មន្ត្រីនគរបាលម្នាក់បាត់បង់ជីវិតលើផ្លូវ៦០ម៉ែត្រដោយសារគ្រោះថ្នាក់ចរាចរណ៍

បុរសម្នាក់ជាមន្ត្រីនគរបាលនៃនាយកដ្ឋាននគរបាលការពារ ត្រូវបានបាត់បង់អាយុជីវិតក្នុងហេតុការណ៍គ្រោះថ្នាក់ចរាចរណ៍លើផ្លូវ៦០ម៉ែត្រ។

ហេតុការណ៍នេះកើតឡើងនៅវេលាម៉ោង៨និង៣០នាទីយប់ត្រូវនឹងថ្ងៃទី៩ ខែកញ្ញា ឆ្នាំ២០២៥ស្ថិតនៅតាមបណ្ដោយផ្លូវ ៦០ម៉ែត្រ ក្នុងសង្កាត់ចាក់អង្រែក្រេាម ខណ្ឌមានជ័យ រាជធានីភ្នំពេញ។ ជនរងគ្រោះមានឈ្មោះ អូន គឹមអេង ភេទប្រុស មុខរបរ ជានគរបាល មានឋានន្តរសកិ្ត (វរសេនីយ៍ទោ)។

បើតាមការបញ្ជាក់ពីអ្នកឃើញហេតុការណ៍បានអោយដឹងថា មុនកើតហេតុគេបានឃើញរថយន្ត Mercedes GL450 ដែលមានស្លាកលេខ ភ្នំពេញ 2BJ-6586 ពណ៌ស បើកក្នុងល្បឿនលឿន តាមបណ្តោយផ្លូវ ៦០ម៉ែត្រ លុះមកដល់ចំណុចកើតហេតុ ក៏បានបុកម៉ូតូមួយគ្រឿងម៉ាក PCX ពាក់ស្លាកលេខភ្នំពេញ1BJ-3251 ដែលកំពុងឆ្លងផ្លូវបណ្ដាលអោយម្ចាស់ម៉ូតូសន្លប់បាត់ស្មារតីតែម្តង។ ភ្លាមៗ ប្រជាពលរដ្ឋក៏ដូចជាសមត្ដកិច្ចបានទាក់ទងទៅរថយន្តសង្គ្រោះបន្ទាន់ដើម្បីជួយសង្គ្រោះ ប៉ុន្តែជាអកុសលជនរងគ្រោះបានស្លាប់មុនពេលបញ្ជូនទៅដល់មន្ទីរពេទ្យ។

ក្រោយកើតហេតុ សមត្ថកិច្ចជំនាញចរាចរណ៍ខណ្ឌមានជ័យ ចុះមកដល់កន្លែងកើតហេតុធ្វើការវាស់វែង និងនាំខ្លួនម្ចាស់រថយន្ត ទៅសាកសួរ និងធ្វើកំណត់ហេតុ អនុវត្តនីតិវីធី៕

អត្ថបទ៖ រដ្ឋា