូវព្រះនរោត្ដម មាន​ជនរងគ្រោះម្នាក់បាត់បង់ជីវិត និងរបួសច្រើននាក់

ករណីគ្រោះថ្នាក់ចរាចរណ៍បុករះបង្កឡើងដោយរថយន្ដមួយម៉ាកឡិចស៊ីស ដែលបើកបរដោយបុរសវ័យចំណាស់ម្នាក់នៅផ្លូវព្រះនរោត្ដម ក្នុងសង្កាត់ទន្លេបាសាច់ ខណ្ឌចំការមន បណ្ដាលឲ្យជនរងគ្រោះម្នាក់ស្លាប់ក្នុងថ្លុកឈាម ក្នុងចំណោមជ​ន​រងគ្រោះច្រើននាក់ដែលរងរបួស។ ក្នុងករណីបុករះនេះ ក៏បណ្ដាលឲ្យខូចខាតម៉ូតូ១គ្រឿង កង់បីឥណ្ឌា ២គ្រឿង និង រថយន្តព្រុស១គ្រឿងផងដែរ ខណៈអ្នកបើករថយន្ដបង្កត្រូវបានកម្លាំងនគរបាលឃាត់ខ្លួនបានភ្លាមៗក្រោយបង្កហេតុ។

តាមប្រភពព័ត៌មានពីប្រជាពលរដ្ឋបានអោយដឹងថា មុនកើតហេតុគេឃើញបុរសចំណាស់ម្នាក់បើករថយន្តម៉ាក ឡិច សុីស 400h ពណ៌ទឹកមាស ពាក់ស្លាកលេខ ភ្នំពេញ 2AQ-2188 បើកបរចុះពីលើស្ពានអាកាសក្បាលថ្នល់ ទិសដៅសំដៅទៅវិមានឯករាជ្យ។ ខណៈបើករថយន្តចុះពីលើស្ពានបានបន្តិច រថយន្តបានរេចង្កូតទៅបុករះម៉ូតូ១គ្រឿង រថយន្តព្រុស និងកង់បីឥណ្ឌា២គ្រឿងទៀត ធ្វើអោយបុរសជាអ្នកបើកម៉ូតូកង់បីឥណ្ឌាម្នាក់ស្លាប់ភ្លាមៗ ហើយរថយន្ដបង្កក៏បន្តទៅបុកបង្គោលដែក និងដើមឈើ១ដើមទៀត ទៀបធ្វើឲ្យរថយន្តទៅមុខលែងរួច។

ក្រោយពីបង្កហេតុភ្លាមៗ អ្នកបើករថយន្ដបង្កមិនបានគេចខ្លួនទៅណានោះទេ និងត្រូវបានកម្លាំងសមត្ថកិច្ចមូលដ្ឋានចុះដល់កន្លែងកើតហេតុ ឃាត់ខ្លួនយកទៅកាន់អធិការដ្ឋាននគរបាលខណ្ឌចំការមន ដើម្បីសាកសួរបន្ថែម និងចាត់តាមនីតិវិធី។ ចំណែកឯសពជនរងគ្រោះ ត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ រដ្ឋា