កីឡា

កីឡាករគុនខ្មែរទម្ងន់ធ្ងន់ៗកាន់តែខ្វះ ខណៈកីឡាករលំដាប់ជួរមុខកាន់តែថយចុះ

បានផុស

៤ ខែ មុន

នៅ

ថ្ងៃអង្គារ ២៧ មករា ២០២៦

ដោយ

កីឡាករប្រដាល់គុនខ្មែរទម្ងន់ធ្ងន់ៗមិនសូវមានច្រើនទេនាប៉ុន្មានឆ្នាំចុងក្រោយ បន្ទាប់ពីកីឡាករលំដាប់ជួរមុខមួយចំនួនមានវ័យកាន់តែច្រើន ហើយសមត្ថភាពរបស់ពួកគេកាន់តែថយចុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករប្រដាល់គុនខ្មែរដែលអាចរាប់ចូលជាកីឡាករទម្ងន់ធ្ងន់ៗពោលគឺចាប់ពីទម្ងន់ ៧០គីឡូក្រាមឡើងទៅមិនសូវមានអ្នកថ្មីច្រើនឡើយ។ កីឡាករលំដាប់ជួរមុខសព្វថ្ងៃនេះមានដូចជា ធឿន ធារ៉ា, ធន់ រិទ្ធី, ឈឿង ល្វៃ, ព្រំ សំណាង, លី រិទ្ធី, ឡៅ ចន្ទ្រា, ឡៅ ចិត្រា និង រឿង សុភ័ណ្ឌ ជាដើម។ ទោះបីជាយ៉ាងណា ធឿន ធារ៉ា និង ធន់ រិទ្ធី មិនសូវទទួលបានលទ្ធផលល្អសម្រាប់ការឡើងប្រកួតមួយរយៈពេលចុងក្រោយ។ ពួកគេមានអាយុកាន់តែច្រើន ទម្ងន់កាន់តែធ្ងន់ ដែលបានធ្វើឲ្យស្មារតី និងរាងកាយកាន់តែថយចុះ។

ឈឿង ល្វៃ អាយុ ២៥ ឆ្នាំប្រកួតទម្ងន់ចន្លោះ ៧២ ដល់ ៧៥ គីឡូក្រាម ក៏មិនសូវជារឹងមាំបានយូរអង្វែងដែរ។ ចំណែក ឡៅ ចន្ទ្រា អាយុ ៣៤ឆ្នាំ ទម្ងន់កាន់តែកើនឡើងជាលំដាប់រហូតដល់វ៉ៃទម្ងន់ ៧៥គីឡូក្រាមហើយ ប៉ុន្តែសមត្ថភាពហាក់ដូចជាមិនសូវល្អប្រសើរដែរ។

ចំពោះកីឡាករ ឡៅ ចិត្រា អាយុ ២៧ ឆ្នាំ ដែលល្អលំដាប់លេខ១ចន្លោះទម្ងន់ ៦៥-៦៧គីឡូក្រាម បានឡើងទម្ងន់រហូតដល់ជាង ៧០គីឡូក្រាមហើយ បន្ទាប់ពីរូបគេមានបញ្ហារបួស ហើយបានធ្វើឲ្យសមត្ថភាពរបស់គេថយចុះ។ រឿង សុភ័ណ្ឌ ទម្ងន់ ៧៥គីឡូក្រាម អាយុ ៣៥ឆ្នាំដែលសមត្ថភាពក៏កាន់តែថយចុះដែរ។

កីឡាករ ព្រំ សំណាង មានអាយុមិនក្រោម ៤០ឆ្នាំ និងទម្ងន់ ៨០គីឡូក្រាមឡើងដែលអាចត្រូវបានចាត់ទុកជាកីឡាករគុនខ្មែរមានវ័យចំណាស់ និងអាយុច្រើនជាងគេបំផុតដែលនៅបន្តអាជីពប្រដាល់គុនខ្មែរ។ ទោះបីជាយ៉ាងណា ស្ថិតនៅក្នុងវ័យនេះហើយ តើរូបគេអាចបន្តអាជីពប្រដាល់បានប៉ុន្មានឆ្នាំទៀត។

នៅពេលកីឡាករគុនខ្មែរទម្ងន់ធ្ងន់ៗកាន់តែវ័យច្រើន ហើយសមត្ថភាពកាន់តែថយចុះ ប៉ុន្តែពន្លកថ្មីនៃកីឡាករប្រដាល់ទម្ងន់ធ្ងន់ៗមិនសូវមានច្រើន។ ប្រសិនបើនៅតែបែបនេះទៀត ក្នុងរយៈពេលដ៏ខ្លីខាងមុខ កាន់តែខ្វះកីឡាករទម្ងន់ទាំងនេះ។ ទម្ងន់ធ្ងន់ៗទាំងនេះស័ក្តិសមសម្រាប់ការប្រកួតជាមួយដៃគូដែលមកពីតំបន់អឺរ៉ុបដែលមានមាឌធំ។

បើពឹងផ្អែកលើកីឡាករមានសមត្ថភាពខ្លាំងនៅពេលពួកគេវ័យក្មេង និងទម្ងន់ស្រាល ប៉ុន្តែនៅពេលអាយុកាន់តែច្រើន ទម្ងន់កាន់តែឡើងរហូតដល់ជាង ៧០គីឡូក្រាមឡើងនោះគឺមិនមែនជាជម្រើសល្អទេ។ វាជាលក្ខខណ្ឌធម្មជាតិទៅហើយនៅអាយុកាន់តែច្រើន ទម្ងន់កាន់តែធ្ងន់ សមត្ថភាពកាន់តែធ្លាក់ចុះ។ ភាពខ្លាំងសម្រាប់កីឡាករទម្ងន់ធ្ងន់ៗគឺអាស្រ័យលើកាយសម្បទាធំ ខ្ពស់ និងទម្ងន់ធ្ងន់ទាំងវ័យក្មេង៕

អត្ថបទ៖ វិរបុត្រ

Related Topics:កីឡាប្រដាល់គុនខ្មែរ

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា