លោកត្រាំ ចង់ទៅជួបមេដឹកនាំអ៊ីរ៉ង់នៅប៉ាគីស្ថាន ដើម្បីចុះហត្ថលេខាបញ្ចប់សង្រ្គាម

ក្តីសង្ឃឹមនៃសន្តិភាពកាន់តែខិតជិតមក​ដល់ហើយ នៅពេលដែលលោកប្រធានាធិបតីអាមេរិក ដូណាល់ ត្រាំ បាន​ប្រកាស​ប្រាប់ក្រុមអ្នកកាសែតនៅសេតវិមានថា លោកកំពុងពិចារណាធ្វើដំណើរទៅកាន់ប្រទេសប៉ាគីស្ថានដោយផ្ទាល់។ នេះ​បើ​យោង​តាម​ការ​ចុះផ្សាយ​របស់​សារព័ត៌មាន People’s Dialy នា​ថ្ងៃទី​១៧មេសា​២០២៦។

លោកត្រាំ​បានបញ្ជាក់​ថា ប្រសិនបើកិច្ចព្រមព្រៀងសន្តិភាពជាមួយអ៊ីរ៉ង់ត្រូវបានរៀបចំឡើងនៅទីក្រុងអ៊ីស្លាម៉ាបាដមែននោះ លោកនឹងធ្វើដំណើរទៅទីនោះដើម្បីចុះហត្ថលេខាបញ្ចប់ជម្លោះដែលបានអូសបន្លាយជាច្រើនសប្តាហ៍មកនេះ។

លោកត្រាំ បានបង្ហើបឲ្យ​ដឹងថា ការចរចាដោយផ្ទាល់រវាងភាគីទាំងពីរអាចនឹងចាប់ផ្តើមឡើងវិញនៅចុងសប្តាហ៍នេះ។ លោកមានជំនឿចិត្តយ៉ាងខ្លាំងថា អាមេរិកនឹងអាចសម្រេចបានកិច្ចព្រមព្រៀងដ៏ល្អមួយជាមួយអ៊ីរ៉ង់ ដែលជាកិច្ចព្រមព្រៀងធានាថាអ៊ីរ៉ង់នឹងមិនមានអាវុធនុយក្លេអ៊ែរឡើយ។ លោកថែមទាំងបាននិយាយបែបកំប្លែងលាយឡំនឹងមោទក​ភាពថា ខាងអ៊ីរ៉ង់បានយល់ព្រមប្រគល់ «ធូលីនុយក្លេអ៊ែរ» ដែលលាក់ទុកនៅក្រោមដីឲ្យ​​មកអាមេរិកវិញទៀតផង បន្ទាប់ពីកងទ័ពអាមេរិកបានប្រើប្រាស់យន្តហោះទម្លាក់គ្រាប់បែកវាយប្រហារនាពេលកន្លងមក។

ពាក់ព័ន្ធនឹងកិច្ចព្រមព្រៀងផ្អាកបាញ់គ្នាដែលកំពុងអនុវត្តបច្ចុប្បន្ន លោកត្រាំ យល់ឃើញថាប្រហែលជាមិនចាំបាច់ត្រូវបន្តសុពលភាពទៀតទេនៅសប្តាហ៍ក្រោយ ព្រោះអ្វីៗកំពុងតែដើរទៅមុខយ៉ាងរលូន។ លោកក៏បានបដិសេធព័ត៌មានដែលថា អាមេរិកកំណត់ពេលត្រឹមតែ២០​ឆ្នាំសម្រាប់ឲ្យ​អ៊ីរ៉ង់ផ្អាកកម្មវិធីនុយក្លេអ៊ែរ ដោយលោកសង្កត់ធ្ងន់ថា គោលដៅរបស់លោកគឺចង់ឲ្យ​អ៊ីរ៉ង់គ្មានអាវុធនុយក្លេអ៊ែរជារៀងរហូតតែម្តង មិនមែនកំណត់ត្រឹម២០​ឆ្នាំនោះឡើយ។

ទោះជាយ៉ាងណាក៏ដោយ លោកប្រធានាធិបតីរូបនេះនៅតែមិនចោលចរិតម៉ឺងម៉ាត់ដដែល ដោយលោកបានទុកសម្តីព្រមានចុងក្រោយថា ប្រសិនបើការចរចានេះបរាជ័យ ឬមិនអាចឈានដល់កិច្ចព្រមព្រៀងបានទេនោះ ការវាយប្រហារតាមអាកាសនឹងត្រូវចាប់ផ្តើមឡើងវិញភ្លាមៗ។ លោកបាននិយាយយ៉ាងខ្លីថា «បើគ្មានកិច្ចព្រមព្រៀង គឺត្រូវវាយគ្នាបន្តទៀត» ដែលនេះជាការដាក់សម្ពាធយ៉ាងធ្ងន់ដល់ទីក្រុងតេហេរ៉ង់ ឲ្យ​ប្រញាប់សម្រេចចិត្តរើសយកផ្លូវសន្តិភាព៕

ប្រែសម្រួល៖ ឈាង