ចិនច្រានចោល​ការ​ចោទ​ប្រកាន់​​របស់​ត្រាំ ដែល​ថា​ខ្លួន​​សាកល្បង​នុយក្លេអ៊ែរ​ក្រោមដី​

ប្រទេសចិនបានច្រានចោលការចោទប្រកាន់របស់ប្រធានាធិបតីអាមេរិក​លោក ដូណាល់ ត្រាំ ដែល​ថា​ក្រុង​ប៉េកាំង​កំពុងធ្វើការសាកល្បងនុយក្លេអ៊ែរនៅក្រោមដីដោយសម្ងាត់ ដោយបញ្ជាក់ជាថ្មីនូវការប្តេជ្ញាចិត្តយូរអង្វែងរបស់​ក្រុង​ប៉េកាំង​​នៅ​ក្នុងការផ្អាកជាសកលលើការ​បំ​ផ្ទុះនុយក្លេអ៊ែរ។

អ្នកនាំពាក្យក្រសួងការបរទេស លោកស្រី Mao Ning បាននិយាយកាលពីថ្ងៃ​ទី​៣​ខែ​វិច្ឆិកា​ថា ប្រទេសចិនបាន«គោរពតាមការប្តេជ្ញាចិត្តរបស់ខ្លួន ក្នុងការផ្អាកការធ្វើតេស្តនុយក្លេអ៊ែរ» និងបន្តអនុវត្តតាមគោលនយោបាយ«មិនប្រើប្រាស់អាវុធនុយក្លេអ៊ែរ​មុន​គេឡើយ» ដោយសង្កត់ធ្ងន់លើការផ្តោតការយកចិត្តទុកដាក់របស់ទីក្រុងប៉េកាំងលើការការពារស្វ័យភាព និងការអភិវឌ្ឍ​ដោយសន្តិភាព។

លោកស្រី​ Mao បានប្រាប់អ្នកយកព័ត៌មាននៅទីក្រុងប៉េកាំងថា «ក្នុងនាមជារដ្ឋដែលមានទំនួលខុសត្រូវអាវុធនុយក្លេអ៊ែរ ប្រទេសចិនប្រកាន់ខ្ជាប់នូវការផ្អាកការធ្វើតេស្តនុយក្លេអ៊ែររបស់ខ្លួន។ យើងអំពាវនាវឲ្យ​សហរដ្ឋអាមេរិកធ្វើដូចគ្នា និងចាត់វិធានការជាក់ស្តែងដើម្បីការពារការរំសាយអាវុធអន្តរជាតិ និងកិច្ច​ខិតខំប្រឹងប្រែងមិនរីកសាយភាយអាវុធ»។

លោកត្រាំ​ បានចោទប្រកាន់នៅក្នុង​បទសម្ភាសន៍របស់ CBS កាលពីថ្ងៃអាទិត្យថា ប្រទេសចិន រុស្ស៊ី កូរ៉េខាងជើង និងប៉ាគីស្ថាន កំពុងធ្វើការសាកល្បងនុយក្លេអ៊ែរនៅក្រោមដីដោយសម្ងាត់ ខណៈដែលលោកបានជំរុញ​ឲ្យ​សហរដ្ឋអាមេរិកចាប់ផ្តើមកម្មវិធីសាកល្បងរបស់ខ្លួនឡើងវិញ៕