លោក ត្រាំ ប្រៀបធៀបការរឹបអូសនាវាអ៊ីរ៉ង់​ដោយ​កងទ័ព​ជើងទឹកអាមេរិក​ទៅ​នឹង​ «ចោរសមុទ្រ»​ធ្វើសកម្មភាព​

ប្រធានាធិបតីសហរដ្ឋអាមេរិក លោក ដូណាល់ ត្រាំ នៅ​ថ្ងៃទី១ ខែឧសភា បាន​ប្រៀបធៀប​សកម្មភាព​កងទ័ពជើងទឹកសហរដ្ឋអាមេរិក​ដែលកំពុង​​ធ្ងើប្រតិបត្តិការ​បិទខ្ទប់ច្រក​សមុទ្រ​​នៅ​អ៊ីរ៉ង់ ទៅ​នឹង​សកម្មភាព​ចោរសមុទ្រ ដែល​ធ្វើសកម្មភាព​​​ដូច្នោះដែរ​ អំឡុងពេលសង្គ្រាមរវាងសហរដ្ឋអាមេរិក និងអ៊ីស្រាអែល ប្រឆាំងនឹងប្រទេសអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានធ្វើការអត្ថាធិប្បាយបែបនេះ ក្នុងខណៈពេលដែលកំពុងរៀបរាប់អំពីការរឹបអូសយកនាវាដឹកទំនិញមួយគ្រឿង ដោយ កងកម្លាំងសហរដ្ឋអាមេរិក កាលពីប៉ុន្មានថ្ងៃមុន។ នេះបើយោងតាមការចុះផ្សាយពីទីភ្នាក់ងារសារព័ត៌មាន Reuters។

លោក ត្រាំ នៅក្នុងការអត្ថាធិប្បាយ កាលពីល្ងាចថ្ងៃទី១ ខែឧសភា លើក​ឡើង​ថា៖ «យើងបានគ្រប់គ្រងនាវា យើងបានគ្រប់គ្រងទំនិញ ហើយយើងបានគ្រប់គ្រងប្រេងដូចគ្នា។ វាគឺជាអាជីវកម្មដែលចំណេញច្រើនណាស់! យើងគឺដូចជាចោរសមុទ្រអីចឹង! យើងហាក់បីដូចជាចោរសមុទ្រ ប៉ុន្តែយើងមិនមែនកំពុងនិយាយលេងសើចនោះទេ»។

ជាក់ស្ដែង នាវាខ្លះរបស់ទីក្រុងតេហេរ៉ង់ ត្រូវបានរឹបអូសដោយសហរដ្ឋអាមេរិក បន្ទាប់ពីបានចាកចេញពីកំពង់ផែអ៊ីរ៉ង់ ព្រមជាមួយគ្នានោះដែរ ក៏មាននាវាដឹកទំនិញដែលស្ថិតក្នុងបញ្ជីទណ្ឌកម្ម និងនាវាដឹកប្រេងរបស់អ៊ីរ៉ង់ ត្រូវបានរឹបអូសនៅក្នុងដែនទឹកនៃតំបន់អាស៊ីផងដែរ។

លោកត្រាំ ដែលបានផ្តល់នូវពេលវេលា និងគោលដៅមិនច្បាស់លាស់សម្រាប់សង្គ្រាមមួយដែលនៅតែមិនមានការគាំទ្រនៅក្នុងសហរដ្ឋអាមេរិក បានប្រឈមមុខនឹងការថ្កោលទោសយ៉ាងខ្លាំងក្លា ចំពោះការអត្ថាធិប្បាយរបស់លោកលើជម្លោះនេះ រួមទាំងនៅពេលដែលលោកបានគំរាមកំហែងបំផ្លាញអរិយធម៌ទាំងស្រុងរបស់ប្រទេសអ៊ីរ៉ង់ កាលពីខែមេសាកន្លងទៅ។

មិនតែប៉ុណ្ណោះ អ្នកជំនាញសហរដ្ឋអាមេរិកជាច្រើនបានលើកឡើងកាលពីខែមេសាថា ការវាយប្រហាររបស់អាមេរិកលើប្រទេសអ៊ីរ៉ង់ អាចចាត់ទុកថាជា «ឧក្រិដ្ឋកម្មសង្គ្រាម» បន្ទាប់ពីលោកត្រាំ បានគំរាមកំហែងកំណត់គោលដៅលើហេដ្ឋារចនាសម្ព័ន្ធស៊ីវិល៕

អត្ថបទ៖ សាង ស្រីល័ក្ខ