ថៃត្រៀមជម្លៀសពលរដ្ឋខ្លួនជាង ១១០ ០០០នាក់ ចេញពីមជ្ឈិមបូព៌ា

នាយករដ្ឋមន្ត្រី Anutin Charnvirakul បានប្រកាសកាលពីថ្ងៃទី១ខែមីនា​ឆ្នាំ​២០២៦​ថា ប្រទេសថៃកំពុងរៀបចំយន្តហោះយោធា និង​ជួល​ជើងហោះហើរ​ពិសេស ដើម្បីជម្លៀសពលរដ្ឋខ្លួនចេញពីតំបន់មជ្ឈិមបូព៌ា បន្ទាប់ពីមានការវាយប្រហារគ្នាទៅវិញទៅមករវាងសម្ព័ន្ធមិត្តអាមេរិក-អ៊ីស្រាអែល និងអ៊ីរ៉ង់។

យោង​តាម​ការ​ចុះ​ផ្សា​យ​របស់ Strait Times ជាមួយនឹងពលរដ្ឋថៃប្រហែល ១១០ ០០០​នាក់ ដែលកំពុងរស់នៅក្នុងតំបន់នោះ រដ្ឋាភិបាលកំពុងផ្តល់អាទិភាពដល់អ្នកនៅក្នុងប្រទេសអ៊ីរ៉ង់។ លោក Anutin បានបញ្ជាក់ថា រដ្ឋាភិបាលនឹងធ្វើគ្រប់យ៉ាងដើម្បីនាំពលរដ្ឋត្រឡប់មកវិញដោយសុវត្ថិភាព ទោះបីជាត្រូវជម្លៀសទៅកាន់ប្រទេសទីបីជាមុនសិន ដោយសារការបិទដែនអាកាសក៏ដោយ។

ជម្លោះបានផ្ទុះឡើងកាន់តែខ្លាំង បន្ទាប់ពីសហរដ្ឋអាមេរិក និងអ៊ីស្រាអែលបានចាប់ផ្តើមរលកនៃការវាយប្រហារលើអ៊ីរ៉ង់កាលពីថ្ងៃទី២៨ខែកុម្ភៈ ដែលនាំ​ឲ្យ​មានការសងសឹកភ្លាមៗពីភាគីអ៊ីរ៉ង់។ ប្រធានាធិបតីអាមេរិក ដូណាល់ ត្រាំ បានប្តេជ្ញាបន្តការវាយប្រហាររហូតដល់រដ្ឋាភិបាលអ៊ីរ៉ង់ដួលរលំ ខណៈដែលទូរទស្សន៍រដ្ឋអ៊ីរ៉ង់បានបញ្ជាក់ពីមរណភាពរបស់មេដឹកនាំកំពូលលោក Ayatollah Ali Khamenei។ នៅថ្ងៃទី១ខែមីនា សំឡេងផ្ទុះថ្មីៗត្រូវបានគេឮនៅក្នុងទីក្រុងដូហា ឌុយបៃ អាប៊ូដាប៊ី រីយ៉ាដ និងម៉ាណាម៉ា ដែលជំរុញ​ឲ្យ​ប្រទេសជាច្រើនបិទដែនអាកាសសម្រាប់ចរាចរណ៍ស៊ីវិល។

យោងតាមក្រសួងការបរទេសថៃ ពលរដ្ឋថៃរាប់សិបនាក់នៅអ៊ីរ៉ង់ និងអ៊ីស្រាអែលបានចុះឈ្មោះបំណងចង់ត្រឡប់ទៅផ្ទះវិញរួចហើយ។ ក្រៅពីអ្នកនៅក្នុងតំបន់រងការវាយប្រហារផ្ទាល់ ក៏មានពលករថៃរាប់ម៉ឺននាក់ទៀតកំពុងស្នាក់នៅទូទាំងអារ៉ាប់រួម អារ៉ាប៊ីសាអូឌីត បារ៉ែន និងកាតាផងដែរ។ មន្ត្រីថៃកំពុងសម្របសម្រួលជាមួយអង្គការអន្តរជាតិ ដើម្បីរៀបចំផែនការជម្លៀស ខណៈដែលក្រុមហ៊ុនអាកាសចរណ៍ជាច្រើនបានលុបចោលជើងហោះហើរទៅមកក្នុងតំបន់នេះ៕

ប្រែសម្រួល៖ ឈាង