អាជីវករលក់បន្លែ ផ្លែឈើនៅលើដងផ្លូវជុំវិញផ្សារដើមគរតវ៉ាសុំលក់បន្តនៅកន្លែងដើម

អាជីវករលក់បន្លែផ្លែឈើនៅលើដងផ្លូវនានាក្នុងខណ្ឌបឹងកេងកង និងខណ្ឌទួលគោកជុំវិញផ្សារដើមគរបានផ្ទុះការតវ៉ាបិទផ្លូវព្រះមុនីរ៉េតដើម្បីទាមទារសុំសិទ្ធិបន្តលក់ដូរនៅលើដងផ្លូវ ខណៈអាជ្ញាធររៀបចំសណ្តាប់ធ្នាប់ និងរុះរើគ្រែលក់ដូរ នៅលើដងផ្លូវដើម្បីបង្ខំឲ្យអាជីវករទៅលក់ដូរនៅផ្សារដើមគរថ្មី។

ការតវ៉ានេះបានផ្ទុះឡើងតាំងពីយប់ថ្ងៃទី១៧ ខែមករា ឆ្នាំ២០២៦ និងបន្តរហូតដល់ព្រឹកថ្ងៃទី១៨ ខែមករា ឆ្នាំ២០២៦។ ការតវ៉ានេះត្រូវបានគេដឹងថា បន្ទាប់ពីរដ្ឋបាលរាជធានីភ្នំពេញតម្រូវឱ្យអាជីវករលក់ដូរនៅតាមដងផ្លូវមុន្នីរ៉េត និងតាមដងផ្លូវនានាជុំវិញផ្សារដើមគរ ទាំងអស់ទៅលក់ដូរនៅផ្សារដើមគរថ្មីក្នុងគោលបំណងដើម្បីរៀបចំសណ្ដាប់ធ្នាប់នៅតាមដងផ្លូវដើម្បីកាត់បន្ថយការកកស្ទះចរាចរណ៍ និងលើកកម្ពស់សោភ័ណភាពរាជធានីភ្នំពេញ។

តាមព័ត៌មានឱ្យដឹងថា នៅព្រឹកថ្ងៃទី១៨ ខែមករា អាជីវករបានបន្តតវ៉ា និងបានបិតផ្លូវព្រះមុនីរ៉េតត្រង់មុខផ្សារដើមគក្នុងសង្កាត់ផ្សារដើមគរ ខណ្ឌទួលគោក ដើម្បីទាមទារសុំលក់ដូរនៅកន្លែងដើម។

លោក សុខ ពេញ​វុ​ធ អភិបាលរងនៃ​គណៈ​អភិបាល​រាជធានី​ភ្នំពេញ ដឹកនាំ​ក្រុមការងារ​ និងអាជ្ញាធរ​ដែនដី ចុះ​ធ្វើការ​សម្របសម្រួល និងបាន​ពន្យល់​ណែនាំ​ដល់​អាជីវករ អោយទៅលក់ដូរនៅផ្សារដើមគថ្មីដែលស្ថិតនៅតាមបណ្ដោយមហាវិថីឈ្នះឈ្នះក្នុងខណ្ឌព្រែកព្នៅ រាជធានីភ្នំពេញ។ អាជីវករ​បាន​អោយដឹងថា ពួក​គាត់​មិន​ចង់​ចាកចេញ​ទៅ​លក់​នៅ​ផ្សារ​ដើម​គរថ្មី​នោះ​ទេ ដោយសារ​ទីតាំង​ថ្មី​មាន​ចម្ងាយ​ឆ្ងាយ ដែល​អាច​ធ្វើ​ឱ្យ​ការ​លក់ដូរ​មិន​ដាច់ និង​ប៉ះពាល់​ដល់​ចំណូល​ប្រចាំ​ថ្ងៃ​របស់​ពួក​គាត់។

លោកស្រី ដោ សម្ផស្ស នាយិការង និងជាអ្នកនាំពាក្យរដ្ឋបាលរាជធានីភ្នំពេញបានអោយដឹងថា រដ្ឋបាលរាជធានីភ្នំពេញ​ បានកំពុងរៀបចំលាងសម្អាតអនាម័យ​ មហាវិថីម៉ៅសេទុង​ មហាវិថីព្រះមុន្នីរ៉េត​​ ផ្លូវ២៣០​ និងតំបន់ជុំវិញពាក់ព័ន្ធ​ ដើម្បីតៀមរៀបចំជួសជុល និងកែលម្អហេដ្ឋារចនាសម្ព័ន្ធជុំវិញនោះ។

លោកស្រីបានបញ្ជាក់ថា​ ដេីម្បីលេីកកម្ពស់សោភ័ណភាព​ហេដ្ឋារចនាសម្ព័ន្ធ​ និងសណ្ដាប់ធ្នាប់របៀបរៀបរយសាធារណៈ​ ចាប់ពីថ្ងៃទី១៨​ ខែមករា​ ឆ្នាំ២០២៦​ នេះតទៅ​ រដ្ឋបាលរាជធានីភ្នំពេញ​នឹងមិនអនុញ្ញាតឱ្យមានការលក់ដូរឥតសណ្ដាប់​ធ្នាប់រំលោភចិញ្ចេីមផ្លូវ​ និងទ្រូងផ្លូវសាធារណៈ​ នៅមហាវិថីមុនីរ៉េត​ មហាវិថីម៉ៅសេទុង និងតំបន់ជុំវិញផ្សារដេីមគ​ ព្រមទាំងតំបន់ពាក់ព័ន្ធជុំវិញ។

សូម​បញ្ជាក់​ថា ការ​ដាក់​តាំង​លក់​នៅ​លើ​ចិញ្ចើម​ផ្លូវ និង​ការ​រំ​លោ​ភយ​ក​ចំណីផ្លូវ​រហូត​ដល់​ពាក់កណ្ដាល​ទ្រូងផ្លូវ នា​ពេល​កន្លង​មក បាន​ធ្វើ​ឱ្យ​បាត់បង់​សណ្ដាប់ធ្នាប់​សាធារណៈ​យ៉ាងធ្ងន់ធ្ងរ និង​បង្ក​ឱ្យ​មានការ​កកស្ទះ​ចរាចរណ៍​រៀងរាល់ថ្ងៃ នៅ​បណ្តោយ​ផ្លូវ​នេះ ដែល​ធ្វើ​ឱ្យ​ប៉ះពាល់​ដល់​សិទ្ធិ​ធ្វើ​ដំណើរ​របស់​ប្រជាពលរដ្ឋ​ទូទៅ និង​បាត់បង់​សោ​ភ័​ណ្ឌ​ភាព​រាជធានី​ភ្នំពេញ៕

អត្ថបទ៖ សុភា