ជិះម៉ូតូល្មើសភ្លើចសញ្ញាចរាចរណ៍ត្រូវរថយន្ដបុករងរបួសពីរនាក់

មនុស្សប្រុសស្រីពីរនាក់ជិះម៉ូតូឌុបគ្នាឆ្លងផ្លូវល្មើសភ្លើងសញ្ញាចរាចរណ៍ត្រូវបានរថយន្ដមួយគ្រឿងបើកបុកពេញទំហឹងបណ្ដាលឲ្យរងរងបួសត្រូវបានបញ្ជូនទៅសង្គ្រោះនៅមន្ទីរពេទ្យ ចំណែកម្ចាស់រថយន្ដបានព្យាយាមបើករត់គេចពីកន្លែងកើតហេតុ តែត្រូវសមត្ថកិច្ចតាមឃាត់បាន។

ហេតុការណ៍នេះបានកើតឡើងកាលពីវេលាម៉ោង០៩និង៥០នាទីយប់ថ្ងៃទី២១ ខែមិថុនា ឆ្នាំ២០២៥ នៅតាមបណ្តោយផ្លូវម៉ៅសេទុង កែងមហាវិថីព្រះមុន្នីវង្ស ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៍មានពីប្រជាពលរដ្ឋបានអោយដឹងថា មុនកើតហេតុគេបានឃើញបុរសម្នាក់បើករថយន្តម៉ាកតូយូតា ប៊ែលតា ពណ៌ទឹកប្រាក់ ពាក់ស្លាកលេខ ភ្នំពេញ 2BV-5953 តាមបណ្ដោយផ្លូវម៉ៅសេទុង ខណៈមកដល់ចំណុចស្តុបបូកគោ រថយន្តបានឆ្លងផ្លូវបម្រុងបត់ឆ្វេងឡើងមកលើមហាវិថីព្រះមុន្នីវង្ស។ លុះបើកឆ្លងដល់ពាក់កណ្តាលផ្លូវ ស្របពេលភ្លើងស្តុបលោតទៅពណ៌ទឹកក្រូច ក៏ស្រាប់តែមានមនុស្សប្រុសស្រី០២នាក់ជិះម៉ូតូ ម៉ាកហុងដាឌ្រីម ឆ្នាំ២០២៥ ពណ៌ទឹកប៊ិច ពាក់ស្លាកលេខ ភ្នំពេញ 1LD-9221 ឌុបគ្នាឆ្លងផ្លូវទាំងបំពានភ្លើងសញ្ញាចរាចរណ៍ បណ្តាលអោយរថយន្តជ្រុលបុកចំពាក់កណ្តាលម៉ូតូ បង្កអោយបុរសជាអ្នកឌុប បាក់ជើងរងរបួសធ្ងន់ និងនារីជាអ្នកជិះខាងក្រោយរងរបួសស្រាល បញ្ជូនទៅមន្ទីរពេទ្យលោកសង្ឃសង្រ្គោះតែម្តង។ ភ្លាមៗ រថយន្តបានព្យាយាម បើករត់មកដល់ក្បែរស្ថានទូតវៀតណាម ត្រូវបានសមត្ថកិច្ចដេញតាមឃាត់បានយកបុរសជាអ្នកបើករថយន្តទៅសួរនាំនៅប៉ុស្តិ៍ទន្លេបាសាក់។

ក្រោយកើតហេតុ សមត្ថកិច្ចមូលដ្ឋានធ្វើការវាស់វែងយករថយន្ត និងម៉ូតូ ទៅរក្សាទុករង់ចាំដោះស្រាយគ្នាពេលក្រោយ៕

អត្ថបទ៖ រដ្ឋា